రేపు నీట్‌

వైద్య విద్య (ఎంబీబీఎస్‌, డెంటల్‌) కోర్సుల్లో ప్రవేశానికి నిర్వహించే నీట్‌-2024 ప్రవేశ పరీక్ష ఆదివారం జరుగనున్నది. ఇందుకోసం నల్లగొండ జిల్లా కేంద్రంలో 7 పరీక్ష కేంద్రాలను ఏర్పాటు చేసినట్లు నల్లగొండ సిటీ కో ఆర్డినేటర్‌, నల్లగొండ పబ్లిక్‌ స్కూల్‌ ప్రిన్సిపాల్‌ జి.పార్థసారధి శుక్రవారం వెల్లడించారు.

• నల్లగొండ జిల్లా కేంద్రంలో 7 పరీక్ష కేంద్రాలు
• హాజరుకానున్న 2,316 మంది విద్యార్థులు

రామగిరి, మే 3: వైద్య విద్య (ఎంబీబీఎస్‌, డెంటల్‌) కోర్సుల్లో ప్రవేశానికి నిర్వహించే నీట్‌-2024 ప్రవేశ పరీక్ష ఆదివారం జరుగనున్నది. ఇందుకోసం నల్లగొండ జిల్లా కేంద్రంలో 7 పరీక్ష కేంద్రాలను ఏర్పాటు చేసినట్లు నల్లగొండ సిటీ కో ఆర్డినేటర్‌, నల్లగొండ పబ్లిక్‌ స్కూల్‌ ప్రిన్సిపాల్‌ జి.పార్థసారధి శుక్రవారం వెల్లడించారు. మధ్యాహ్నం 2 నుంచి సాయంత్రం 5:30వరకు జరిగే పరీక్షలకు 2,316 మంది విద్యార్థులు హాజరవుతున్నట్లు పేర్కొన్నారు. అన్ని పరీక్ష కేంద్రాల వద్ద 144 సెక్షన్‌ అమల్లో ఉంటుందని తెలిపారు.

పరీక్ష కేంద్రాలు ఇవే..

• మౌంట్‌ ఫోర్ట్‌ సీబీఎస్‌సీ స్కూల్‌, దేవరకొండ రోడ్డు.. ఎస్‌పీఆర్‌ హైస్కూల్‌, రామగిరి.. నారాయణ స్కూల్‌, హైదరాబాద్‌ రోడ్డు..అరబిందో పబ్లిక్‌ స్కూల్‌, రవీంద్రనగర్‌.. న్యూస్‌ హైస్కూల్‌ యాటకన్నారెడ్డి కాలనీ.. ది నల్లగొండ పబ్లిక్‌ స్కూల్‌, మీర్‌బాగ్‌ కాలనీ.. విపస్య స్కూల్‌, చర్లపల్లి.

విద్యార్థులు వీటిని పాటించాలి..

• విద్యార్థులు పరీక్ష కేంద్రాలకు ఉదయం 11గంటలకు చేరుకోవాలి. అదే సమయం నుంచి పరీక్ష కేంద్రంలోకి అనుమతిస్తారు.
• విద్యార్థులు హాల్‌ టికెట్‌తోపాటు పాస్‌పోర్టు సైజు ఫొటోను హాల్‌ టికెట్‌లో చూపిన విధంగా అతికించి తీసుకురావాలి.
• ప్రతి విద్యార్థి ఏదైనా గుర్తింపు కార్డు తీసుకురావాలి. ఇతర ఏ ఎలక్ట్రానిక్‌ వస్తువులు అనుమతించరు.