ఆకుచాటు అల్లుకున్న గుండె గూటిలో
నోళ్లు తెరచి
ఆకలి వొత్తులై మండుతున్న పిల్ల నాలుకలపై
గింజ గింజా మెత్తగా అద్దు అనురాగం
రెక్కలిరిగే
కన్ను గురిపెడుతున్న దుష్టశక్తుల
వాసన పసిగడుతూ
ఎగిరే పిచ్చుక చూపు
శత్రువు కంటపడని
తావొకటి దొరకబట్టుకొని
కడుపు పంట పదిలం చేసుకునే తల్లి చేప
చీరకొంగు గప్పి బిడ్డను వొడిలో దాచినట్టు
పిల్లల్ని
నోటిలో దాచుకున్న మొప్పలగూడు
వల విసురు కుట్రలకు దూరంగా
అణువంతైనా
భావితరం రహస్యపు జాడ
చిక్కుపడని ఈదులాట
గోడమీది బల్లి కూడా
బిడ్డ ఎదిగి
పగిలిన గుడ్డుపెంకులు నేలరాలు వరకూ
అది ఇల్లు కట్టిన గుట్టు
ఇంతైనా అగుపడని కనికట్టు విద్య
నేనూ నా పిల్లలను
తీరం వెతుకు నావపాట
పూవయినా పిందయినా వొడిసి పట్టుకొని
గాలి వానకు బెదరని
దేవతలు మెచ్చిన చెట్టులాంటి
అమ్మ ప్రేమకు
పాదాభివందనం.
గజ్జెల రామకృష్ణ
8977412795