Visit:
కోల్‌కతా: ప్రతిపక్షాల కూటమి ‘ఇండియా’ బ్లాక్‌ (INDIA bloc)లో తమ పార్టీ భాగమే అని పశ్చిమ బెంగాల్‌ సీఎం మమతా బెనర్జీ తెలిపారు. ఆ కూటమి అధికారంలోకి వస్తే బయట నుంచి మద్దతు ఇస్తామని ఆమె చెప్పారు. అయితే మమతా బెనర్జీని నమ్మలేమని బెంగాల్‌ కాంగ్రెస్ అధ్యక్షుడు అధీర్ రంజన్ చౌదరి అన్నారు. ఇండియా కూటమి నుంచి ఆమె పారిపోయిందని విమర్శించారు.
గురువారం హల్దియాలో జరిగిన ఎన్నికల ర్యాలీలో మమతా బెనర్జీ మట్లాడారు. ఢిల్లీలో ‘భారత కూటమి’లో తృణమూల్ కాంగ్రెస్ భాగమేనని తెలిపారు. అయితే బెంగాల్‌లో మాత్రం కాంగ్రెస్, సీపీఎంతో తమ పార్టీకి పొత్తు లేదని స్పష్టం చేశారు. ‘బీజేపీ నిధులతో ఆజ్యం పోసిన కాంగ్రెస్, సీపీఐ(ఎం) ఓట్లను విభజించే ప్రయత్నాలను ప్రతిఘటించాలి. వారికి ఇక్కడ ఓటు వేయవద్దు. బెంగాల్‌లో పొత్తు లేదు. ఢిల్లీలో మాత్రం పొత్తు పెట్టుకున్నామని స్పష్టం చేశా. మేం అలాగే ఉంటాం’ అని ఆమె అన్నారు. భారత కూటమిని తాను స్థాపించానని, దానికి మద్దతు ఇస్తూనే ఉంటానని, ఇందులో ఎలాంటి అపార్థం లేదన్నారు.
కాగా, బెంగాల్‌ కాంగ్రెస్ అధ్యక్షుడు అధిర్ రంజన్ చౌదరి, మమతా బెనర్జీపై మండిపడ్డారు. ఆమెపై నమ్మకం లేదని అన్నారు. పొత్తు వీడటంతోపాటు ఇండియా కూటమి నుంచి పారిపోయారని విమర్శించారు. బీజేపీ వైపు కూడా ఆమె వెళ్లవచ్చని అన్నారు.
మరోవైపు బీజేపీని అధికారం నుంచి గద్దె దించే ప్రయత్నంలో ప్రతిపక్ష కూటమి పెద్దఎత్తున ముందుకు సాగిందని అధిర్ రంజన్ చౌదరి తెలిపారు. దాదాపు 70 శాతం లోక్‌సభ స్థానాలకు పోలింగ్ జరిగిన తర్వాత మమతా బెనర్జీ యూ టర్న్ తీసుకున్నారని ఆరోపించారు. బీజేపీ ఓడిపోతున్నదని, కాంగ్రెస్, ఇండియా బ్లాక్‌ అధికారంలోకి వస్తున్నాయన్నది గ్రహించిన ఆమె ఇలా మాట్లాడుతున్నారని విమర్శించారు.
