సుర్రుమంటోంది..

ముదురుతున్న ఎండలతో ప్రజలు బెంబేలెత్తుతున్నారు. అధిక ఉష్ణోగ్రతలు నమోదవుతున్న క్రమం లో పనుల నిమిత్తం బయటికి వచ్చే వారు వడదెబ్బకు గురవుతున్నారు. దీంతో ప్రజలు బయటకు వెళ్లాలంటే జంకాల్సిన పరిస్థితులు నెలకొన్నాయి.

• రోజురోజుకూ పెరుగుతున్న ఉష్ణోగ్రతలు
• వడదెబ్బకు గురవుతున్న ప్రజలు
• స్కార్ఫ్‌, రుమాలు వంటి వస్ర్తాలతో జాగ్రత్తలు
• చిన్నారులపై ప్రత్యేక శ్రద్ధ అవసరమంటున్న వైద్యులు

హన్వాడ/గద్వాల/గద్వాల టౌన్‌, ఏప్రిల్‌ 4 : ముదురుతున్న ఎండలతో ప్రజలు బెంబేలెత్తుతున్నారు. అధిక ఉష్ణోగ్రతలు నమోదవుతున్న క్రమం లో పనుల నిమిత్తం బయటికి వచ్చే వారు వడదెబ్బకు గురవుతున్నారు. దీంతో ప్రజలు బయటకు వెళ్లాలంటే జంకాల్సిన పరిస్థితులు నెలకొన్నాయి. ఉదయం 10గంటల నుంచే భానుడు ప్రతాపం చూపుతుండడంతో చిన్నారుల ఆరోగ్యంపై తీవ్ర ప్రభావం పడుతున్నది. ఉద్యోగులు, చిన్నచిన్న వ్యాపారాలు చేసుకునే వారు సైతం ఎండను తాళలేక ఇబ్బందులను ఎదుర్కొంటున్నారు. గ్రామీణ ప్రాంతాల్లో పశువులు, గొర్రెలను కాసే కాపరులు ఎండవేడిమిని తట్టుకోలేకపోతున్నారు. వడగాలులు వీస్తుండడంతో ప్రయాణికులు సైతం బయటకు వెళ్లాలంటే భయపడుతున్నారు. మధ్యాహ్నం సమయంలో ప్రజలెవరూ బయటికి రాకపోవడంతో రోడ్లన్నీ నిర్మానుష్యంగా మారుతున్నాయి. ఎండల దృష్ట్యా ప్రజలు తగిన జాగ్రత్తలు తీసుకోవాలని, లేదంటే శరీరంలో నీటిశాతం తగ్గి డీహైడ్రేషన్‌తో అనారోగ్యానికి గురయ్యే అవకాశాలున్నాయని వైద్యులు చెబుతున్నారు. వడదెబ్బ తగలకుం డా తీసుకోవాల్సిన జాగ్రత్తలను వివరిస్తున్నారు.

ప్రజలు జాగ్రత్తగా ఉండాలి

ఎండలు అధికంగా ఉండడంతో ప్రజలు జాగ్రత్తగా ఉం డాలి. ఎండ తగలకుండా స్కా ర్ఫ్‌, రుమాలు, క్యాప్‌, గొడుగు రక్షణగా ఉపయోగించాలి. అధిక ఉష్ణోగ్రతలు, వడగాల్పులకు వడదెబ్బ తగిలే అవకాశమున్నది. వడదెబ్బకు గురైతే వెంటనే దవాఖానకు తరలించి చికిత్స చేయించాలి.

– ప్రగతి, వైద్యాధికారి, హన్వాడ

వడదెబ్బ లక్షణాలు, కారణాలు

• శరీర ఉష్ణోగ్రత తీవ్రంగా పెరగడం.
• విపరీతమైన తలనొప్పి.
• నాడి వేగంగా కొట్టుకోవడం.
• నాలుక తడి ఆరిపోవడం.
• శరీరంలో నీటిశాతం తగ్గడం.
• వాంతులు, విరోచనాలు అవుతాయి.
• నీరు తక్కువగా తీసుకోవడం

తీసుకోవాల్సిన జాగ్రత్తలు..

• ఎండలు ఎక్కువగా ఉన్న సమయంలో బయట తిరగరాదు.
• తప్పని పరిస్థితుల్లో గొడుగు, తలకు టోపీ, ముఖానికి రుమాల్‌తో ఎండ తగలకుండా జాగ్రత్తలు తీసుకోవాలి.
• తెల్లని నూలు వస్ర్తాలు ధరించాలి.
• నీరు లేదా ఇతర ద్రవ పదార్థాలను వీలైనంత ఎక్కువగా తీసుకోవాలి.
• అతి చల్లని నీరు, పానీయాలు తీసుకోరాదు.
• వడదెబ్బకు గురైన వారిని సమీపంలోని పీహెచ్‌సీకి తీసుకెళ్లాలి.
• అత్యవసరమైతేనే బయటకు వెళ్లాలి.
• పిల్లలు, వృద్ధులు, అనారోగ్యంతో ఉన్న వారు జాగ్రత్తగా ఉండాలి.

ప్రథమ చికిత్స..

• వడదెబ్బకు గురైన వ్యక్తిని త్వరగా నీడ ఉన్న ప్రదేశంలోకి చేర్చాలి.
• చల్లని నీటిలో అద్దిన గుడ్డతో శరీరాన్ని తుడవాలి.
• కొబ్బరినీళ్లు, నిమ్మరసం, గ్లూకోజ్‌ లేదా ఓఆర్‌ఎస్‌ ద్రావణాన్ని తాగించాలి.
• ప్రథమ చికిత్స అనంతరం ఆరోగ్య కేంద్రానికి తరలించాలి.