ఏప్రిల్‌ 1 నుంచి వచ్చే మార్పులివే!

ఏప్రిల్‌ 1 నుంచి కొత్త ఆర్థిక సంవత్సరం 2026-27 మొదలుకాబోతున్నది. పాన్‌ కార్డ్‌ దరఖాస్తు నుంచి రైల్‌ టికెట్‌ క్యాన్సిలేషన్‌ వరకు వివిధ అంశాల్లో కీలక మార్పులు రాబోతున్నాయి.

• అమల్లోకి కొత్త ఐటీ చట్టం
• పాన్‌ దరఖాస్తు, రైలు టికెట్‌ నిబంధనల్లోనూ మార్పులు

న్యూఢిల్లీ: ఏప్రిల్‌ 1 నుంచి కొత్త ఆర్థిక సంవత్సరం 2026-27 మొదలుకాబోతున్నది. పాన్‌ కార్డ్‌ దరఖాస్తు నుంచి రైల్‌ టికెట్‌ క్యాన్సిలేషన్‌ వరకు వివిధ అంశాల్లో కీలక మార్పులు రాబోతున్నాయి. అవేంటో చూద్దాం..

కొత్త ఆదాయ చట్టం: ఐటీ యాక్ట్‌, 1961 స్థానంలో కొత్త చట్టం ఏప్రిల్‌ 1 నుంచి ఇది అమల్లోకి రానుంది.

• పాన్‌ రూల్స్‌: ఇంతకుముందు పాన్‌కార్డు పొందాలంటే ఆధార్‌ సమర్పిస్తే సరిపోయేది. ఇకపై ఓటర్‌ ఐడీ, పాస్‌పోర్ట్‌, బర్త్‌ సర్టిఫికెట్‌ వంటి అదనపు పత్రాలు సమర్పించాల్సి ఉంటుంది.
• రూ.10 లక్షలు దాటితే: ఒక ఆర్థిక సంవత్సరంలో బ్యాంక్‌ ఖాతాలో రూ.10 లక్షలు లేదా అంతకంటే ఎక్కువ నగదు ఒకేసారి లేదా విడతల వారీగా జమ చేసినా, ఉపసంహరించుకున్నా పాన్‌ వివరాలు ఇకపై ఇవ్వాల్సి ఉంటుంది.
• క్యాన్సిలేషన్‌ నిబంధనలు: రైల్వే టికెట్‌కు సంబంధించి క్యాన్సిలేషన్‌ నిబంధనలు మారాయి. రైలు ప్రయాణానికి 8 గంటల లోపు టికెట్‌ రద్దు చేస్తే ఎలాంటి రిఫండ్‌ రాదు. ఇంతకుముందు ఇది 4 గంటలుగా ఉండేది.
• హెచ్‌ఆర్‌ఏ 50 శాతం: ఇంటి అద్దె భత్యం కింద మూల వేతనంలో 50 శాతం పన్ను మినహాయింపు పొందే నగరాలను కేంద్రం 4 నుంచి 8కి పెంచింది. ఇదివరకు ఢిల్లీ, ముంబై, కోల్‌కతా, చెన్నైకి ఈ ప్రయోజనం పరిమితం కాగా, తాజాగా హైదరాబాద్‌, పుణె, అహ్మదాబాద్‌, బెంగళూరుకూ విస్తరించింది.
• ఎల్పీజీ ధరల సవరణ: ఏప్రిల్‌ 1 నుంచి ఎల్‌పీజీ, విమాన ఇంధన ధరలను కేంద్రం మరోసారి సవరించే అవకాశముంది.