మీ కాల్పులతో రక్తమోడుతున్న న్యాయవ్యవస్థ!

ఎన్సీఈఆర్టీ పుస్తకంలోని ‘న్యాయవ్యవస్థలో అవినీతి’ అంశం దుమారం రేపుతున్నది. ఈ అంశాన్ని సుమోటోగా స్వీకరించిన సుప్రీంకోర్టు గురువారం విచారణను ప్రారంభించి ఘాటు వ్యాఖ్యలు చేసింది. న్యాయవ్యవస్థ ప్రతిష్ఠను దెబ్బతీయడానికి పన్నిన కుట్రగా దీన్ని అభివర్ణించింది.

• వివాదాస్పద పాఠ్యాంశం కేసులో సుప్రీం తీవ్ర వ్యాఖ్యలు
• ముమ్మాటికీ ఇది న్యాయవ్యవస్థ ప్రతిష్ఠను దెబ్బతీసే కుట్రే
• జవాబుదారీతనం దొరికేంత వరకూ దీన్ని వదిలిపెట్టబోం
• పుస్తక ముద్రణపై కోర్టు నిషేధం.. ఎన్సీఈఆర్టీకి నోటీసులు
• కోర్టుకు బేషరతు క్షమాపణలు తెలియజేసిన కేంద్రప్రభుత్వం
• బాధ్యులపై చర్యలు తీసుకొంటామన్న మంత్రి ప్రధాన్‌

స్పెషల్‌ టాస్క్‌ బ్యూరో హైదరాబాద్‌, ఫిబ్రవరి 26 (నమస్తే తెలంగాణ) : ఎన్సీఈఆర్టీ పుస్తకంలోని ‘న్యాయవ్యవస్థలో అవినీతి’ అంశం దుమారం రేపుతున్నది. ఈ అంశాన్ని సుమోటోగా స్వీకరించిన సుప్రీంకోర్టు గురువారం విచారణను ప్రారంభించి ఘాటు వ్యాఖ్యలు చేసింది. న్యాయవ్యవస్థ ప్రతిష్ఠను దెబ్బతీయడానికి పన్నిన కుట్రగా దీన్ని అభివర్ణించింది. బాధ్యులు తుపాకీతో కాల్చడంతో న్యాయవ్యవస్థ రక్తమోడు తున్న దని ఆవేదన వ్యక్తం చేసింది. దీనిపై స్పందించిన కేంద్రం విచారం వ్యక్తం చేస్తూ కోర్టుకు బేషరతుగా క్షమాపణలు చెప్పింది. బాధ్యులపై చర్యలు తీసుకొంటామని హామీనిచ్చింది.

అసలేం జరిగిందంటే?

నేషనల్‌ కౌన్సిల్‌ ఆఫ్‌ ఎడ్యుకేషన్‌ రిసెర్చ్‌ అండ్‌ ట్రైనింగ్‌ (ఎన్సీఈఆర్టీ) 8వ తరగతి సోషల్‌ సైన్స్‌ పుస్తకంలోని నాలుగో చాప్టర్‌లో ‘ది రోల్‌ ఆఫ్‌ జ్యుడీషియరీ ఇన్‌ అవర్‌ సొసైటీ, యాజ్‌ ఏ గ్రేవ్‌ మ్యాటర్‌’ పేరిట ‘న్యాయవ్యవస్థలో అవినీతి’ జరుగుతున్నట్టు ఓ పాఠాన్ని ముద్రించింది. న్యాయవ్యవస్థలో వివిధ స్థాయిల్లో అవినీతి పేరుకుపోయిందని, ఇది వెనుకబడిన వారికి న్యాయాన్ని దక్కకుండా చేస్తున్నదని పేర్కొంటూ ఆ పాఠ్యాంశం సాగింది. సదరు పుస్తకంలో న్యాయవ్యవస్థపై అభ్యంతరకర వ్యాఖ్యలు ఉన్నాయని సీనియర్‌ న్యాయవాదులు కపిల్‌ సిబల్‌, అభిషేక్‌ సింఘ్వీ.. సీజేఐ జస్టిస్‌ సూర్యకాంత్‌ నేతృత్వంలోని త్రిసభ్య ధర్మాసనం దృష్టికి తీసుకెళ్లారు. బుధవారం దీనిపై స్పందించిన అత్యున్నత న్యాయస్థానం.. న్యాయవ్యవస్థను అప్రతిష్ఠపాలు చేసే ఏ చర్యనూ సహించబోమని తేల్చి చెప్పింది. ఈ కేసును సుమోటోగా స్వీకరించి గురువారం విచారణను కొనసాగించింది.

సుప్రీంకోర్టు ఘాటు వ్యాఖ్యలు..

• న్యాయవ్యవస్థను నెగెటివ్‌ కోణంలో చూయించడానికి ఎన్సీఈఆర్టీ ఒక పూర్తి అధ్యాయాన్ని కేటాయించింది. కానీ, కోర్టుల విశిష్ట చరిత్రను మాత్రం వదిలేసింది.
• మీరు (ఎన్సీఈఆర్టీ) ప్రచురించిన విషయాలతో మేం చాలా బాధపడ్డాం. అతినీతి అంటూ న్యాయవ్యవస్థ నెగెటివ్‌ కోణాన్ని చూయించిన మీరు.. పౌర హక్కులు, పేదవారికి న్యాయం, ఉచితంగా న్యాయ సాయం, ప్రాథమిక హక్కుల పరిరక్షణ వంటి కీలక విషయాల్లో మా పాత్రను ఎందుకు ప్రస్తావించలేదు? మీరిచ్చిన పక్షపాతపూరిత సందేశంతో విద్యార్థులు ఏం తెలుసుకొంటారు?
• (ఎన్సీఈఆర్టీని ఉద్దేశిస్తూ..) వాళ్లు కాల్చిన తుపాకీతో న్యాయవ్యవస్థ రక్తమోడుతున్నది. న్యాయవ్యవస్థ అధికారాన్ని అణచివేసేలా, కోర్టుల గౌరవాన్ని కించపర్చేలా ఉద్దేశపూర్వకంగా దీన్ని చేసినట్టు కనిపిస్తున్నది.
• దీన్ని మేం పట్టించుకోకుండా ఇలాగే వదిలేస్తే.. ప్రజలు, యువత మనసుల్లో న్యాయవ్యవస్థ పవిత్రత దెబ్బతినే ప్రమాదం ఉన్నది. ఈ పాఠం ద్వారా విద్యార్థులకు, టీచర్లకు, తల్లిదండ్రులకు ఏ సందేశం ఇస్తున్నారు?
• దీని వెనుక ఎవరు ఉన్నారో మేం తెలుసుకోవాలనుకొంటున్నాం. జవాబుదారీతనం దొరికే వరకూ ఈ వ్యవహారాన్ని, బాధ్యులను మేం వదిలిపెట్టే ప్రసక్తే లేదు.
• న్యాయవ్యవస్థ ప్రతిష్ఠను కించపరిచేలా ఉన్న ఈ వివాదాస్పద పుస్తక ముద్రణ, సరఫరాను నిషేధిస్తున్నాం. ఈ నిషేధాన్ని ఉల్లంఘిస్తే, కఠిన చర్యలకు వెనుకాడబోం.
• పబ్లికేషన్‌ను నిలిపేశామన్న కేంద్రం వాదనపై స్పందిస్తూ.. బుక్‌ పబ్లికేషన్‌ను నిలిపేశామంటున్నారు. అయితే, మార్కెట్‌లో ఈ పుస్తక ప్రతులు ఇంకా దొరుకుతున్నాయి. సోషల్‌మీడియాలో డిజిటల్‌ వెర్షన్‌ అందుబాటులో ఉంది. అంతెందుకు, పుస్తక ప్రతి ఇప్పుడు మా దగ్గర కూడా ఉంది.
• ఆన్‌లైన్‌లో ఉన్న డిజిటల్‌ ప్రతులను తొలగించే బాధ్యత ప్రభుత్వానిదే. ఆ చర్యలను వెంటనే చేపట్టండి.
• ఈ కేసు విషయమై ఎన్సీఈఆర్టీ డైరెక్టర్‌, స్కూల్‌ ఎడ్యుకేషన్‌ సెక్రటరీకి షోకాజ్‌ నోటీసులు ఇస్తున్నాం. బాధ్యులపై ఎందుకు చర్యలు తీసుకోకూడదో వివరించాలి.

బాధ్యులపై చర్యలు : కేంద్రం

పుస్తకం దుమారం నేపథ్యంలో కేంద్రం స్పందించింది. న్యాయవ్యవస్థను అగౌరపర్చాలనే ఉద్దేశం ప్రభుత్వానికి లేదని కేంద్ర విద్యామంత్రి ధర్మేంద్ర ప్రధాన్‌ అన్నారు. ఈ వ్యవహారాన్ని తీవ్రంగా పరిగణిస్తున్నామన్న ఆయన.. ఎన్సీఈఆర్టీపై విచారణ చేపట్టి, బాధ్యులపై చర్యలు తీసుకొంటామన్నారు. కాగా, దుమారం నేపథ్యంలో ఇప్పటికే పుస్తకాల అమ్మకాలను నిలిపేసిన ఎన్సీఈఆర్టీ.. అసంబద్ధ అంశాలను ప్రచురించినందుకు క్షమాపణలు తెలిపింది. నిర్ణయం తీసుకోవడంలో పొరపాటు కారణంగానే ఇది జరిగినట్టు పేర్కొన్నది.