VP Resignation | బీజేపీతో పొసగకే ఉపరాష్ట్రపతి రాజీనామా..! అభిశంసన తీర్మానం చిచ్చు..!

ఉప రాష్ట్రపతి పదవికి జగ్‌దీప్‌ ధన్‌ఖడ్‌ రాజీనామా చేయడం దేశ రాజకీయాల్లో సంచలనంగా మారింది. మరో రెండేండ్లు పదవీకాలం ఉండగానే అనూహ్య పరిస్థితుల్లో సోమవారం ఆయన రాజీనామా చేయడంపై ప్రతిపక్షాలతో పాటు పలువురు రాజకీయ విశ్లేషకులు అనుమానాలు వ్యక్తం చేస్తున్నారు.

• నిప్పురాజేసిన జస్టిస్‌ యశ్వంత్‌ వర్మ అభిశంసన
• రాజ్యసభలో విపక్షాల నోటీసులకు ధన్‌ఖడ్‌ ఓకే
• బీజేపీ అవిశ్వాసం పెడ్తదేమోనని ముందే రిజైన్‌
• భగ్గుమన్న బీజేపీ.. ధన్‌ఖడ్‌పై అవిశ్వాస తీర్మానానికి ప్లాన్‌?
• నితీశ్‌ను రేసులోకి తెస్తున్న బీజేపీ.. కుట్రేనన్న ఆర్జేడీ
• ధన్‌ఖడ్‌ రాజీనామాకు రాష్ట్రపతి ముర్ము ఆమోదం

హైదరాబాద్‌, జూలై 22 (నమస్తే తెలంగాణ): ఉప రాష్ట్రపతి పదవికి జగ్‌దీప్‌ ధన్‌ఖడ్‌ రాజీనామా చేయడం దేశ రాజకీయాల్లో సంచలనంగా మారింది. మరో రెండేండ్లు పదవీకాలం ఉండగానే అనూహ్య పరిస్థితుల్లో సోమవారం ఆయన రాజీనామా చేయడంపై ప్రతిపక్షాలతో పాటు పలువురు రాజకీయ విశ్లేషకులు అనుమానాలు వ్యక్తం చేస్తున్నారు. స్వపక్షం బీజేపీతో పొసగకపోవడం వల్లే ధన్‌ఖడ్‌ ఇలా గంటల వ్యవధిలోనే రాజీనామా నిర్ణయం తీసుకొన్నారని చెప్తున్నారు. ధన్‌ఖడ్‌ రాజీనామాకు రాష్ట్రపతి ముర్ము ఆమోదం తెలిపారు.

రాజీనామా కారణాలు ఇవేనా..

• నోట్ల కట్టల కేసులో జస్టిస్‌ యశ్వంత్‌ వర్మ అభిశంసన కోరుతూ రాజ్యసభలోని 68 మంది విపక్ష ఎంపీలు సంతకాలు చేసిన నోటీసులను అంగీకరిస్తున్నట్టు సోమవారం ధన్‌ఖడ్‌ ప్రకటించారు. ఈ విషయంలో తదుపరి ప్రక్రియను మొదలుపెట్టమని సెక్రటరీ జనరల్‌ను ఆదేశించారు. నిజానికి జస్టిస్‌ యశ్వంత్‌ వర్మ అభిశంసనకు సంబంధించిన చర్యలకు తాము నేతృత్వం వహించాలని అధికార బీజేపీ అనుకొన్నది. ఈ క్రమంలోనే లోక్‌సభలో చర్యలకు ఉపక్రమించింది. అయితే, రాజ్యసభలో విపక్షాలు ఇదే విషయాన్ని తొలుత లేవనెత్తడం, తమతో చర్చించకుండానే ధన్‌ఖడ్‌ విపక్షాలకు అనుకూలంగా నిర్ణయం తీసుకోవడం బీజేపీ ప్రభుత్వానికి రుచించలేదని సంబంధిత వర్గాల ద్వారా తెలిసింది. దీంతో ధన్‌ఖడ్‌పై అవిశ్వాస తీర్మానానికి అధికార పక్షం సిద్ధమైందని, ఈ క్రమంలోనే అయన అనూహ్యంగా రాజీనామా నిర్ణయం తీసుకొన్నారని సమాచారం.
• సోమవారం సాయంత్రం నిర్వహించిన రెండో దఫా బిజినెస్‌ అడ్వైజరీ కమిటీ సమావేశానికి బీజేపీ అధ్యక్షుడు జేపీ నడ్డా, పార్లమెంటరీ వ్యవహారాల మంత్రి కిరణ్‌ రిజిజు గైర్హాజరయ్యారు. ఈ చర్య ధన్‌ఖడ్‌కు ఆగ్రహం తెప్పించిందని, దీంతో మంగళవారం మధ్యాహ్నానికి భేటీని వాయిదా వేశారని రాజకీయవేత్తలు విశ్లేషిస్తున్నారు. పార్లమెంటరీ ప్రొసీడింగ్స్‌లో కీలకమైన బిజినెస్‌ అడ్వైజరీ కమిటీ భేటీని బీజేపీ అధ్యక్షుడు, మంత్రి పక్కనబెట్టడం అవమానకరంగా భావించిన ధన్‌ఖడ్‌.. తన పదవికి రాజీనామా చేసి ఉండొచ్చని మరికొందరు అంటున్నారు.
• పహల్గాం ఉగ్రదాడి ఘటనలో భద్రతా వైఫల్యంపై, అలాగే కాల్పుల విరమణకు తానే కారణమన్న అమెరికా అధ్యక్షుడు ట్రంప్‌ ప్రకటనపై రాజ్యసభలో విపక్ష నాయకుడు, కాంగ్రెస్‌ అధ్యక్షుడు మల్లికార్జున ఖర్గే సుదీర్ఘంగా ప్రసంగిస్తూ అధికార బీజేపీని సోమవారం ఎండగట్టారు. ధన్‌ఖడ్‌ అనుమతితోనే ఆయన సుదీర్ఘంగా మాట్లాడారని వార్తలు గుప్పుమన్నాయి. ఇది కూడా అధినాయకత్వానికి ఆగ్రహం తెప్పించిందని విశ్లేషిస్తున్నారు.
• ప్రతిపక్ష పార్టీల నాయకులను ధన్‌ఖడ్‌ తరచూ కలువడం కూడా బీజేపీ అధినాయకత్వంలో ఆయనపై అసంతృప్తికి కారణంగా మారిందని కొందరు అభిప్రాయపడుతున్నారు. వీపీ ఎన్‌క్లేవ్‌లో గతవారం కాంగ్రెస్‌ అధ్యక్షుడు ఖర్గేతో, ఆదివారం ఆప్‌ కన్వీనర్‌ అరవింద్‌ కేజ్రీవాల్‌తో ఓ సమావేశంతో ధన్‌ఖడ్‌ పాల్గొనడాన్ని ఈ మేరకు ఉటంకిస్తున్నారు.
• రైతు సమస్యలపై కేంద్రమంత్రి శివరాజ్‌సింగ్‌ చౌహాన్‌ను ధన్‌ఖడ్‌ బహిరంగంగా నిలదీయడం, న్యాయవ్యవస్థపై తరచూ విమర్శలు చేయడం తదితర కారణాలు కూడా బీజేపీకి, ధన్‌ఖడ్‌కు మధ్య దూరం పెరగడానికి కారణం అయ్యి ఉండొచ్చన్న అభిప్రాయాలు వ్యక్తమవుతున్నాయి.

నితీశ్‌ కోసమేనా?!

బీహార్‌లో ఎన్డీయే మిత్రపక్షంగా ఉన్న జేడీయూ పార్టీ అధినేత, ఆ రాష్ట్ర ముఖ్యమంత్రి నితీశ్‌కుమార్‌ను ఉప రాష్ట్రపతిగా చేయడంలో భాగంగానే ధన్‌ఖడ్‌ రాజీనామా తెరమీదకు తీసుకువచ్చినట్టు మరికొందరు అనుమానాలు వ్యక్తం చేస్తున్నారు. కాగా నితీశ్‌ ఉపరాష్ట్రపతి కావడంలో తప్పేంటని బీహార్‌ మంత్రి, బీజేపీ నేత నీరజ్‌ కుమార్‌ ఇటీవల వ్యాఖ్యానించడం, నితీశ్‌ ఉప రాష్ట్రపతిగా ఉంటే రాష్ర్టానికి మంచి జరుగుతుందని బీజేపీ మంత్రి ప్రేమ్‌కుమార్‌, బీజేపీ ఎమ్మెల్యే హరిభూషణ్‌ ఠాకూర్‌ పేర్కొనడం గమనార్హం. ఇదిలాఉండగా.. అసెంబ్లీ ఎన్నికల కంటే ముందే నితీశ్‌ను ఉప రాష్ట్రపతిగా చేయడానికి వీలుగా ధన్‌ఖడ్‌తో బీజేపీ రాజీనామా చేయించిందని, ఇది కుట్రేనని ప్రతిపక్ష ఆర్జేడీ ఆరోపించింది.

పది రోజుల కిందట అలా.. ఇప్పుడు ఇలా..

పదవీవిరమణకు సంబంధించి జూలై 10న ధన్‌ఖడ్‌ మాట్లాడిన వీడియో వైరల్‌గా మారింది. 2027 ఆగస్టులో సరైన సమయంలో తాను రిటైర్‌ అవుతానని ధన్‌ఖడ్‌ అన్నారు. అయితే అది దైవ నిర్ణయంపై ఆధారపడి ఉంటుందన్నారు. అయితే పది రోజులు తిరక్కముందే రాజీనామా చేయడం సంచలనంగా మారింది.

త్వరలోనే ఉప రాష్ట్రపతి ఎన్నిక

పదవిలో ఉండగా ఉప రాష్ట్రపతి రాజీనామా చేసినా, మరణించినా, ఆయన్ని తొలగించినా సాధ్యమైనంత త్వరగా తదుపరి ఉప రాష్ట్రపతిని నియమించాలని రాజ్యాంగంలోని 68వ అధికరణంలోని క్లాజ్‌ 2 పేర్కొంటున్నది. ఉప రాష్ట్రపతి పదవిని చేపట్టిన వ్యక్తి మిగిలిన కాలానికి కాకుండా పదవిని చేపట్టిన రోజు నుంచి మొత్తం ఐదేండ్లు ఆ పదవిలో కొనసాగుతారు.

బ్లడ్‌ ఆన్‌ కార్పెట్‌

రాజీనామాకు ముందు సోమవారం అధికార బీజేపీకి సానుకూలంగా ఉన్న ధన్‌ఖడ్‌ వైఖరి మధ్యాహ్నం తర్వాత భిన్నంగా మారినట్టు ‘ది ఫెడరల్‌’ ఇంగ్లిష్‌ పత్రిక పొలిటికల్‌ ఎడిటర్‌ పునీత్‌ నికోలస్‌ యాదవ్‌ అభిప్రాయపడ్డారు. పహల్గాం దాడి, ఆపరేషన్‌ సిందూర్‌ మినహా మరే ఇతర చర్చకు తాము ఒప్పుకోబోమంటూ రూల్‌ 267 కింద ప్రతిపక్ష నేతలు ఇచ్చిన మోషన్‌ను ధన్‌ఖడ్‌ పక్కనబెట్టారని యాదవ్‌ అన్నారు. ఇదే సమయంలో రూల్‌ 167 కింద బీజేపీ సభ్యులు ఇచ్చిన మోషన్‌ను ఆయన అంగీకరించినట్టు చెప్పారు. మధ్యాహ్నం వర్మ అభిశంసన కోరుతూ విపక్ష ఎంపీలు సంతకాలు చేసిన నోటీసులను అంగీకరిస్తూ ధన్‌ఖడ్‌ సంచలన నిర్ణయం తీసుకొన్నారని యాదవ్‌ అభిప్రాయపడ్డారు. కాగా, పదకొండేండ్ల మోదీ నాయకత్వానికి ధన్‌ఖడ్‌ రాజీనామా ‘బ్లడ్‌ ఆన్‌ కార్పెట్‌’ (ధిక్కారం) లాంటిదేనని ‘ది ఫెడరల్‌’ సీనియర్‌ జర్నలిస్ట్‌ ఆనంద్‌ కే సహాయ్‌ అభివర్ణించారు.

రేసులో శశిథరూర్‌?

ఉప రాష్ట్రపతి రేసులో జేడీయూ నేత, రాజ్యసభ డిప్యూటీ ఛైర్మన్‌ హరివంశ్‌ సింగ్‌ పేరు ఉన్నట్టు వార్తలు వస్తున్నాయి. ఆయనతో పాటు బీహార్‌ సీఎం నితీశ్‌ కుమార్‌, కేంద్రమంత్రి రాజ్‌నాథ్‌ సింగ్‌, బీజేపీ అధ్యక్షుడు జేపీ నడ్డా కూడా పోటీలో ఉండే అవకాశం ఉంది. కాగా కాంగ్రెస్‌ సీనియర్‌ నేత శశిథరూర్‌ కూడా ఉప రాష్ట్రపతి రేసులో ఉన్నారని పెద్దయెత్తున చర్చ జరుగుతున్నది. ‘ఆపరేషన్‌ సిందూర్‌’లో భాగంగా పాక్‌కు వ్యతిరేకంగా అంతర్జాతీయ మద్దతు కూడగట్టే బృందంలో శశిథరూర్‌ను కేంద్రం ఎంపిక చేయడం తెలిసిందే.

లోతైన కారణాలు

ధన్‌ఖడ్‌ రాజీనామాకు ఆరోగ్య సమస్యలు అసలైన కారణం కాకపోవచ్చని, ఈ నిర్ణయానికి లోతైన కారణాలు ఉన్నాయని కాంగ్రెస్‌ సీనియర్‌ నేత జైరామ్‌ రమేశ్‌ అనుమానాలు వ్యక్తం చేశారు. బీఏసీ రెండో దఫా భేటీకి జేపీ నడ్డా, రిజిజు హాజరుకాకపోవడంతో ధన్‌ఖడ్‌ ఆగ్రహంతో ఉన్నారని, ఈక్రమంలోనే సమావేశాన్ని మంగళవారం మధ్యాహ్నానికి వాయిదా వేశారని గుర్తు చేశారు. అయితే, సోమవారం మధ్యాహ్నం ఒంటి గంట నుంచి సాయంత్రం 4.30 గంటల మధ్య ఏదో పెద్ద విషయమే జరిగిందని అనుమానం వ్యక్తం చేశారు. ఇదే ధన్‌ఖడ్‌ రాజీనామాకు దారితీసిందని మంగళవారం ఎక్స్‌లో పోస్ట్‌ చేశారు.