సరైన మందులతోనే సస్యరక్షణ

నాగార్జున సాగర్‌ ఆయకట్టుకు సాగునీరు రాకపోవడంతో ఇతర నీటి వనరులు ఉన్న రైతులు ఈ వానకాలం సీజన్‌లో తక్కువ విస్తీర్ణంలో వరి, ఇతర పంటలను సాగు చేశారు.

• అధిక వినియోగం అనర్థకం
• రోగాలకు తగిన మందులనే కొనుగోలు చేయాలి
• ఇంట్లో రసాయన మందులు నిల్వ చేయకూడదు
• మందుల పిచికారీలో జాగ్రత్తలు పాటించాలంటున్న వ్యవసాయ నిపుణులు

గరిడేపల్లి, అక్టోబర్‌ 3 : నాగార్జున సాగర్‌ ఆయకట్టుకు సాగునీరు రాకపోవడంతో ఇతర నీటి వనరులు ఉన్న రైతులు ఈ వానకాలం సీజన్‌లో తక్కువ విస్తీర్ణంలో వరి, ఇతర పంటలను సాగు చేశారు. అయితే.. అధిక దిగుబడులు సాధించాలన్న ఉద్దేశంతో రైతులు మోతాదుకు మించి రసాయన మందులను వాడుతున్నారు. ఈ క్రమంలో క్రిమిసంహారక మందులను సరైన పద్ధతుల్లో పిచికారీ చేయకపోవడంతో వారి ప్రాణాలకు ప్రమాదం సంభవించే అవకాశం ఉన్నది.

దీంతోపాటు పంటల్లో మందుల అవశేషాలు మిగిలి ప్రజల ఆరోగ్యంపై ప్రభావం చూపుతున్నది. పంటలపై వినియోగించే సస్యరక్షణ మందుల కొనుగోలు సరైన మోతాదులో మందు కలపడం, పిచికారీ వంటి విషయాల్లో జాగ్రత్తలు పాటించాలని గడ్డిపల్లి కేవీకే శాస్త్రవేత్త దొంగరి నరేశ్‌ సూచిస్తున్నారు. పంటలకు ముందుగా ఏ తెగులు, ఏ పురుగు సోకిందో గుర్తించాలి. ఆయా తెగుళ్లు, పురుగుల నివారణకు సరైన మందులను సిఫారసు మేరకు తెచ్చుకోవాలి. ఏ సమయంలో పిచికారీ చేయాలో, ఏ రకమైన మందులను కలిపి వాడుకోవచ్చో స్పష్టంగా తెలుసుకోవాలి.

గుర్తింపు పొందిన కంపెనీల లేబుల్‌, సీల్‌ సరిచూసుకోవాలి. సీసాలకు మూతలు బిగించిన తర్వాత వేసిన సీల్‌ను పరిశీలించాలి. లైసెన్సు పొందిన దుకాణాల్లోనే మందులను కొనుగోలు చేయాలి. అవసరానికి మించి కొనుగోలు చేయవద్దు. మందులను ఇంటి వద్ద నిల్వ చేయడం క్షేమం కాదు. పురుగు మందులను ఎక్కువ కాలం నిల్వ చేస్తే వాటి సామర్థ్యం తగ్గిపోతుంది. కొనుగోలు చేసేటప్పుడు వాటి తయారీ తేదీని చూసుకోవాలి.

తెగుళ్లు, పురుగు మందుల పనితీరు వేర్వేరుగా ఉంటుంది. వాటిని కలిపి వాడేటప్పుడు ఏ మందులో ఏది కలిస్తే సమర్థవంతంగా పని చేస్తుందో సూచించిన ప్రకారం వాడుకోవాలి. విచక్షణా రహితంగా అన్ని రకాల మందులను కలిపి పిచికారీ చేయకూడదు.

పిచికారీ చేసేటప్పుడు తీసుకోవాల్సిన జాగ్రత్తలు

• పురుగు మందులను వాసన చూడకూడదు.
• పురుగు మందులు పిచికారీ చేసే సమయంలో ఆహార పదార్థాలు తినడం, నీళ్లు తాగడం, చుట్ట, సిగరెట్‌ కాల్చడం వంటివి చేయకూడదు.
• పొడి మందులు ఉదయం 9గంటల్లోపు, సాయంత్రం నాలుగు గంటల తర్వాతనే పిచికారీ చేయాలి.
• మందులు పిచికారీ చేసేందుకు వాడే పరికరాలకు రంధ్రాలు లేకుండా జాగ్రత్త పడాలి.
• మందులు పిచికారీ చేయడం పూర్తయిన తర్వాత సబ్బుతో స్నానం చేయాలి.
• సీసా మూతలను నోటితో తీయడం, బకెట్లలో మందులు పోసి చేతులతో కలుపడం వంటివి చేయకూడదు.
• నీటిలో కరిగే పొడి మందులను ఒకేసారి నీటిలో పోసి కలుపకూడదు. మొత్తం మందు పొడిని కొద్ది నీటిలో పోసి కర్రతో కలిపిన తర్వాత మరికొంత నీళ్లు పోసి పలుచగా చేసి ఆ తర్వాత నిర్ణీత మొత్తం నీటిలో కలుపాలి.
• మబ్బులు పట్టి జల్లులు పడే సమయంలో, ఎండ తీవ్రత ఎక్కువగా ఉన్నప్పుడు సస్యరక్షణ మందులు చల్లకూడదు. గాలి వీచే వైపు చల్లాలి. పంట పొలాల్లో గాలికి ఎదురుగా మందులు పిచికారీ చేయకూడదు.
• పిచికారీ చేసే సమయంలో మాస్కులు, గమ్‌బూట్లను, రబ్బరు గ్లౌజులను, పొడవు చేతి చొక్కాలను తలకు, నోటికి, ముక్కు వస్ర్తాలు ధరించాలి.
• ఖాళీ మందు సీసాలను, డబ్బాలను కడిగి వాడవద్దు. వాటిని పాతి పెట్టాలి. మందులు పిచికారీ చేసిన తర్వాత కనీసం వారం, పది రోజుల వరకు పంటను కోయకూడదు.

రోగాన్ని బట్టి మందులు వాడాలి

పంటలకు వచ్చిన రోగ లక్షణాలను పూర్తిగా పరిశీలించిన తర్వాత రోగాన్ని నిర్ధారించుకొని దానికి అవసరమైన మందులను మాత్రమే కొనుగోలు చేసి తగిన మోతాదులోనే పిచికారీ చేయాలి. గాలికి ఎదురుగా మందులను పిచికారీ చేయకూడదు. మబ్బులు పట్టినప్పుడు, ఎండ ఎక్కువగా ఉన్నప్పుడు పిచికారీ చేయడం సరికాదు. తగు జాగ్రత్తలు పాటిస్తూ మందులను పిచికారీ చేస్తే పంట చేలపై రోగాలు నివారింపబడడమే కాకుండా పిచికారీ చేసే వారికి ఏ ఇబ్బందులూ ఉండవు. పెట్టుబడి ఖర్చులు కూడా తగ్గుతాయి.

– దొంగరి నరేశ్‌, కేవీకే శాస్త్రవేత్త, గడ్డిపల్లి