జుట్టుకు చేటు..

వేసవిలో చెమట ఎక్కువగా పడుతుంది. దాంతో రోజుకు రెండుసార్లయినా స్నానం చేయాల్సి వస్తుంది. కొందరికి ఎండల్లో ప్రతిరోజూ తలస్నానం చేయడం అలవాటు ఉంటుంది.

వేసవిలో చెమట ఎక్కువగా పడుతుంది. దాంతో రోజుకు రెండుసార్లయినా స్నానం చేయాల్సి వస్తుంది. కొందరికి ఎండల్లో ప్రతిరోజూ తలస్నానం చేయడం అలవాటు ఉంటుంది. అయితే, ఇలా రోజూ తలస్నానం చేయడం.. జుట్టుకు చేటు చేస్తుంది. అలాకాకుండా ఉండాలంటే.. కొన్ని జాగ్రత్తలు తీసుకోవడం తప్పనిసరి.

• తలస్నానానికి ముందే జుట్టును చిక్కులు లేకుండా బాగా దువ్వుకోవాలి. దీనివల్ల జుట్టు రాలడం తగ్గుతుంది. బిరుసుగా ఉండే వెంట్రుకలు తెగిపోకుండా ఉంటాయి.
• చాలామందికి తలస్నానం అంటే.. ఏదో ఒక షాంపూతో జుట్టును కడిగేసుకోవడమే! కానీ, తలస్నానం చేశాక జుట్టుకు కండిషనర్‌ రాసుకోవడం అన్నిటికన్నా ముఖ్యం. కండిషనర్‌తో వెంట్రుకల చివర్లు చిట్లకుండా కాపాడుకోవచ్చు. కురులు తేమను కోల్పోకుండా, మృదువుగా ఉంచడంలోనూ కండిషనర్‌ ముందుంటుంది.
• ఇక తలస్నానం కాగానే.. జుట్టును దువ్వడం చేయకూడదు. తలస్నానం తర్వాత కుదుళ్లు మెత్తబడి ఉంటాయి. ఇలాంటప్పుడు తల దువ్వితే.. వెంట్రుకలు ఎక్కువగా రాలిపోయే ప్రమాదం ఉంటుంది. అందుకే.. జుట్టు బాగా ఆరిన తర్వాతే దువ్వెనకు పనిచెప్పాలి.
• జుట్టును ఆరబెట్టుకోవడానికి డ్రయర్స్‌, బ్లోయర్స్‌ వంటివి వాడటం కూడా మంచిదికాదు. వీటివల్ల జుట్టు సహజసిద్ధమైన తేమను కోల్పోతుంది.