Digital Arrests | డిజిటల్‌ అరెస్ట్‌ మోసాలను అరికట్టేలా కేంద్రం నిబంధనలు.. సుప్రీంకోర్టుకు నివేదిక

Digital Arrests | దేశంలో గడిచిన కొన్ని నెలలుగా ‘డిజిటల్‌ అరెస్ట్‌ (Digital Arrest)’ మోసాలు పెరిగి పెనుముప్పుగా మారుతున్నాయి. సామాన్యుల నుంచి ప్రముఖుల వరకు అనేకమంది ఈ మోసాల బారిన పడుతుండటంపై సుప్రీంకోర్టు (Supreme Court) కూడా ఆందోళన వ్యక్తంచేసింది. ఈ నేపథ్యంలోనే డిజిటల్‌ అరెస్ట్‌ స్కామ్‌లను అరికట్టేలా కేంద్రం (Union Govt) పలు నిబంధనలను రూపొందించింది.

Digital Arrests : దేశంలో గడిచిన కొన్ని నెలలుగా ‘డిజిటల్‌ అరెస్ట్‌ (Digital Arrest)’ మోసాలు పెరిగి పెనుముప్పుగా మారుతున్నాయి. సామాన్యుల నుంచి ప్రముఖుల వరకు అనేకమంది ఈ మోసాల బారిన పడుతుండటంపై సుప్రీంకోర్టు (Supreme Court) కూడా ఆందోళన వ్యక్తంచేసింది. ఈ నేపథ్యంలోనే డిజిటల్‌ అరెస్ట్‌ స్కామ్‌లను అరికట్టేలా కేంద్రం (Union Govt) పలు నిబంధనలను రూపొందించింది. ఈ నిబంధనలకు సంబంధించిన నివేదికను తాజాగా సుప్రీంకోర్టుకు సమర్పించింది. ఈ డిజిటల్‌ అరెస్ట్‌ మోసాల కట్టడికి బయోమెట్రిక్‌ సిమ్‌ వెరిఫికేషన్‌ (Biometric SIM verification), అనుమానాస్పద బ్యాంకు ఖాతాల నిలిపివేత వంటి ప్రతిపాదనలను కేంద్రం తన నివేదికలో పేర్కొన్నది.

వివిధ రంగాల నిపుణులు, ప్రభుత్వ అధికారులతో సంప్రదింపులు జరిపిన అనంతరం కేంద్రం ఈ నివేదికను రూపొందించింది. తమ నివేదికను పరిశీలించిన అనంతరం ప్రతిపాదనల అమలు కోసం టెలీకమ్యూనికేషన్‌ విభాగం, ఎలక్ట్రానిక్స్‌ అండ్‌ ఇన్‌ఫర్మేషన్ టెక్నాలజీ మంత్రిత్వశాఖ, ఆర్‌బీఐ అధికారులకు ఆదేశాలు జారీచేయాలని కేంద్రం సుప్రీంకోర్టును కోరింది. కేంద్రం తరఫున అటార్నీ జనరల్‌ ఈ నివేదికను న్యాయస్థానానికి సమర్పించారు. ఆ నివేదికలోని సిఫారసులను సర్వోన్నత న్యాయస్థానం పరిశీలించి సంబంధిత విభాగాలకు ఆదేశాలు ఇవ్వనుంది.

కేంద్ర ప్రభుత్వ సిఫారసులు..

• సిమ్‌ కార్డు జారీ చేసే సమయంలో టెలీకమ్యూనికేషన్‌ (యూజర్‌ ఐడెంటిఫికేషన్‌) రూల్స్‌, బయోమెట్రిక్‌ ఐడెంటిటీ వెరిఫికేషన్‌ వ్యవస్థను కఠినంగా అమలు చేయాలి.
• టెలికామ్ సర్వీస్‌ ప్రొవైడర్లు నిబంధనలను కచ్చితంగా పాటించేలా చర్యలు తీసుకోవాలి.
• సిమ్‌ యాక్టివేషన్‌ చేసే పాయింట్‌ ఆఫ్‌ సేల్స్‌ విక్రయదారులను ఎప్పటికప్పుడు వెరిఫికేషన్‌ చేయాలి. కేసుల దర్యాప్తు సమయంలో సబ్‌స్క్రైబర్‌ యాక్టివేషన్‌ వివరాలు అందించాలని పీఓఎస్‌, టెలికామ్‌ ఆపరేటర్లను ఆదేశించాలి.
• డిజిటల్ అరెస్ట్ స్కామ్‌లతో సహా సైబర్ క్రైమ్ నేరాలకు ఉపయోగించే మోసపూరిత సిమ్ కార్డులను వీలైనంత త్వరగా బ్లాక్‌ చేయాలి.
• వాట్సప్ వంటి యాప్‌లు సిమ్‌ బైండింగ్‌ మెకానిజంను కఠినంగా అమలుచేయాలి. ఎక్కువసేపు సాగే మోసపూరిత కాల్స్‌ను గుర్తించేలా యాప్‌లో అధునాతన ఫీచర్లను తీసుకురావాలి.
• మోసాలకు ఉపయోగించిన డిజిటల్‌ డివైజ్‌ల ఐడీలను గుర్తించి వెంటనే బ్లాక్‌ చేయాలి. అప్పుడే ఆ డివైజ్‌ నుంచి వేరే ఖాతాతో నిందితులు మోసాలకు పాల్పడే అవకాశాన్ని నిరోధించవచ్చు.
• సైబర్‌ నేరాలకు ఉపయోగించే అనుమానాస్పద బ్యాంకు ఖాతాల నుంచి డబ్బు డెబిట్‌ కాకుండా తాత్కాలికంగా వాటిని నిలిపివేయాలి. అందుకోసం ఆర్‌బీఐ స్టాండర్డ్‌ ఆపరేటింగ్ ప్రొసీజర్‌ను రూపొందించేలా ఆదేశాలు ఇవ్వాలి.