ఇంధనం అందకే ప్రమాదం?

సరిగ్గా నెల క్రితం జూన్‌ 12న అహ్మదాబాద్‌లో కూలిపోయి అగ్నికి అహుతైన ఎయిరిండియా విమాన ప్రమాదం ఇంధనం అందనందు వల్లే జరిగిందని విమాన ప్రమాద దర్యాప్తు బ్యూరో (ఏఏఐబీ) కేంద్ర ప్రభుత్వానికి శనివారం ప్రాథమిక నివేదిక సమర్పించింది.

• గాలిలో ఒకేసారి రెండు ఇంజిన్లూ ఆగిపోయాయి
• థ్రస్ట్‌ లివర్లు పని చేయకపోవడమూ ఒక కారణమే
• ఇంధన కంట్రోల్‌ స్విచ్‌ లాకింగ్‌ మెకానిజం పాటించలేదని వెల్లడి
• అహ్మదాబాద్‌ ఎయిర్‌ ఇండియా విమాన ప్రమాదంపై కేంద్రానికి ఏఏఐబీ ప్రాథమిక నివేదిక

న్యూఢిల్లీ, జూలై 12: సరిగ్గా నెల క్రితం జూన్‌ 12న అహ్మదాబాద్‌లో కూలిపోయి అగ్నికి అహుతైన ఎయిరిండియా విమాన ప్రమాదం ఇంధనం అందనందు వల్లే జరిగిందని విమాన ప్రమాద దర్యాప్తు బ్యూరో (ఏఏఐబీ) కేంద్ర ప్రభుత్వానికి శనివారం ప్రాథమిక నివేదిక సమర్పించింది. ఈ నివేదిక ప్రకారం విమానం టేకాఫ్‌ అయ్యాక ఇంధన కంట్రోలర్‌ స్విచ్‌లు సెకను తేడాలో ఆగిపోయాయి. పైలట్‌ ఎందుకు స్విచ్‌ ఆఫ్‌ చేసినట్టని మరో పైలట్‌ను ప్రశ్నించాడని, తాను స్విచ్‌ ఆఫ్‌ చేయలేదని మరో పైలట్‌ సమాధానం ఇచ్చినట్టు రిపోర్టులో ఉంది. కాక్‌పిట్‌లో అవే పైలట్ల ఆఖరి మాటలని ఏఏఐబీ వెల్లడించింది. తర్వాత పైలట్లు మేడే కాల్‌ ఇచ్చినట్టు తెలిపింది. ఎయిర్‌ ట్రాఫిక్‌ కంట్రోలర్‌ స్పందించినప్పటికీ ఎలాంటి స్పందన రాలేదన్న ఏఏఐబీ.. ఈలోపే విమానం కూలిపోయిందని వివరణ ఇచ్చింది. ‘క్షణాల్లో రెండు ఇంజిన్లకు ఫ్యూయల్‌ సరఫరా నిలిచిపోయింది. గాల్లోనే రెండు ఇంజిన్లు ఆగిపోయాయి’ అని నివేదిక తెలిపింది.

ఇంధన సరఫరాను నిలిపివేశారా?
పైలట్‌ పొరపాటున ఇంధన సరఫరాను నిలిపివేశారా? లేక దానికదే ఆగిపోయిందా? అన్నది మిస్టరీగా ఉంది. అహ్మదాబాద్‌ ప్రమాదంలో మాత్రం విమానం ఇంకా టేకాఫ్‌ దశలో ఉండటంతో తక్కువ ఎత్తులో ఉంది. ఇంధన సరఫరాను మళ్లీ కొనసాగించేంత సమయం లేకపోయింది. విమానం కేవలం 32 సెకన్లు మాత్రమే గాల్లో ఉంది. తర్వాత కిందిపడి పేలిపోయింది.

నివేదికలోని ముఖ్యాంశాలు

• రెండు ఇంజన్లకూ నిలిచిపోయిన ఇంధన సరఫరా: ఒక్క సెకనులోనే రెండు ఇంజిన్లకు ఇంధన సరఫరా నిలిచిపోయింది. ఆ విమానం 8:08:42 గంటలకు గరిష్ఠంగా 180 నాట్స్‌ ఎయిర్‌స్పీడ్‌ను సాధించింది. ఇంజిన్‌ 1, ఇంజిన్‌ 2 ఫ్యూయల్‌ కటాఫ్‌ స్విచ్‌లు ఒక సెకను సమయం అంతరాయంతో ఒకదాని తర్వాత ఒకటి రన్‌ నుంచి కటాఫ్‌ స్థానానికి మారాయి. ఇంజిన్లకు ఇంధన సరఫరా నిలిపివేసినందున రెండు ఇంజిన్లు టేకాఫ్‌ విలువల నుంచి తగ్గడం ప్రారంభించాయి. విద్యుత్‌ సరఫరా నిలిచిపోయింది.
• పైలట్‌ ఆందోళన: ‘ఇంధన సరఫరా స్విచ్‌ను ఎందుకు ఆఫ్‌ చేశావు?’ అని ఒక పైలట్‌ మరో పైలట్‌ను ఆందోళనతో ప్రశ్నించగా, ‘నేను ఆఫ్‌ చేయలేదు’ అని రెండో పైలట్‌ సమాధానం ఇచ్చాడు.
• ఇంజిన్ల పునరుద్ధరణకు యత్నాలు: ఇంజిన్లు ఆటోమేటిక్‌గా పునరుద్ధరించడానికి ప్రయత్నాలు జరిగినట్టు ఫ్లయిట్‌ డాటా వెల్లడించింది. ఈ ప్రయత్నంలో ఇంజిన్‌ 1 కొద్దిగా స్పందించినప్పటికీ, ఇంధన పునరుద్ధరణకు చేసిన ప్రయత్నాలలో ఇంజిన్‌ 2 నుంచి ఎలాంటి ప్రతిస్పందన రాలేదు.
• మేడే కాల్‌: విమానం కూలిపోవడానికి ముందు 08:09:05 గంటలకు పైలట్లు ప్రమాద సంకేతాన్ని తెలియజేస్తూ మేడే కాల్‌ ఇచ్చారు.
• 1000 అడుగుల విస్తీర్ణం వరకు శకలాలు: విమానం కూలిపోయినప్పుడు వాటి శిథిలాలు వెయ్యి అడుగుల విస్తీర్ణంలో నేలపై చెల్లాచెదురుగా పడ్డాయి. విమాన ఇంజిన్లు, ఇతర శకలాలు వెయ్యి అడుగుల విస్తీర్ణం వరకు చెల్లాచెదురుగా పడ్డాయి.
• పనిచేయని థ్రస్ట్‌ లివర్లు: ప్రమాద సమయంలో థ్రస్ట్‌ లివర్లు పనిచేయనట్టుగా అన్పించాయి. కానీ బ్లాక్‌బాక్స్‌ డేటాను పరిశీలిస్తే థ్రస్ట్‌ పని చేసేందుకు ప్రయత్నించినట్టు కనిపించింది.
• ఏ పక్షీ ఢీ కొట్ట లేదు: టేకాఫ్‌కు ఫ్లాప్‌ సెట్టింగ్‌, గేర్‌ సాధారణంగానే పనిచేశాయి. వాతావరణ పరిస్థితులు కూడా అనుకూలంగానే ఉన్నాయి. ఆకాశం స్పష్టంగా కన్పించింది. విమానాన్ని ఎలాంటి పక్షి ఢీకొట్టలేదు.
• ఫిట్‌గా ఇద్దరు పైలట్లు: ఎయిరిండియా పైలట్లు ఇద్దరూ మెడికల్‌గా ఫిట్‌గానే ఉన్నారు. విమానంలో ప్రమాదకరమైన వస్తువులులేవు.
• బోయింగ్‌ అడ్వైజరీ పాటించలేదు: . ఫ్యూయల్‌ కంట్రోల్‌ స్విచ్‌ లాకింగ్‌ మెకానిజంపై బోయింగ్‌ ఆప్షనల్‌ అడ్వైజరీ జారీ చేయగా, ఎయిర్‌ ఇండియా పాటించ లేదు.