Mistake Surgery | చిన్నారికి చేతి వేలి సర్జరీ బదులు.. నాలుకకు ఆపరేషన్‌ చేసిన డాక్టర్లు

Mistake Surgery | బాలిక చేతి వేలికి సర్జరీ చేయాల్సి ఉంది. అయితే డాక్టర్లు ఆ చిన్నారి నాలుకకు ఆపరేషన్‌ చేశారు. ఈ విషయం తెలుసుకున్న ఆ బాలిక పేరెంట్స్ ఆందోళన చెందారు.

తిరువనంతపురం: బాలిక చేతి వేలికి సర్జరీ చేయాల్సి ఉంది. అయితే డాక్టర్లు ఆ చిన్నారి నాలుకకు ఆపరేషన్‌ చేశారు. ఈ విషయం తెలుసుకున్న ఆ బాలిక పేరెంట్స్ ఆందోళన చెందారు. (Mistake Surgery) కేరళలోని కోజికోడ్‌లో ఈ సంఘటన జరిగింది. నాలుగేళ్ల బాలిక చేతికి ఆరు వేళ్లు ఉన్నాయి. కోజికోడ్‌ మెడికల్‌ కాలేజీ ఆసుపత్రి వైద్యులు ఆ చిన్నారిని పరిశీలించారు. చిన్న సర్జరీ ద్వారా ఆరో వేలిని తొలగించవచ్చని ఆ బాలిక పేరెంట్స్‌కు చెప్పారు. దీంతో వారు దీనికి అంగీకరించారు.

కాగా, గురువారం ఆపరేషన్‌ థియేటర్‌ నుంచి వీల్‌చైయిర్‌లో తీసుకువచ్చిన చిన్నారి నోటికి ప్లాస్టర్‌ వేసి ఉంది. అయితే ఆ బాలిక చేతికి ఆరో వేలు ఇంకా ఉంది. దీంతో పేరెంట్స్‌, కుటుంబ సభ్యులు నర్సును దీని గురించి ఆరా తీశారు. నాలుకకు కూడా సమస్య ఉండటంతో డాక్టర్లు ఆపరేషన్ చేశారని ఆమె చెప్పింది. ఇది విని వారు షాక్‌ అయ్యారు.

మరోవైపు జరిగిన పొరపాటు తెలుసుకున్న డాక్టర్లు వారికి క్షమాపణలు చెప్పారు. బాలిక చేతికి ఉన్న ఆరో వేలిని సర్జరీ ద్వారా తొలగిస్తామని అన్నారు. ఆ చిన్నారిని తిరిగి ఆపరేషన్‌ థియేటర్‌లోకి తీసుకెళ్లారు. దీంతో ఆ పాప పేరెంట్స్‌, కుటుంబ సభ్యులు ఆందోళన చెందారు.