నిర్లక్ష్యంతో బ్లాక్‌ఫంగస్‌ ప్రాణాంతకం

అసలే కరోనాతో దేశం అతలాకుతలం అవుతుంటే.. బ్లాక్‌ఫంగస్‌ అనే మరో వ్యాధి మరింత భయభ్రాంతులను చేస్తున్నది. ముఖ్యంగా, కరోనా చికిత్స పొంది దాని నుంచి కోలుకున్నవారిలో, లేదా, కరోనాకు చికిత్స తీసుకుంటున్న వారిలో ఈ కేసులు పెరుగుతున్నాయి. ఈ నేపథ్యంలో భారతీయ వైద్య పరిశోధన మండలి (ఐసీఎంఆర్‌) బ్లాక్‌ఫంగస్‌కు సంబంధించిన లక్షణాలు, రాకుండా తీసుకోవాల్సిన జాగ్రత్తలు తదితర అంశాలతో ఒక గ్రాఫిక్‌ను రూపొందించి విడుదల చేసింది. దాంట్లో ఉన్న వివరాలు..

ఏదైనా తీవ్ర అనారోగ్య సమస్యలతో చికిత్స పొందుతూ, ఔషధాలు తీసుకుంటున్నవారిలో రోగనిరోధక వ్యవస్థ బలహీనపడుతుంది. దీనివల్ల ప్రమాదకరమైన సూక్ష్మజీవుల నుంచి వారికి రక్షణ ఉండదు. ఈ విధంగా రోగనిరోధక వ్యవస్థ బలహీనపడినవారిపై మ్యూకోర్‌ మైకోసిస్‌ (బ్లాక్‌ఫంగస్‌) క్రిములు దాడి చేస్తాయి.

లక్షణాలు..
కళ్ల చుట్టూ, ముక్కు చుట్టూ ఎర్రగా కావటం, నొప్పి జ్వరం, తలనొప్పి, దగ్గు, సమస్యలు రక్తపు వాంతులు , మానసికస్థితిలో బ్యాలెన్స్‌ కోల్పోవటం

దారి తీసే కారణాలు
నియంత్రణలో లేని మధుమేహం, స్టెరాయిడ్ల వాడకం వల్ల రోగనిరోధకశక్తి క్షీణించటం, ఐసీయూలో దీర్ఘకాలంపాటు చికిత్స తీసుకుంటూ ఉండటం, అవయవ మార్పిడి తర్వాత దశ (పోస్ట్‌ ట్రాన్స్‌ప్లాంట్‌), క్యాన్సర్‌, వొరికొనజోల్‌ చికిత్స

రాకుండా కాపాడుకోవటం ఎలా?

• దుమ్ము ధూళి ఉన్న ప్రదేశాలకు వెళ్లినప్పుడు ముఖానికి మాస్కు ధరించటం
• తోటపని వంటి మట్టి పనులు చేస్తున్నప్పుడు కాళ్లకు బూట్లు, చేతులకు గ్లోవ్స్‌, పొడవాటి చేతులున్న షర్టు, పొడవాటి ప్యాంటు ధరించాలి.
• వ్యక్తిగత శుభ్రతను పాటించాలి.

ఎప్పుడు అనుమానించాలి?

• ముక్కుదిబ్బడ, ముక్కులోంచి చీమిడి నల్లగా కారటం. రక్తం కారటం. చెంపలున్న ఎముకపై నొప్పి.
• ముఖానికి ఒకవైపు నొప్పి. మొద్దుబారటం, వాపు.
• ముక్కుపైన చర్మ నల్లగా మారుతుండటం.
• పంటినొప్పి, పళ్లు కదలటం.
• చూపు మసకబారటం, రెండుగా కనిపించటం, కళ్లల్లో నొప్పి
• జ్వరం, చర్మంపై దద్దుర్లు, చర్మం ఎర్రగా మారటం, రక్తం గడ్డకట్టటం, రక్తం సరఫరాలో ఆటంకాల వల్ల కణాలు నశించటం
• ఛాతీలో నొప్పి, శ్వాసలో సమస్యలు

ఏం చేయాలి?

• తీవ్రంగా మధుమేహం ఉంటే దానిని నియంత్రించుకోవాలి.
• కరోనా నుంచి బయటపడిన తర్వాత రక్తంలో గ్లూకోజ్‌ స్థాయిని ఎప్పటికప్పుడు చూసుకుంటూ ఉండాలి.
• స్టెరాయిడ్లను తగిన సమయంలో, తగిన మోతాదులో మాత్రమే తీస్కోవాలి.
• ఆక్సిజన్‌ చికిత్స అందిస్తున్నప్పుడు హ్యూమిడిఫయర్‌లలో శుద్ధమైన, స్టెరైల్‌ నీటినే వాడాలి. సాధారణ నీటిని ఎంతమాత్రమూ వాడొద్దు.
• అవసరం మేర యాంటీబయాటిక్‌లను, యాంటీఫంగల్‌ ఔషధాలను ఉపయోగించాలి.

ఏం చేయొద్దు?

• హెచ్చరిక సంకేతాలను, లక్షణాలను నిర్లక్ష్యం చేయవద్దు
• కేఓహెచ్‌ స్టెయినింగ్‌, మైక్రోస్కొపీ, కల్చర్‌, మాల్డీటొఫ్‌ వంటి పరీక్షలను చేయించుకోవటానికి వెనుకాడవద్దు.
• చికిత్సను తీసుకోవటంలో జాప్యం చేసి కీలకమైన సమయాన్ని వృథా చేయవద్దు.