సింక్‌.. సింపుల్‌గా క్లీన్‌

ఇప్పుడు చాలా ఇండ్లల్లో స్టెయిన్‌లెస్‌ స్టీల్‌ సింక్‌ను ఏర్పాటు చేసుకుంటున్నారు. శుభ్రం చేయడానికి అనుకూలంగా, చూడటానికి అందంగా ఉంటాయివి. అయితే, నిర్వహణ సరిగ్గా లేకపోతే.. అందవిహీనంగా తయారై ఎబ్బెట్టుగా కనిపిస్తాయి.

ఇప్పుడు చాలా ఇండ్లల్లో స్టెయిన్‌లెస్‌ స్టీల్‌ సింక్‌ను ఏర్పాటు చేసుకుంటున్నారు. శుభ్రం చేయడానికి అనుకూలంగా, చూడటానికి అందంగా ఉంటాయివి. అయితే, నిర్వహణ సరిగ్గా లేకపోతే.. అందవిహీనంగా తయారై ఎబ్బెట్టుగా కనిపిస్తాయి. అలా కాకుండా ఉండాలంటే.. ఈ కింది టిప్స్‌ పాటించాల్సిందే!

• బ్లీచ్‌, క్లోరిన్‌, ఇతర రసాయన పదార్థాలను సింక్‌లో ఎక్కువసేపు ఉంచకూడదు. అలాచేస్తే.. సింక్‌ మెరుపు తగ్గుతుంది.
• స్టీల్‌, ఐరన్‌ స్క్రబర్స్‌తో సింక్‌ను క్లీన్‌ చేస్తే.. దానిపై గీతలు పడతాయి. కాబట్టి వాటిని వాడకపోవడమే మంచిది.
• సింక్‌లో నీళ్లు ఎక్కువగా నిల్వ ఉండకుండా చూసుకోవాలి.
• రసాయన లిక్విడ్‌ వాష్‌, డిటర్జెంట్లు వాడి క్లీన్‌ చేస్తే.. సింక్‌ నాణ్యత దెబ్బతింటుంది. అందుకే.. సహజసిద్ధమైన పదార్థాలతోనే శుభ్రం చేసుకోవాలి. బేకింగ్‌ సోడా, వెనిగర్‌, నిమ్మకాయలు, నారింజ తొక్కలతో స్టీల్‌ సింక్‌ను సులభంగా శుభ్రం చేసుకోవచ్చు.
• సింక్‌లో అప్పుడప్పుడూ గోరువెచ్చని నీళ్లు పోస్తూ ఉండాలి. దీనివల్ల డ్రెయిన్‌లో చిక్కుకున్న వ్యర్థాలు తొలగిపోతాయి. సింక్‌ నుంచి దుర్వాసన రావడం తగ్గుతుంది.
• ఒక స్ప్రే బాటిల్‌లో వైట్‌ వెనిగర్‌, నీళ్లను సమానంగా తీసుకోవాలి. శుభ్రంగా కడిగిన సింక్‌పై ఈ మిశ్రమాన్ని స్ప్రే చేసి, మెత్తని స్పాంజ్‌తో తుడిస్తే.. సింక్‌ తళతళా మెరిసిపోతుంది. దుర్వాసన దూరమవుతుంది.
• ఒక గిన్నెలో రెండు టేబుల్‌ స్పూన్‌ల బేకింగ్‌ సోడా, నాలుగు టేబుల్‌ స్పూన్‌ల వెనిగర్‌ వేసి బాగా కలపాలి. పాత టూత్‌బ్రష్‌ సాయంతో ఈ మిశ్రమాన్ని సింక్‌ మొత్తానికీ పట్టించాలి. పావు గంట తరువాత మెత్తని స్క్రబ్బర్‌తో రుద్దితే.. మరకలు వదిలిపోతాయి.
• సింక్‌ మరకలపై నిమ్మరసాన్ని పిండాలి. కొద్దిసేపటి తర్వాత బ్రష్‌తో రుద్ది.. గోరువెచ్చని నీటితో కడగాలి.