ఆకాశంలో 750 డ్రోన్లతో అద్భుతం.. కాకోరి త్యాగదినం సందర్భంగా నివాళి

ఆజాదీకా అమృత్‌ మహోత్సవ్‌లో భాగంగా కాకోరీ బలిదాన్‌ దివాస్‌ సందర్భంగా గోరఖ్‌పూర్‌లో దేశంలోనే అతిపెద్దదైన డ్రోన్‌ షో నిర్వహించారు. 750 డ్రోన్లతో స్వాతంత్య్ర సమరయోధులకు నివాళులర్పించారు. ఇంతకు ముందు లక్నోలో 500 డ్రోన్లతో షో జరిపారు.

ఉత్తరప్రదేశ్‌లో డ్రోన్లతో ఆకాశంలో అద్భుతం సృష్టించారు. కాకోరి బలిదాన్‌ దివాస్‌ సందర్భంగా గోరఖ్‌పూర్‌లో దాదాపు 750 డ్రోన్లతో స్వాతంత్య్ర సమరయోధులకు నివాళులర్పించారు. కాకోరి రైలు దోపిడీ కేసులో మొదలైన ఈ ప్రదర్శన.. ఆజాదీ కా అమృత్‌ మహోత్సవ్‌తో ముగిసింది. దీనికి సంబంధిన వీడియో నెట్టింట వైరల్‌గా మారింది.

ఈ కార్యక్రమానికి ముఖ్యఅతిథిగా ఉత్తరప్రదేశ్‌ ముఖ్యమంత్రి యోగి ఆదిత్యనాథ్‌ హాజరయ్యారు. ఈ సందర్భంగా దేశంలోనే అతిపెద్దదైన డ్రోన్‌ షో అందర్నీ అలరించింది. కాకోరి ట్రైన్‌ యాక్షన్‌లో అమరవీరులకు నివాళులర్పించేందు ఆజాదీకా అమృత్‌ మహోత్సవ్‌లో భాగంగా ఈ డ్రోన్‌ షో నిర్వహించారు. ఇందుకు మహంత్‌ దిగ్విజయ్‌నాథ్‌ పార్క్‌ వేదికైంది. ఈ షోను వీక్షించేందుకు గోరఖ్‌పూర్‌ సహా పలు ప్రాంతాల నుంచి పెద్ద సంఖ్యలో ప్రజలు హాజరయ్యారు. ఈ ప్రదర్శనలో 750 డ్రోన్లను ఉపయోగించారు. ఇదే దేశంలోనే అతి పెద్ద డ్రోన్‌ షోగా నిలిచింది. అంతకుముందు 2021 డిసెంబర్‌ 20 న లక్నోలో 500 డ్రోన్లతో అమర త్యాగుల వీరోచిత గాథను ప్రదర్శించారు.