Visit:
Nagarkurnool | కొల్లాపూర్ : పెద్దకొత్తపల్లి మండలం నారాయణపల్లిలో సర్పంచ్ పదవి కోసం శనివారం వేలంపాట నిర్వహించారు. దాదాపు రూ.17లక్షలు పలికినట్లుగా గ్రామస్తులు తెలిపారు. ఓ వైపు స్థానిక ఎమ్మెల్యే, మంత్రి జూపల్లి కృష్ణారావు వేలంపాటలు, ఏకగ్రీవాలు వద్దంటూ ప్రకటన విడుదల చేసినా వేలంపాట నిర్వహించడం, కాంగ్రెస్ నేత పాకనాటి భారీవాములు యాదవ్ పదవిని వేలంపాటలో దక్కించుకోవడం గమనార్హం. పదవిని దక్కించుకున్న ఆయనను మంత్రి తన క్యాంప్‌ ఆఫీసులో సత్కరించడం సర్వత్రా చర్చనీయాంశంగా మారింది. మండలంలోని నారాయణ పల్లి గ్రామంలో ఆలయ నిర్మాణం పేరుతో సర్పంచ్ పదవి కోసం వేలంపాట నిర్వహించారు.
గ్రామ కాంగ్రెస్ పార్టీ నాయకుడు వాములు యాదవ్ గ్రామంలోని ఇతర పార్టీల నాయకులకు సర్పంచ్ పదవి వచ్చినా కాంగ్రెస్ అధికారంలో ఉండడంతో ఏదైనా కారణంతో చెక్‌ పవర్‌ రద్దు చేస్తారని భయభ్రాంతులకు గురి చేశారనే ఆరోపణలున్నాయి. విపక్ష పార్టీల నేతల భయాన్ని ఆసరా చేసుకొని వేలంపాటలో సర్పంచ్ పదవిని రూ.17లక్షలకు కొనుగోలు చేసినట్లుగా విమర్శలున్నాయి. ముందస్తుగా గ్రామ పెద్దలకు రూ.6లక్షలు చెల్లించినట్లుగా ఆరోపణలున్నాయి. సర్పంచ్ పదవిని వేలంలో కొన్న అనంతరం మంత్రి జూపల్లిని కలిశారు. ఈ సందర్భంగా మంత్రి సన్మానించారు. మంత్రి కార్యాలయం నుంచి విడుదల చేసిన ప్రకటనలో ప్రజాస్వామ్య తీర్పుతో వచ్చే పదవులను వేలంపాట ద్వారా పొందే వ్యక్తులు తన దగ్గరకు రావొద్దన్నారు. ప్రజాస్వామ్య ప్రక్రియను వేలం సరుకుగా మార్చడాని తీవ్రంగా వ్యతిరేకిస్తున్నానని ప్రకటించడం కొసమెరుపు.
మంత్రి ప్రకటనలో.. ఓటు సామాన్యుని ఆయుధమని చెప్పిన అంబేద్కర్‌ ఆలోచనను గౌరవించాలని.. ప్రజల కొరకు, ప్రజలచేత, ప్రజల కోసం ఎన్నుకోబడిన వారి కోసం పనిచేసే వ్యవస్థ ప్రజాస్వామ్య వ్యవస్థని చెప్పిన అబ్రహం లింకన్ మనకు ఆదర్శం కావాలని ఈ సందర్భంగా గుర్తు చేసిన మంత్రి.. పారదర్శక ఎన్నికల ద్వారా నిజమైన నాయకులను ముందుకు తీసుకురావాలని కోరుకుంటున్నానన్నారు. మంత్రిగా ప్రజాస్వామ్య సంస్కృతిని కోరుకుంటున్నానని.. ప్రజాతీర్పుల స్థానంలో వేలంపాట సంస్కృతిని, ధనబల ప్రయోగాలను ప్రజలు, ప్రజాస్వామిక వాదులు వ్యతిరేకించాలని పిలుపునిచ్చారు.
