సీడ్‌ బీకేర్‌పుల్‌

ఒక వైపు వానకాలం సీజన్‌ సమీపిస్తుండడం, మరోవైపు ముందస్తు వర్షాలు కురుస్తుండడంతో రైతులు పొలం పను ల్లో బిజీబిజీగా ఉన్నారు. ముఖ్యంగా పంటల కోసం విత్తనాలు, ఎరువులు సిద్ధం చేసుకునేందుకు ఎరువులు, విత్తనాల దుకాణాలకు పరుగులు పెడుతున్నారు.

• విత్తన ప్యాకెట్ల కవర్లను జాగ్రత్త చేయాలి
• అమాయక అన్నదాతలే టార్గెట్‌గా దళారులు
• విత్తనాల ఎంపికలో జాగ్రత్తలు తప్పనిసరి
• రైతులకు నకిలీవి అంటగట్టే అవకాశం
• అంతంత మాత్రంగానే విజిలెన్స్‌ తనిఖీలు

రాజోళి, మే 30 : ఒక వైపు వానకాలం సీజన్‌ సమీపిస్తుండడం, మరోవైపు ముందస్తు వర్షాలు కురుస్తుండడంతో రైతులు పొలం పను ల్లో బిజీబిజీగా ఉన్నారు. ముఖ్యంగా పంటల కోసం విత్తనాలు, ఎరువులు సిద్ధం చేసుకునేందుకు ఎరువులు, విత్తనాల దుకాణాలకు పరుగులు పెడుతున్నారు. ఇదే అదునుగా భా వించి కొంత మంది దళారులు త మ జేబులు నింపుకొనేందుకు సిద్ధమవుతున్నారు. ముఖ్యంగా రైతులకు విత్తనాల ఎంపికలో సరైన అవగాహన లేకపోవడంతో చాలా వరకు షాపు యజమానులపై ఆధారపడి వారిని నమ్మకమైన విత్తనాలు ఇవ్వాలని కోరుతుండడంతో వారు ఏ కంపెనీ పడితే ఆ కంపెనీకి చెందిన విత్తనాలను రైతులకు అంటగడుతున్నారు.

దీంతో నకిలీ విత్తనాలు వేసుకొని సంవత్సరం పొడువుగా కష్టపడి పెట్టుబడులు పెట్టి చివరకు పంట పండక పీకలోతు కష్టాల్లో రైతులు మునిగిపోతున్నా రు. రైతుల నిరక్షరాస్యతను ఆసరా చేసుకొని అసలుదు ఏదో.. నకిలీ ఏదో గుర్తుపట్టలేనంతగా కంపెనీలు రకరకాల వెరైటీలతో ప్యాకింగ్‌లు చేసి గుర్తింపున్న వేరైటీల పేర్లు చెబుతూ వ్యాపారులు నకిలీల విత్తనాలను అంటగట్టి మోసాలకు పాల్పడుతున్నారు. ప్రస్తుతం గ్రామాల్లో కొంతమంది సీడ్‌ విత్తనాలు వేసిన వాటిని కంపెనీలకు ఇవ్వకుండా ఎలాంటి జీవో టీ టెస్టు చేయకుండా ఫ్యాకింగ్‌ చేసి రైతులకు కంపెనీ ధరలకు అమ్ముకుంటూ రైతులను నట్టేటా ముంచుతున్నారు.

రైతులకు అండగా ఉండాల్సిన టాస్క్‌ఫోర్స్‌ అధికారుల పర్యవేక్షణ లేకపోవడంతోనే రైతులు మోసపోతున్నారనే ఆ రోపణలు ఉన్నాయి. వ్యవసాయాధికారులు సైతం గ్రామాల్లో రైతులకు విత్తనాల ఎంపికలో తీసుకోవాల్సిన జాగ్రత్తలను వివరించడంతోపాటు అసలు విత్తనాలు ఏవో.. నకిలీవి ఏవో గుర్తించేందుకు అవగాహన కార్యక్రమాలు నిర్వహించాల్సిన అవసరం ఉన్నది.

విత్తనాల ఎంపికలో తీసుకోవాల్సిన జాగ్రత్తలు

• రైతులు విత్తనాలు కొనేటప్పుడు ప్రభుత్వ అనుమతి పొందిన డీలర్‌ వద్దనే విత్తనాలు కొనుగోలు చేయాలి.
• విత్తనాలు తీసుకునేటప్పుడు సంబంధిత డీలర్‌ నుంచి తప్పసరిగా రశీదు తీసుకోవాలి
• విత్తనాల ప్యాకెట్‌పై కంపెనీ పేరు, సీల్‌, తయారు చేసిన తేదీ, గడువు ముగిసే తేదీ, తేమ శాతం తప్పనిసరిగా చూసుకోవాలి.
• పొలంలో విత్తనాలు వేసిన అనంతరం డీలర్‌ ఇచ్చిన రశీదు, విత్తనాల ప్యాకెట్‌కు సంబంధించిన కవర్లను పంటలు పూర్తయ్యేవరకు జాగ్రత్తగా దాచుకోవాలి.
• నకిలీ విత్తనాలు డీలర్‌ నుంచి కొనుగోలు చేసినట్లు అయితే చట్టం ప్రకారం పంటలు నష్టపోయిన రైతులు సంబంధిత కంపెనీ నుంచి పరిహారం పొందే అవకాశం ఉంటుంది.