అవిశ్వాసానికి మద్దతు తెలుపలేదని దాడి

సూర్యాపేట మున్సిపల్‌ చైర్‌పర్సన్‌పై పెట్టిన అవిశ్వాసానికి మద్దతు తెలుపలేదని 45వ వార్డు కౌన్సిలర్‌ గండూరి పావనీకృపాకర్‌ ఇంటిపై కాంగ్రెస్‌, బీజేపీ, బీఎస్పీకి చెందిన అసమ్మతి కౌన్సిలర్లు ఆదివారం దాడికి పాల్పడ్డారు. ఇంటిపై గుడ్లు, రాళ్లు విసురుతూ దౌర్జన్యానికి తెగబడ్డారు.

January 29, 2024 / 03:36 AM IST

కౌన్సిలర్‌ గండూరి పావనీకృపాకర్‌
ఇంటిపై అసమ్మతి కౌన్సిలర్ల దౌర్జన్యం
ఇంటిపై కోడిగుడ్లు విసిరిన కాంగ్రెస్‌, బీజేపీ, బీఎస్పీ వర్గాలు
సూర్యాపేటలో ఉద్రిక్త వాతావరణం
తోపులాటలో బీఆర్‌ఎస్‌ నాయకుడు వై.వెంకటేశ్వర్లు,
మున్సిపల్‌ చైర్‌పర్సన్‌ అన్నపూర్ణ, పలువురికి గాయాలు

సూర్యాపేట, జనవరి 28 (నమస్తే తెలంగాణ) : సూర్యాపేట మున్సిపల్‌ చైర్‌పర్సన్‌పై పెట్టిన అవిశ్వాసానికి మద్దతు తెలుపలేదని 45వ వార్డు కౌన్సిలర్‌ గండూరి పావనీకృపాకర్‌ ఇంటిపై కాంగ్రెస్‌, బీజేపీ, బీఎస్పీకి చెందిన అసమ్మతి కౌన్సిలర్లు ఆదివారం దాడికి పాల్పడ్డారు. ఇంటిపై గుడ్లు, రాళ్లు విసురుతూ దౌర్జన్యానికి తెగబడ్డారు. విషయం తెలుసుకొని నిలువరించేందుకు బీఆర్‌ఎస్‌ కౌన్సిలర్లు, పార్టీ నాయకులు, కార్యకర్తలు అక్కడికి రావడంతో ఇరువర్గాల మధ్య తోపులాట జరిగింది. ఒకరినొకరు దుర్భాషలాడుకున్నారు. ఈ దాడిలో బీఆర్‌ఎస్‌ రాష్ట్ర నాయకుడు వై.వెంకటేశ్వర్లు డ్రెస్‌ చినికిపోగా, మున్సిపల్‌ చైర్‌పర్సన్‌ అన్నపూర్ణ, ఆమె వెంట ఉన్న అనుములపురి భానుకు స్వల్ప గాయాలయ్యాయి.

అలాగే బీఆర్‌ఎస్‌లో ఉండి చైర్మన్‌ పదవి కోసం ఇతర పార్టీలతో జతకట్టిన కొండపల్లి నిఖిలకు కూడా స్వల్ప గాయాలయ్యాయి. ఈ ఘటనతో సూర్యాపేటలో ఉద్రిక్త వాతావరణం ఏర్పడింది. పోలీసులు అక్కడికి చేరుకొని ఘర్షణ జరుగకుండా చర్యలు తీసుకున్నారు. అవిశ్వాస తీర్మానానికి నోటీసు ఇచ్చిన 32 మందిలో చాలా మంది ఆ పార్టీ నుంచి ఈ పార్టీకి మూడు నుంచి నాలుగు సార్లు మారిన వారు ఉన్నారు. అయితే అవిశ్వాసం వీగిపోవడానికి గండూరి పావనీకృపాకర్‌ కారణమని కాంగ్రెస్‌, బీజేపీ, బీఎస్పీ వర్గాలు దౌర్జన్యానికి పాల్పడ్డాయి. బీఆర్‌ఎస్‌ నాయకులు అక్కడికి రావడం ఆలస్యమైతే పరిస్థితి భయానకంగానే మారి ఉండేదని బాధితులు తెలిపారు. అనంతరం ఇరువర్గాలు పోలీస్‌స్టేషన్‌లో ఫిర్యాదు చేసుకున్నాయి.

ప్రజలు ఓటు వేయకుంటే ఇలాగే దాడులు చేస్తారా?

దాడులకు తెరలేపిన కాంగ్రెస్‌ ప్రశాంతంగా ఉన్న
సూర్యాపేటలో మళ్లీ దౌర్జన్యాలు
మున్సిపల్‌ చైర్‌పర్సన్‌ అన్నపూర్ణ

బొడ్రాయిబజార్‌, జనవరి 28 : ‘నాపై పెట్టిన ఆవిశ్వాసాన్ని విశ్వాసంతో గెలిచారు. దళిత మహిళకు అన్యాయం జరుగుతుందని భావించి 45వ వార్డు కౌన్సిలర్‌ గండూరి పావనీకృపాకర్‌ నాకు మద్దతు పలికారు. దీన్ని సహించని కాంగ్రెస్‌ నాయకుడు రాంరెడ్డి దామోదర్‌రెడ్డి అసమ్మతి కౌన్సిలర్లను పావనీ కృపాకర్‌ ఇంటిపై దాడికి ఉసిగొల్పడాన్ని తీవ్రంగా ఖండిస్తున్నాం’ అని సూర్యాపేట మున్సిపల్‌ చైర్‌పర్సన్‌ పెరుమాళ్ల అన్నపూర్ణ అన్నారు. గండూరి పావనీకృపాకర్‌ నివాసంలో ఆదివారం ఏర్పాటు చేసిన విలేకరుల సమావేశంలో ఆమె మాట్లాడారు. గండూరి పావనీకృపాకర్‌ బీఆర్‌ఎస్‌ పార్టీ ద్వారా కౌన్సిలర్‌గా గెలిచారని, ప్రస్తుతం బీఆర్‌ఎస్‌కు మద్దతు పలికారన్నారు. ప్రజాస్వామ్యంలో తన ఓటును నిజాయితీగా ఉపయోగించారని, ప్రజలు ఓట్లు వేయకుంటే ఇలాగే దాడులు చేస్తారా అని ప్రశ్నించారు. అవిశ్వాసం వీగిపోయినప్పటికీ పదేండ్లుగా ప్రశాంతంగా ఉన్న సూర్యాపేటలో మళ్లీ కక్షలు, దాడులకు తెరలేపుతూ కాంగ్రెస్‌ నాయకులు ప్రజలను భయభ్రాంతులకు గురి చేస్తున్నారని ఆవేదన వ్యక్తం చేశారు. తనకు మద్దతు ఇచ్చిన కౌన్సిలర్‌పై దాడి జరుగుతుందని తెలిసి తాను అక్కడికి వస్తే తనపై, తన వెంట వచ్చిన వారిపై దాడి చేయడమే కాకుండా తామే దాడి చేశామని చెప్పడం దుర్మార్గమన్నారు. మూడు సార్లు ప్రజలు తిరస్కరించినా కాంగ్రెస్‌ నాయకుడు రాంరెడ్డి దామోదర్‌రెడ్డికి బుద్ధి రాలేదని మండిపడ్డారు. బీఆర్‌ఎస్‌ నాయకులు, కార్యకర్తలపై దాడులు చేస్తే సహించేది లేదని హెచ్చరించారు.

బహుజన బిడ్డకు అండగా ఉన్నా.. ప్రలోభాలకు లొంగలేదు : గండూరి పావనీ కృపాకర్‌

అవిశ్వాసానికి తెరలేపిన రోజునే మొదటిసారి గెలిచిన కొండపల్లి నిఖిలా దిలీప్‌రెడ్డికి కాకుండా రెండుసార్లు గెలిచిన బీసీ బిడ్డనైన తనకు చైర్‌పర్సన్‌గా అవకాశం ఇవ్వాలని కోరానని గండూరి పావనీ కృపాకర్‌ తెలిపారు. అగ్రవర్నాలకే చైర్మన్‌ పదవి అని చెప్పడంతో దళిత మహిళకు అండగా ఉండి అవిశ్వాసానికి దూరంగా ఉన్నామని, వారు అనుకుంటున్నట్లు ఎలాంటి ప్రలోభాలకూ లొంగలేదని చెప్పారు. తాను కొండపల్లి నిఖిలకు మద్దతు ఇవ్వలేదని, వారితో కలిసి క్యాంపునకు కూడా వెళ్లలేదని అన్నారు. తన వార్డులో ప్రజాదరణ కలిగిన నాయకురాలిగా సొంత డబ్బులే ఖర్చు పెట్టాను తప్ప ఎవరి వద్ద డబ్బు తీసుకోలేదని చెప్పారు. తమ ఇంటిపై దాడి చేసి, భయభ్రాంతులకు గురి చేసిన వారిపై చర్యలు తీసుకోవాలని కోరారు. పోలీసులు నిష్పక్షపాతంగా వ్యవహరించాలని విజ్ఞప్తి చేశారు. తాను త్వరలో బీఎస్పీకి రాజీనామా చేసి బీఆర్‌ఎస్‌లో చేరనున్నట్లు ప్రకటించారు. ఈ సమావేశంలో మున్సిపల్‌ వైస్‌ చైర్మన్‌ పుట్ట కిశోర్‌, బీఆర్‌ఎస్‌ రాష్ట్ర కార్యదర్శి వై.వెంకటేశ్వర్లు, కౌన్సిలర్‌ నిమ్మల స్రవంతి, బీఆర్‌ఎస్‌ నాయకులు నిమ్మల శ్రీనివాస్‌గౌడ్‌, ఆకుల లవకుశ, గండూరి కృపాకర్‌ పాల్గొన్నారు.

Join Our Whatsapp Channel