200 కోట్ల డోసులు

• కొవిడ్‌ వ్యాక్సినేషన్‌లో దేశం రికార్డు

న్యూఢిల్లీ, జూలై 17: కరోనా వ్యాక్సిన్‌ పంపిణీలో భారత్‌ మరో మైలురాయిని అధిగమించింది. ఆదివారం నాటికి దేశవ్యాప్తంగా 200 కోట్లకుపైగా డోసులను పంపిణీచేసి సరికొత్త అధ్యాయాన్ని లిఖించింది. దేశంలోని మొత్తం వయోజనుల్లో 98% మంది కనీసం ఒక్క డోసు, 90% మంది పూర్తి స్థాయిలో వ్యాక్సిన్‌ వేయించుకొన్నట్టు ప్రభుత్వం వెల్లడించింది.

ఆరోగ్య శాఖ తాజా గణాంకాల ప్రకారం..

• 15 నుంచి 18 ఏండ్లలోపువారిలో 82% మంది మొదటి డోసు, 68% మంది రెండు డోసులు తీసుకొన్నారు.
• 12 నుంచి 14 ఏండ్లలోపువారిలో 81% మంది మొదటి డోసు, 56% మంది రెండు డోసులు తీసుకొన్నారు.
• గ్రామీణ ప్రాంతాల్లోని టీకా పంపిణీ కేంద్రాల్లో 71%, పట్టణ ప్రాంతాల్లోని కేంద్రాల్లో 29% వ్యాక్సినేషన్‌ జరిగింది.
• ఇప్పటివరకు పంపిణీ చేసిన మొత్తం డోసుల్లో పురుషులు 51.5%, మహిళలు 48.9%, ఇతరులు 0.02% డోసులు వేయించుకొన్నారు.
• తెలంగాణ, ఏపీ, హిమాచల్‌, చండీగఢ్‌, గోవా, అండమాన్‌, లక్షద్వీప్‌లో 12 ఏండ్ల వయసు దాటినవారు పూర్తిస్థాయిలో వ్యాక్సిన్‌ తీసుకొన్నారు.