Visit:
నాగర్‌కర్నూల్‌, నవంబర్‌ 29 : ఉద్యమాలు.. త్యాగాల ఫలితమే తెలంగాణ రాష్ట్రం సిద్ధించిందని మాజీ ఎమ్మెల్యే మర్రి జనార్ధన్‌రెడ్డి అన్నారు. శనివారం బీఆర్‌ఎస్‌ ఆధ్వర్యంలో కొల్లాపూర్‌ చౌరస్తాలోని జిల్లా పార్టీ కార్యాలయంలో ఏర్పాటు చేసిన దీక్షా దివస్‌లో ఆయన మాట్లాడారు. తెలంగాణ తెచ్చుడో.. కేసీఆర్‌ సచ్చుడో అనే నినాదంతో కేసీఆర్‌ ఆమరణ నిరాహారదీక్ష చేపట్టగా కేంద్రంలోని కాంగ్రెస్‌ ప్రభుత్వం దిగొచ్చి రాష్ట్ర సాధనకు శ్రీకారం చుట్టిందన్నారు. నాడు కేసీఆర్‌ చేపట్టిన దీక్షకు ఎన్నో అడ్డంకులు, ఆటంకాలు సృష్టించడానికి ఆంధ్రా పాలకులు కుట్రలు చేసినా.. వాటన్నింటినీ ఛేదించుకొని ప్రత్యేక రాష్ట్రం సాధించడమే లక్ష్యంగా తెలంగాణ రాష్ట్ర సమితిని ఏర్పాటు చేసి పోరాటం చేశారన్నారు.
హైదరాబాద్‌లో దీక్ష చేపట్టగా, ఆంధ్రా పాలకులు కేసీఆర్‌ దీక్షను భగ్నం చేయాలన్న కుట్రలో భాగంగా ఖమ్మం జిల్లాకు తరలించి అక్కడి నుంచి నిమ్స్‌ దవాఖానకు తరలించగా, 11రోజులపాటు మంచినీళ్లు కూడా ముట్టకుండా తెలంగాణ రాష్ర్టాన్ని సాధించారని వివరించారు. నీళ్లు, నిధులు, నియామకాలు తెలంగాణ రాష్ట్ర ప్రజల హక్కుగా భావించి సాగించిన తెలంగాణ ఉద్యమం కేసీఆర్‌ సారథ్యంలో సాకారమైందన్నారు. కొల్లాపూర్‌ మాజీ ఎమ్మెల్యే బీరం హర్షవర్ధన్‌రెడ్డి మాట్లాడుతూ తెలంగాణ రాష్ర్టాన్ని సాధించిన గొప్ప ధీరుడు కేసీఆర్‌ అన్నారు. తెలంగాణ ఉద్యమంలో కేసీఆర్‌ వెంట నడిచిన ఉద్యమకారులను, ప్రాణత్యాగాలు చేసిన వారిని ఎన్నడూ ఈ సమాజం మరువదన్నారు.
తెలంగాణ పోరాటంలో ప్రాణ త్యాగానికి కూడా వెనుకాడని కేసీఆర్‌ గురించి ఉద్యమంలో ఆంధ్రుల చెంతన చేరిన కాంగ్రెస్‌ నాయకులు మాట్లాడడం సిగ్గుచేటన్నారు. తెలంగాణ రాష్ట్ర సాధనలో కేసీఆర్‌ పాత్ర ఏపాటిదో ప్రపంచానికి, రాష్ట్ర ప్రజలందరికీ తెలుసని.. ఆయన చరిత్ర చిరస్థాయిగా నిలిచిపోతుందన్నారు. అనంతరం తెలంగాణ ఉద్యమకారులు, కళాకారులను మర్రి ఘనంగా సన్మానించారు. అంతకుముందు పట్టణంలోని నల్లవెల్లి కూడలిలోగల అంబేద్కర్‌ విగ్రహానికి పూలమాల వేసి నివాళులర్పించారు. ప్రభుత్వ దవాఖానలో రోగులకు పండ్లు, బ్రెడ్డు పంపిణీ చేశారు. కార్యక్రమంలో రాష్ట్ర నాయకులు బైకని శ్రీనివాస్‌యాదవ్‌, గంగనమోని కుర్మయ్య, నాగం శశిధర్‌రెడ్డి, పోకల మనోహర్‌, ఎడ్మ సత్యం, తులసీరాంనాయక్‌, అర్థం రవి, ప్రదీప్‌, నర్సింహాగౌడ్‌, రవీందర్‌గౌడ్‌, వేణుగోపాల్‌గౌడ్‌, శ్రీనివాస్‌గౌడ్‌, రవీందర్‌రెడ్డిలతోపాటు నాయకులు, కార్యకర్తలు, మాజీ ప్రజాప్రతినిధులు పాల్గొన్నారు.
