భూమి రాణి

భూమి చలాకి పిల్లలా గుండ్రంగా తిరుగుతూ రాత్రి పగలు ఆడుకుంటోంది ! నిద్ర మాట ఎరుగదు !! వర్షంలో నానుతూ నానుతూ పచ్చపచ్చగా సింగారించుకొని భూమి పూలు పూలుగా భ్రమణం !

భూమి చలాకి పిల్లలా గుండ్రంగా తిరుగుతూ
రాత్రి పగలు ఆడుకుంటోంది !
నిద్ర మాట ఎరుగదు !!
వర్షంలో నానుతూ నానుతూ
పచ్చపచ్చగా సింగారించుకొని
భూమి పూలు పూలుగా భ్రమణం !

ఏ దేవుణ్ణి కొలుస్తుందో ఏ వ్రతమో
ఎప్పుడూ ఆత్మ ప్రదక్షిణే! ఆగేదే లేదు

ఆకాశం ఇచ్చిన ఇంద్రధనుస్సు పృథ్వికి కానుకగా
ఏడు వర్ణ వర్ణాల నగ !
మంచు తెరవేసుకుని సుస్పష్టంగా
ఎంత అందమో భూమి రాణిది !
అన్ని ఋతువులతో మమేకమై భూమి ఫలాలతో
ద్విగుణీకృత సౌందర్య ధామం !
ఇవన్నీ భూమి రాణి ఏం చేసుకుంటుంది
అందరికీ పంచేస్తుంది

ఏ దేశంలోని వారైనా భూమి తల్లికి
అందరూ బిడ్డలే !
భూమి తల్లిది ఏ మతమూ కాదు !
అసలు అందరికి ఇలవేలుపు భూమే కదా !
గాలి అగ్ని నీరుతో భూమి గనులు గనులుగా
కల్పతరువు అక్షయ పాత్ర !
ఎంత బరువైనా భూమాతకు మోయడమే ఆనందం !
తల్లి కదా ! ఎప్పుడూ తల్లడిల్లదు !!

– కందాళై రాఘవాచార్య 87905 93638