కనుల పండువగా దత్తాచల క్షేత్ర బ్రహ్మోత్సవాలు

• ఈ నెల 14 నుంచి 19 వరకు కొనసాగనున్న ఉత్సవాలు
• బహ్మోత్సవాల కోసం అన్ని ఏర్పాట్లు చేసిన ఆలయ నిర్వాహకులు
• రెండు రోజుల పాటు బండ్ల ఊరేగింపు
• పెద్ద ఎత్తున పాల్గొననున్న భక్తులు

• హత్నూర, డిసెంబర్‌ 14 :మండల కేంద్రమైన హత్నూర – మాధుర గ్రామ శివారులోని దత్తాచల క్షేత్రం బ్రహ్మోత్సవాలు మంగళవారం నుంచి ఘనంగా ప్రారంభమయ్యాయి. ఏటా దత్తజయంతిని పురస్కరించుకొని బ్రహ్మోత్సవాలు పెద్ద ఎత్తున నిర్వహిస్తారు. ఈ నెల 14 నుంచి 19 వరకు దత్తాచలక్షేత్ర బ్రహ్మోత్సవాలు కొనసాగనున్నాయి. భక్తుల సౌకర్యార్థం నిర్వాహకులు ఆలయం వద్ద అన్ని ఏర్పాట్లు పూర్తి చేశారు. బ్రహ్మోత్సవాలు పురస్కరించుకొని ఆలయం వద్ద ప్రత్యేక హోమ మండపాలు, విద్యుత్‌ దీపాలు ఏర్పాటు చేశారు. ఆరు రోజుల పాటు జరిగే బ్రహ్మోత్సవాలకు ఉమ్మడి మెదక్‌ జిల్లాతో పాటు ఇతర జిల్లాల నుంచి భక్తులు, ప్రజాప్రతినిధులు అధిక సంఖ్యలో హాజరుకానున్నారు. భక్తుల సౌకర్యార్థం దత్తాచల క్షేత్రం వద్ద నిత్యాన్నదాన కార్యక్రమం చేపట్టడంతో పాటు అక్కడే బస చేయడానికి అన్ని వసతులు కల్పించారు.

దత్తాచలక్షేత్రం వద్ద కొనసాగే పూజాకార్యక్రమాలు..
ఈ నెల 14న ప్రారంభమైన దత్తాచలక్షేత్ర బ్రహ్మోత్సవాలు 19 వరకు కొనసాగనున్నాయి. 14న (మంగళవారం) గణపతిపూజ, స్వస్తిపుణ్యాహ వచనం, అఖండ దీపారాధన, ధ్వజారోహణ, అగ్నిప్రతిష్ఠ, ప్రత్యేక హోమాలు, అర్చనలు, మంగళహారతి, ధ్వజస్తంభ జలాధివాసం, మండపపూజ తదితర పూజా కార్యక్రమాలు నిర్వహించారు. 15(నేడు)న చండీ పారాయణం, విశిష్ఠ హవనములు, ధ్వజస్తంభ ధాన్యాదివాసములు, 16న శత రుద్రాభిషేకకాలు, వేద పారాయణం, లక్ష్మీసుదర్శన, దత్తహవనం, చండీ హోమం, ధ్వజస్తంభ పుష్పఫల శయ్య హిరణ్యాదివాసాలు, 17న మహన్యాస పూర్వక శత రుద్రాభిషేకాలు, వేదపారాయణం, గురుచరిత్ర పారాయణం, మంటపస్థిత దేవతాపూజలు, దీపాలంకరణ, హారతి మంత్రం, 18న దత్తహవనం, మహా రుద్రసహిత చండీయాగం, ఆవాహిత దేవతల హవనం, సాయంత్రం బండ్ల ఊరేగింపు, రథోత్సవం, పల్లకీసేవ, మంగళహారతి, 19న 101 పుణ్య దంపతులతో సామూహిక సత్యనారాయణ స్వామి వ్రతాలు, పాచిబండ్ల ఊరేగింపు తదితర కార్యక్రమాలు ఘనంగా నిర్వహించనున్నారు. కాగా, భక్తుల సౌకర్యార్థం ఉత్సవాల సందర్భంగా నిత్యాన్నదానం చేయబడును.

బ్రహ్మోత్సవాలకు హాజరుకానున్న ప్రముఖులు..
దత్తజయంతి బ్రహ్మోత్సవాలకు ఆర్థిక శాఖ మంత్రి హరీశ్‌రావు, దేవాదాయ, ధర్మాదాయ శాఖ మంత్రి అల్లోల ఇంద్రకరణ్‌రెడ్డి, ఎంపీ కొత్త ప్రభాకర్‌రెడ్డి, ఎమ్మెల్యే మదన్‌రెడ్డి, మహిళా కమిషన్‌ చైర్‌పర్సన్‌ సునీతాలక్ష్మారెడ్డితో పాటు పలువురు ఎమ్మెల్యేలు, అధికారులు, ప్రజాప్రతినిధులు హాజరుకానున్నారు.

దాతల సహకారంతోఆలయ అభివృద్ధి..
దత్తాచలక్షేత్రం అభివృద్ధికి ఎంతో మంది దాతలు ముందుకువచ్చి సహాయం అందిస్తున్నారు. దాతల సహకారంతో ఏటా బ్రహ్మోత్సవాలు పెద్ద ఎత్తున నిర్వహిస్తున్నాం. భక్తుల సౌకర్యార్థం అన్ని ఏర్పా చేస్తున్నాం. దత్తజయంతి బ్రహ్మోత్సవాలకు రాష్ట్ర నలుమూలల నుంచి భక్తులు పెద్దసంఖ్యలో హాజరుకానున్నారు.

• సభాపతిశర్మ, ఆలయ ప్రధాన అర్చకులు