Visit:
– సర్పంచ్ పదవి కోసం రాష్ట్ర వ్యాప్తంగా కొనసాగుతున్న వేలం పాటలను నిలిపివేయాలి
– ఈసీ ఆదేశాలు పాటించని అధికారులపై చర్యలు తీసుకోవాలి
– ఈసీకి హైకోర్టు అడ్వకేట్ కంచర్ల నిశాంత్ కుమార్ సాగర్ ఫిర్యాదు
నల్లగొండ, న‌వంబ‌ర్ 29 : స్థానిక సంస్థల ఎన్నికలు పారదర్శకంగా నిర్వహించాలని, స్థానిక సంస్థల ఎన్నికల్లో సర్పంచ్‌గా, వార్డు సభ్యుడిగా పోటీ చేసే అభ్యర్థులు తప్పుడు ప్రచారం, చట్ట విరుద్ధమైన ప్రలోభాల‌కు పాల్పడే వారిపై చట్టపరమైన చర్యలు చేపట్టాలని తెలంగాణ రాష్ట్ర ఎన్నికల కమిషనర్ ఐ.రాణి కుముదినికి నేషనల్ ఫోరం ఫర్ పీపుల్స్ ఎంప‌వ‌ర్‌మెంట్ అండ్ సోషల్ జస్టిస్ చైర్మన్, హైకోర్టు అడ్వకేట్ కంచర్ల నిశాంత్ కుమార్ సాగర్ శనివారం వినతిప‌త్రం అందించారు. ఈ సందర్భంగా ఆయన మాట్లాడుతూ.. గ్రామ సమావేశాల రికార్డులు, వ్యక్తుల అఫిడ‌విట్లు క్షుణంగా పరిశీలించాలని ఈసీని కోరిన‌ట్లు తెలిపారు. అభ్యర్థుల ఉప సంహరణ వివరాలపై నిఘ ఉంచి, ఏకగ్రీవమైన స్థానిక సంస్థల ఎన్నికల్లో సర్పంచ్ గా పోటీ చేయని అభ్యర్థుల ఏకగ్రీవాలను రద్దు చేయాలని ఆయన డిమాండ్ చేశారు. డబ్బు, బెదిరింపులు, ఒత్తిడి చేసి ఏకగ్రీవమైన గ్రామ పంచాయతీలను రద్దు చేయాలన్నారు. పోలీసులు వీడియోగ్రఫీ ద్వారా ప్రతిష్ట భద్రత కల్పించి, పటిష్టమైన నామినేషన్ల స్వీకరణ చేయాలన్నారు. క్రిమినల్ కేసులు ఉన్న అభ్యర్థులను తొలగించాల‌న్నారు. మధ్యవర్తుల, బ్రోకర్ల ప్రమేయం లేకుండా పటిష్టమైన చర్యలు చేపట్టి, రాష్ట్రవ్యాప్తంగా కొనసాగుతున్న సర్పంచ్ గా పోటీ చేస్తున్న అభ్యర్థుల వేలం పాటలను నివారించడానికి ఆదేశాలు జారీ చేయాలన్నారు.
సర్పంచ్ పదవి కోసం ప్రబోపాలకు పాల్పడిన వ్యక్తులపై క్రిమినల్ చర్యలు చేపట్టాలన్నారు. అదేవిధంగా రాష్ట్ర వ్యాప్తంగా నివారణ చర్యలు చేపట్టి సంబంధిత ఏరియాలో నిర్లక్ష్యం వహించిన అధికారులపై చర్యలు చేపట్టాలన్నారు. తెలంగాణలో పంచాయతీ ఎన్నికల్లో ప్రజాస్వామ్య ప్రక్రియను రక్షించి, నేరపూరిత, అవకతవకలకు పాల్పడకుండా పటిష్ట చర్యలు తీసుకోవాలన్నారు. ప్రజాస్వామ్య భవిష్యత్ ప్రయోజనాల కోసం రాష్ట్ర ఎన్నికల కమిషన్ కు పిటిషన్ దాఖలు చేయడం జరిగిందని చెప్పారు. ప్రింట్, ఎలక్ట్రానిక్ మీడియాలో ప్రచురితమైన, వచ్చిన కథనాల ఆధారాల ఎలక్షన్ కమిషన్ కు లిఖితపూర్వకంగా ఆధారాలతో ఫిర్యాదు చేయడం జరిగిందని తెలిపారు. ప‌లు జిల్లాల్లో ఏకగ్రీవాలు రూ.లక్ష నుండి కోటి వరకు జరిగాయన్నారు. ఈ సమస్యను రాష్ట్రవ్యాప్తంగా నివారించడానికి ఎన్నికల కమిషన్ ప్రజాస్వామ్య పరిరక్షణ కోసం పటిష్టమైన పరిష్కార మార్గం చూపాలన్నారు.
ఆర్టికల్ ఏ.73 రాజ్యాంగ సవరణను స్వేచ్ఛాయుతమైన, న్యాయమైన విధంగా గ్రామ పంచాయతీ ఎన్నికలు జరిగే విధంగా హామీ ఇవ్వాలని ఈసీని కోరిన‌ట్లు తెలిపారు. అదే విధంగా ఆర్టికల్ బి.14,19(1) (ఏ),19(1)(సి) రాజకీయాల్లో సమానత్వం, స్వేచ్ఛ, హక్కులు కల్పించాల‌న్నారు. ఈ విషయాలపై పారదర్శకత పాటించకుంటే ప్రజాస్వామ్యంలో సంక్షోభం ఏర్పడుతుందన్నారు. దోపిడీ, నిర్బంధం, ప్రలోభం వంటి అనైతిక వ్యవహారాలపై చట్టపరంగా చర్యలు చేపట్టి, నేరపూరిత అవకతవకలను నిరోధించి, అటువంటి చ‌ర్య‌ల‌కు పాల్పడిన వ్యక్తులపై చట్టపర్యమైన చర్యలు చేపట్టి శిక్షించాలన్నారు. నిర్లక్ష్యం వహించిన ఎలక్షన్ కమిషన్ నిర్ణయించిన అధికారులు, వేలం పాటకు సహకరించిన అధికారులకు, డబ్బు చెల్లించిన అభ్యర్థులను, బ్రోకర్లను మధ్యవర్తులపై చట్టపరంగా చర్యలు చేపట్టాలన్నారు. ఎలక్షన్ కమిషన్ ఆదేశాలు, పారదర్శకతను పాటించని అధికారులపై చర్యలు చేపట్టేందుకు ఆదేశాలు జారీ చేయాలని కోరుతూ ఈసీకి ఫిర్యాదు చేసిన‌ట్లు పేర్కొన్నారు.
