చవితి జరుగాలి ప్రశాంతంగా..

• మండలపాల ఏర్పాటుకు నిబంధనలు తప్పనిసరి
• లేకుంటే చట్టరీత్యా చర్యలు
• ఈనెల 31న వినాయక చవితి

వినాయక చవితి పండుగను భక్తులు ప్రశాంతమైన వాతావరణంలో జరుపు కోవాలి. అందుకు భక్తమండళ్లు కొన్ని నియమాలు పాటించాలి. ఈ నెల 31న వినాయక చవితి పండుగ సందర్భంగా గణేశ్‌ విగ్రహాల ఏర్పాటుకు తీసుకోవాల్సిన జాగ్రత్తలు, పాటించాల్సిన నియమ నిబంధనలపై అధికారుల సలహాలు, సూచనలు పాటించాలి. విగ్రహాల ఏర్పాటుకు అనుమతి తీసుకోవాలి వినాయక చవితి వేడుకలు ప్రశాంతంగా జరిగేందుకు అందరూ సహకరించాలి. విగ్రహాలు నెలకొల్పే కమిటీలు ముందుస్తుగా స్థానిక పోలీస్‌ స్టేషన్‌లో అనుమతి తీసుకొని విగ్రహాలు ఏర్పాటు చేసుకోవాలి. మండపాల వద్ద అవాంఛనీయ సంఘటనలు జరుగకుండా కమిటీ సభ్యులు నిరంతరం పర్యవేక్షించాలి. ఏమైనా సంఘటనలు జరిగితే కమిటీ సభ్యులదే పూర్తి బాధ్యత. వారిపై చట్టపరమైన చర్యలు తీసుకుంటాం.
-రామలింగారెడ్డి, సీఐ, హుజూర్‌నగర్‌

ఇవీ నిబంధనలు..

• విగ్రహాలు ఏర్పాటు చేయాలనుకునే వారు ముందుగా కమిటీ వివరాలను సంబంధిత
  పోలీస్‌ స్టేషన్‌లో నమోదు చేసుకోవాలి.
• అనుమతి లేకుండా విగ్రహాలను పబ్లిక్‌ ప్రదేశాల్లో ఏర్పాటు చేయకూడదు.
• మండపాల వద్దకు వచ్చే భక్తుల వాహనాలకు విధిగా పార్కింగ్‌ ఉండేలా చూడాలి.
• మండపాల వద్ద మద్యం తాగడం, పేకాడడం చేయరాదు.
• విగ్రహాల సంరక్షణకు మండపాల వద్ద 24 గంటలు ముగ్గురికి తగ్గకుండా వలంటీర్లు ఉండాలి.
• వారి వివరాలను పోలీస్‌స్టేషన్‌లో తెలియజేయాలి.
• వలంటీర్లందరికీ తప్పనిసరిగా ఫొటో గుర్తింపు కార్డులు ఉండాలి.
• మండపాల్లో ఎమర్జెన్సీ ల్యాంప్‌ ఏర్పాటు చేసుకోవాలి.
• అప్పుడప్పుడూ పోలీసులు మండపాల వద్ద వలంటీర్లను తనిఖీ చేస్తుంటారు.
• పెద్దమండపాల వద్ద భక్తుల క్యూ కోసం బారికేడ్లు ఏర్పాటు చేయాలి.
• మండపాలు కూలిపోకుండా క్వాలిటీ మెటీరియల్‌తో నిర్మించాలి.
• అగ్నిమాపక, విద్యుత్‌ శాఖ అనుమతితోపాటు పోలీస్‌శాఖ అనుమతి తీసుకోవాలి.
• విద్యుత్‌ ప్రమాదాలు జరుగకుండా తగు జాగ్రత్తలు తీసుకోవాలి. మండపాల్లో అతుకులు లేని విద్యుత్‌ వైర్లనే వాడాలి.
• మండే స్వభావం ఉన్న పెట్రోల్‌, డీజిల్‌, కిరోసిన్‌, పేలుడు పదార్థాలు లేకుండా జాగ్రత్తలు తీసుకోవాలి.
• ఉత్సవాలు జరిగినన్ని రోజులు బహిరంగ ప్రదేశాల్లో పటాకులు కాల్చడం నిషేధం.
• మైక్‌లు, స్పీకర్ల ఏర్పాటుతోపాటు సాంస్కృతిక కార్యక్రమాల నిర్వహణకు డీఎస్పీ అనుమతి తప్పని సరి.
• అనుమతి లేకుండా డీజేలు ఏర్పాటు చేయకూడదు. అలా ఏర్పాటు చేస్తే వారిపై చట్టపరమైన చర్యలు తీసుకుంటారు.
• సుప్రీం కోర్టు ఆదేశాల మేరకు స్పీకర్లను తక్కువ సౌండ్‌తో రాత్రి 10 గంటల వరకే వినియోగించాలి.
• బలవంతంగా చందాలు వసూలు చేసే వారిపై కఠిన చర్యలు తీసుకుంటారు.
• నిత్యం రద్దీగా ఉండే రోడ్లపై విగ్రహాలను ప్రతిష్ఠించి ట్రాఫిక్‌కు అంతరాయం కలిగించరాదు.