Visit:
వనపర్తి, నవంబర్‌ 29 (నమస్తే తెలంగాణ) : కేసీఆర్‌ చేపట్టిన ఆమరణ దీక్ష ద్వారానే తెలంగాణ రా ష్ట్ర ఏర్పాటు సాకారమైందని మాజీ మంత్రి సింగిరెడ్డి నిరంజన్‌ రెడ్డి అన్నారు. శనివారం వనపర్తి జిల్లా కేంద్రంలోని బస్‌డిపో రోడ్డులో దీక్షా దివస్‌ సందర్భంగా బీఆర్‌ఎస్‌ జిల్లా అధ్యక్షుడు గట్టుయాదవ్‌ అధ్యక్షతన సమావేశాన్ని నిర్వహించారు. ఈ సందర్భంగా నిరంజన్‌ రెడ్డి మాట్లాడుతూ.. చరిత్రలో నవంబర్‌ 29ని ఆకాశం, భూమి ఉన్నంత వరకు ఎవరూ మరిచిపోలేనిదన్నారు. భావితరాలకు దీక్షా దివస్‌ ప్రాధాన్యతను తెలియపర్చాలన్న ఉద్దేశంతో ఈ కార్యక్రమాన్ని నిర్వహిస్తున్నామని, కేసీఆర్‌ చేపట్టిన 11రోజుల ఆమరణ దీక్ష యావత్‌ తెలంగాణ సమాజాన్ని మేల్కొల్పిందన్నారు. ఉద్యమాన్ని రాజ్యంగబద్ధంగా నడపడంలో కేసీఆర్‌ సఫలీతృతులయ్యాడని, నాడు రాష్ట్రపతిగా పనిచేసిన అత్యంత ప్రతిభాశాలి ప్రణబ్‌ముఖర్జీలాంటి వారే కేసీఆర్‌ను మెచ్చుకున్నారని గుర్తుచేశారు.
అభం..శుభం తెలియని నేటి టీపీసీసీ అధ్యక్షుడు కేసీఆర్‌ దీక్షపై మా ట్లాడటం విడ్డూరంగా ఉందన్నారు. హైదరాబాద్‌ విలీ నం, నిజాం అభిప్రాయంపై నాడు జరిగింది ఒకటైతే తప్పుడు ప్రచారాలను సృష్టించి ప్రజలను తప్పుదోవ పట్టించారన్నారు. రాష్ర్టాల పునర్విభజన కమిటీ ఇచ్చిన నివేదికను పక్కకు పెట్టి నాడు బలవంతంగా హైదరాబాద్‌ రాష్ర్టాన్ని ఏపీలో విలీనం చేశారని, అదే సందర్భంలో ప్రధానిగా ఉన్న నెహ్రూ ఇష్టం లేనప్పుడు విడిపోవచ్చంటూ బలవంతపు పెళ్లి చేసినట్లుగా కలపడం జరిగిందని నిరంజన్‌ రెడ్డి పేర్కొన్నారు.
అనంతరం జరిగిన తెలంగాణ ఉద్యమ పోరాటంలో 369 మం దిని పొట్టన పెట్టుకుంటే, అందులో ఇద్దరు ఉమ్మడి పాలమూరుకు చెందినవారు ఉన్నారని చెప్పారు. బచావత్‌ ట్రిబునల్‌ ప్రకారం ఉమ్మడి పాలమూరు 170 టీఎంసీల నీటినష్టాన్ని కాంగ్రెస్‌ హయాంలో చవిచూసిందని, టీడీపీ ప్రభుత్వంలో విద్యుత్‌ చార్జీలు పెంచాలన్న అంశంపై నాడు డిప్యూటీ స్పీకర్‌గా ఉన్న కేసీఆర్‌ వ్యతిరేకించి ప్రభుత్వానికి లేఖ రాయడం ద్వారా మళ్లీ తెలంగాణ ఉద్యమానికి పునాదులు పడేలా చేసిందని గుర్తు చేశారు. దేశంలోని 36పార్టీలకు చెందిన అధ్యక్షులతో తెలంగాణ ఏర్పాటు కో సం సంతకాలు పెట్టించేందుకు కేసీఆర్‌ పడరాని పాట్లు పడ్డారన్నారు.
తెలంగాణ ఉద్యమం అసమాన్యమైందని,అందులో దీక్షా దివస్‌ మరో మైలురాయిగా చరిత్ర ఉన్నంత వరకు నిలిచిపోతుందని పేర్కొన్నారు. జూబ్లీహిల్స్‌ ఎన్నికల్లో గెలిచామని విర్రవీగుతున్న కాంగ్రెస్‌ను స్థానిక ఎన్నికల్లో మట్టికరిపించడం ఖాయమన్నారు. కాంగ్రెస్‌ ప్రభుత్వాన్ని ఆంధ్రా ప్రాంత నాయకులే పరోక్షంగా నడిపిస్తున్నారని, మళ్లీ సాగునీటి దోపిడికి కట్రలు చేస్తున్నారన్నారు. బీసీలను మోసం చేసిన కాంగ్రెస్‌కు తగిన బుద్ధి చెప్పాలని కోరారు. ముందుగా సింగిరెడ్డి తెలంగాణ తల్లి విగ్రహానికి మూలమాల వేసి, కేసీఆర్‌ చిత్రపటానికి క్షీరాభిషేకం చేశారు. సమావేశంలో బీఆర్‌ఎస్‌ నాయకులు నాగం తిరుపతి రెడ్డి, విశ్వేశ్వర్‌, వాకిటి శ్రీధర్‌,లక్ష్మారెడ్డి, కరుణశ్రీ, వేణుగోపాల్‌, రమేశ్‌ గౌడ్‌, కురుమూర్తి యాదవ్‌, ప్రేమ్‌నాథ్‌ రెడ్డి, ఉంగ్లం తిరుమల్‌, కర్రెస్వామి, గులాం ఖాదర్‌, జాత్రునాయక్‌, హేమంత్‌ తదితరులు పాల్గొన్నారు.
