జుట్టుకు కొరియా మెరుపు..

కొరియన్‌ బ్యూటీకేర్‌ ఇప్పుడు ట్రెండింగ్‌. కె డ్రామాలు, కె పాప్‌లు చూసి అక్కడి వాళ్ల అందానికి పడిపోతున్నారు మన వాళ్లు.

కొరియన్‌ బ్యూటీకేర్‌ ఇప్పుడు ట్రెండింగ్‌. కె డ్రామాలు, కె పాప్‌లు చూసి అక్కడి వాళ్ల అందానికి పడిపోతున్నారు మన వాళ్లు. చర్మ సౌందర్యం గురించే కాదు కొరియన్‌ శిరోజాల మెరుపు వెనుక ఉన్న సీక్రెట్‌ ఇన్‌గ్రీడియంట్స్‌ ఏంటనీ వెతుకుతున్నారు. మీకూ ఆ కుతూహలం ఉంటే ఇదిగో ఆ దినుసులు…

జిన్‌సెంగ్‌: వెంట్రుకల కుదుళ్లను బలోపేతం చేసేందుకు సాయపడే ఒక చెట్టు వేరు ఇది. తలపై చర్మపు రక్త సరఫరాను మెరుగు పరచి,వెంట్రుకలు పెరిగేందుకు తోడ్పడుతుంది. చర్మాన్ని పునరుత్తేజితం చేసి, కుదుళ్లు బలంగా ఉండేలా చేస్తుంది.

వెదురు సారం (బ్యాంబూ ఎక్స్‌ట్రాక్ట్‌): ఇందులో పుష్కలంగా ఉండే సిలికా శిరోజాలను దృఢంగా తయారు చేస్తుంది. వెంట్రుకలకు బయటి నుంచి రక్షణ వలయాన్ని ఏర్పరచి, చిట్లకుండా, ఆరోగ్యంగా పెరిగేలా సహకరిస్తుంది

సుబాకి (కెమీలియా ఆయిల్‌): దీన్ని కెమీలియా నూనె అని కూడా పిలుస్తారు. ఈ నూనెలో ఉండే ఓలిమెక్‌ ఆసిడ్‌, ఆంటీ ఆక్సిడెంట్లు వెంట్రుకల్లో తేమను పట్టి ఉంచి, పొడిబారనివ్వకుండా చేస్తాయి. వాటిని మృదువుగా, కాంతిమంతంగానూ చేస్తాయి.

ప్రపోలిస్‌ : తేనెటీగలు తయారు చేసే ఒక జిగురులాంటి పదార్థం ఇది. ఇందులో ఉండే యాంటి బ్యాక్టీరియల్‌, యాంటి ఇన్‌ఫ్లమేటరీ గుణాలు తల మీది చర్మాన్ని ఆరోగ్యంగా ఉంచుతూ వెంట్రుకలు పెరిగేందుకు తోడ్పడతాయి. జుట్టు రాలడాన్ని నియంత్రిస్తాయి.

బియ్యపు నీళ్లు: కొరియన్‌ స్కిన్‌కేర్‌లో ప్రధానంగా కనిపించే బియ్యపు నీళ్లను జుట్టు నిగారింపు కోసమూ వాడతారు. ఇందులోని అమైనో ఆసిడ్లు, విటమిన్‌, మినరల్స్‌ జుట్టుకు పోషణనందించి దృఢంగా మెరిసేలా చేస్తాయి. సాగే గుణాన్ని పెంచి వెంట్రుకలు చిట్లకుండా కాపాడతాయి.