పాక్‌ కంటెంట్‌పై నిషేధం.. ఉత్తర్వులు జారీచేసిన కేంద్రం

భారత్‌-పాకిస్థాన్‌ మధ్య తీవ్ర ఉద్రిక్తతలు నెలకొన్న వేళ కేంద్రం మరో కీలక నిర్ణయం తీసుకుంది. పాకిస్థాన్‌ కంటెంట్‌ను, ఆ దేశ ప్రేరేపిత కంటెంట్‌ను ఓటీటీల్లో నిషేధిస్తూ గురువారం సమాచార, ప్రసార మంత్రిత్వ శాఖ ఉత్తర్వులు జారీచేసింది. నిషేధం తక్షణం అమల్లోకి వస్తుందని కేంద్రం తెలిపింది.

హైదరాబాద్‌, మే 8 (నమస్తే తెలంగాణ): భారత్‌-పాకిస్థాన్‌ మధ్య తీవ్ర ఉద్రిక్తతలు నెలకొన్న వేళ కేంద్రం మరో కీలక నిర్ణయం తీసుకుంది. పాకిస్థాన్‌ కంటెంట్‌ను, ఆ దేశ ప్రేరేపిత కంటెంట్‌ను ఓటీటీల్లో నిషేధిస్తూ గురువారం సమాచార, ప్రసార మంత్రిత్వ శాఖ ఉత్తర్వులు జారీచేసింది. నిషేధం తక్షణం అమల్లోకి వస్తుందని కేంద్రం తెలిపింది. ఈ ఉత్తర్వుల్లో పలు కీలక అంశాలను కేంద్రం ప్రస్తావించింది.

ఈ కంటెంట్‌లపై నిషేధం..

• భారత సార్వభౌమాధికారానికి, సమగ్రతకు భంగం కలిగించే ఏ విధమైన కంటెంట్‌ను కూడా ఉపేక్షించవద్దని నిర్ణయించింది.
• దేశ భద్రతకు సవాల్‌ విసరడంతోపాటు బెదిరింపు ధోరణితో ఉండే కంటెంట్‌పై నిషేధం.
• విదేశాలతో మన దేశ స్నేహ సంబంధాలకు హాని కలిగించేలా ఉండే విషయాలు.
• హింసను ప్రేరేపించి ప్రజల్లో శాంతికి భంగం కలిగించే ఏ విధమైన కంటెంట్‌ ప్రసారాలు నిలిపివేత.
• ఐకమత్యాన్ని దెబ్బతీసేలా ఉండే కంటెంట్‌.
• భారత్‌పై ఉగ్రదాడుల్లో పాకిస్థాన్‌ యాక్టర్ల పరోక్ష ప్రమేయం ఉండటం వల్ల అలాంటి కంటెంట్‌ను కూడా ప్రసారం చేయవద్దని కేంద్రప్రభుత్వం ఆదేశించింది.
• జాతీయ భద్రతని దృష్టిలో ఉంచుకుని పాకిస్థాన్‌ మూలాలున్న ఓటీటీ కంటెంట్‌, ఓటీటీ ప్లాట్‌ఫామ్‌లు, మీడియా స్ట్రీమింగ్‌ ప్లాట్‌ఫామ్‌లు, మధ్యవర్తిత్వం ద్వారా ప్రసారమయ్యే కంటెంట్‌ నిలిపివేత. పాకిస్థాన్‌ వెబ్‌ సిరీస్‌లు, సినిమాలు, పాటలు, పాడ్‌క్యాస్ట్‌లు సహా మీడియా కంటెంట్‌ అందుబాటులో ఉంచకపోవడం. సబ్‌స్క్రిప్షన్‌, సహా ఇతర మార్గాల ద్వారా కంటెంట్‌ పొందుతున్నవారికీ ఇందులో మినహాయింపు లేదు. ఓటీటీ వేదికలు పాకిస్థాన్‌ కంటెంట్‌ను భారత్‌లో స్ట్రీమింగ్‌ చేయడానికి వీల్లేదు.