మిర్యాలగూడ ఎన్‌ఎస్‌పీ గ్రౌండ్‌లో సభ

మిర్యాలగూడ పట్టణంలోని ఎన్‌ఎస్పీ గ్రౌండ్‌లో నిర్వహించే ప్రజా ఆశీర్వాద సభకు ఏర్పాట్లు పూర్తయ్యాయి. నియోజకవర్గం నుంచి వేలాది మంది సభకు తరలిరానున్నారు. సీఎం కేసీఆర్‌ మధ్యాహ్నం 2గంటలకు సభకు హాజరై ప్రసంగించనున్నారు.

మిర్యాలగూడ, అక్టోబర్‌ 30 : మిర్యాలగూడ పట్టణంలోని ఎన్‌ఎస్పీ గ్రౌండ్‌లో నిర్వహించే ప్రజా ఆశీర్వాద సభకు ఏర్పాట్లు పూర్తయ్యాయి. నియోజకవర్గం నుంచి వేలాది మంది సభకు తరలిరానున్నారు. సీఎం కేసీఆర్‌ మధ్యాహ్నం 2గంటలకు సభకు హాజరై ప్రసంగించనున్నారు.

మిర్యాలగూడ నియోజకవర్గంలోని ఐదు మండలాలు సీఎం కేసీఆర్‌ రాక సందర్భంగా గులాబీమయమయ్యాయి. అడుగడుగునా గులాబీ దళపతి భారీ కటౌట్లు ఏర్పాట్లు చేశారు. సీఎం రాకతో నియోజకవర్గానికి మరింత మేలు జరుగుతుందని ప్రజలు భావిస్తున్నారు. మూడోసారి ముఖ్యమంత్రిగా కేసీఆర్‌, ఎమ్మెల్యేగా నల్లమోతు భాస్కర్‌రావు గెలిస్తే నియోజకవర్గం మరింత అభివృద్ధి చెందుతుందని ఇక్కడి ప్రజలు భావిస్తున్నారు.

భారీ బందోబస్తు

సీఎం కేసీఆర్‌ సభకు భారీ పోలీస్‌ బందోబస్తు ఏర్పాటు చేశారు. ఎస్పీ అపూర్వారావు భద్రతా ఏర్పాట్లు పరిశీలించారు. ట్రాఫిక్‌ నియంత్రణ, పార్కింగ్‌ స్థలాలను పర్యవేక్షించారు. వాహనాల మళ్లింపు, పార్కింగ్‌ స్థలాల వద్ద వాహనాల నిలిపివేత వంటి అంశాలపై సిబ్బందికి సూచనలు చేశారు. 400మంది పోలీసు సిబ్బందితో బందోబస్తు నిర్వహిస్తున్నారు. 4డీఎస్పీలు, 15మంది సీఐలు, 50మంది ఎస్‌ఐలు, 110ఏఎస్‌ఐలు, మరో 300మంది కానిస్టేబుల్‌, హోంగార్డులతో బందోబస్తు నిర్వహించనున్నారు.

పార్కింగ్‌ ప్రదేశాలు

• యాద్గార్‌పల్లి, ఆలగడప వైపు నుంచి వచ్చే వాహనాలు ఆర్డీఓ కార్యాలయం వద్ద ప్రజలను దింపి వారి అట్టి వాహనాలను ప్రభుత్వ జూనియర్‌ కళాశాలలో, పాత వడ్ల మార్కెట్‌లో పార్కింగ్‌ చేసుకోవాలి
• దామరచర్ల, అడవిదేవులపల్లి, వెంకటాద్రిపాలెం నుంచి వచ్చే వాహనాలు జీవీ మాల్‌ వరకు వచ్చి అక్కడ ప్రజలను దింపి జీవీ మాల్‌ పక్కన ఉన్న ఎన్‌జీ కళాశాల గ్రౌండ్‌, రెడ్డికాలనీ, డీమార్ట్‌ ఖాళీ స్థలాల్లో వాహనాలను పార్కింగ్‌ చేసుకోవాలి.
• వేములపల్లి, మాడ్గులపల్లి మండలాల నుంచి వచ్చే వాహనాలు నందిపాడు ఎక్స్‌ రోడ్డు నుంచి సభా స్థలానికి చేరుకుని కార్యకర్తలను దింపి లక్ష్మీగార్డెన్‌ ఫంక్షన్‌ హాల్‌ సమీపంలో పార్కు చేసుకోవాలని డీఎస్పీ వెంకటగిరి సూచించారు. వాహనాల డ్రైవర్లు ప్రతి ఒక్కరు పార్కింగ్‌ స్థలం వద్దనే ఉండాలన్నారు.