Delhi Polls | ఢిల్లీ పీఠం కోసం.. ఉచితాలతో గాలం.. ఓట్ల వేటలో పార్టీలు..!

ఢిల్లీ అసెంబ్లీ ఎన్నికల్లో గెలుపు కోసం అధికార ఆమ్‌ ఆద్మీ పార్టీ, బీజేపీ, కాంగ్రెస్‌ శాయశక్తులా కృషి చేస్తున్నాయి. మూడోసారి అధికారాన్ని దక్కించుకునేందుకు ఆప్‌ ప్రయత్నిస్తుండగా, రాజధానిలో ఆమ్‌ ఆద్మీ పార్టీకి చెక్‌ పెట్టి అధికారాన్ని కైవసం చేసుకోవాలని కమలం పార్టీ, కాంగ్రెస్‌ శ్రమిస్తున్నాయి. ఓటర్లను ఆకట్టుకునేందుకు మూడు పార్టీలూ భారీగా హామీలు ప్రకటిస్తున్నాయి.

• ఢిల్లీ అసెంబ్లీ ఎన్నికల్లో ఆప్‌, బీజేపీ, కాంగ్రెస్‌ పోటాపోటీ
• పాత వాటికి అదనంగా కేజ్రీవాల్‌ పార్టీ కొత్త హామీలు
• రేవ్‌డీలకు వ్యతిరేకమంటూనే కమలం పార్టీ వరాల జల్లు
• రెండు పార్టీలకు పోటీగా కాంగ్రెస్‌ ఉచిత హామీలు

న్యూఢిల్లీ, జనవరి 21: ఢిల్లీ అసెంబ్లీ ఎన్నికల్లో గెలుపు కోసం అధికార ఆమ్‌ ఆద్మీ పార్టీ, బీజేపీ, కాంగ్రెస్‌ శాయశక్తులా కృషి చేస్తున్నాయి. మూడోసారి అధికారాన్ని దక్కించుకునేందుకు ఆప్‌ ప్రయత్నిస్తుండగా, రాజధానిలో ఆమ్‌ ఆద్మీ పార్టీకి చెక్‌ పెట్టి అధికారాన్ని కైవసం చేసుకోవాలని కమలం పార్టీ, కాంగ్రెస్‌ శ్రమిస్తున్నాయి. ఓటర్లను ఆకట్టుకునేందుకు మూడు పార్టీలూ భారీగా హామీలు ప్రకటిస్తున్నాయి. పాత పథకాలను కొనసాగిస్తూ ఇంకొన్ని కొత్త పథకాలను అమలు చేస్తామని ఆప్‌ ఢిల్లీ ఓటర్లకు హామీలు ఇస్తున్నది. సంక్షేమ పథకాలతో ఢిల్లీవాసుల్లో ఆదరణ పొందిన కేజ్రీవాల్‌కు పథకాలతోనే చెక్‌ పెట్టేందుకు బీజేపీ ప్రయత్నిస్తున్నది.

గతంలో అనేకసార్లు ఉచిత పథకాలను విమర్శిస్తూ వచ్చిన ఆ పార్టీ ఢిల్లీలో మాత్రం అనేక హామీలను గుప్పిస్తున్నది. ఇప్పటికే ఒక మ్యానిఫెస్టోను విడుదల చేసిన కమలం పార్టీ.. మంగళవారం రెండో మ్యానిఫెస్టోను విడుదల చేసింది. ప్రస్తుతం అమలులో ఉన్న పథకాలనూ కొనసాగిస్తామని హామీ ఇచ్చింది. ఈ రెండు పార్టీలకు ఏమాత్రం తగ్గకుండా కాంగ్రెస్‌ హామీలు ఇస్తున్నది. ఇప్పటికే ఎన్నికల్లో గెలిచేందుకు తెలంగాణ, కర్ణాటక, హిమాచల్‌ ప్రదేశ్‌లో ఆ పార్టీ ఇచ్చిన ఉచితాల హామీలు రాష్ర్టాలను ఆర్థికంగా దివాలా తీయిస్తున్నా కాంగ్రెస్‌ మాత్రం వెనక్కు తగ్గలేదు.

బీజేపీ హామీలు

• మహిళలకు నెలకు రూ.2,500
• పీజీ వరకు ఉచిత విద్య, పోటీ పరీక్షల అభ్యర్థులకు రూ.15 వేలు
• గర్భిణులకు రూ.21 వేలు, ఆరు పోషకాహార కిట్లు
• రూ.500 కే గ్యాస్‌ సిలిండర్‌, హోలీ, దీపావళికి ఉచిత సిలిండర్లు
• 60-70 మధ్య వయసు వారికి రూ.2,500 పింఛను
• 70ఏండ్లు పైబడిన వారికి, వితంతువులు, దివ్యాంగులకు రూ.3,000 పింఛను
• ఆటో, ట్యాక్సీ డ్రైవర్లకు ప్రమాద, వాహన బీమా, వారి పిల్లలకు స్కాలర్‌షిప్‌లు

ఆమ్‌ ఆద్మీ హామీలు

• మహిళలకు నెలకు రూ.2,100
• 60 ఏండ్లు పైబడిన వారికి ప్రభుత్వ, ప్రైవేటు దవాఖానల్లో ఉచిత వైద్యం
• ప్రైవేటు సెక్యూరిటీ గార్డులను నియమించుకునేందుకు రెసిడెంట్‌ వెల్ఫేర్‌ అసోసియేషన్లకు ఆర్థికసాయం
• ఆటోడ్రైవర్లకు రూ.10 లక్షల ఆరోగ్య బీమా, వారి ఆడబిడ్డల వివాహాలకు రూ.1 లక్ష సాయం
• అద్దెకు ఉండే వారికి ఉచిత విద్యుత్తు, మంచినీటి సరఫరా

కాంగ్రెస్‌ హామీలు

• మహిళలకు నెలకు రూ.2,500 ఆర్థిక సహాయం
• అందరికీ 300 యూనిట్ల వరకు ఉచిత విద్యుత్తు
• రూ.500కే ఎల్‌పీజీ గ్యాస్‌ సిలిండర్‌
• పేదలకు బియ్యం, చక్కెర, వంటనూనె, పప్పులు, టీపొడితో కూడిన రేషన్‌ కిట్ల పంపిణీ
• రూ.25 లక్షల వరకు ఆరోగ్య బీమా
• నిరుద్యోగ యువతకు నెలకు రూ.8,500 భృతి.