మానసికంగా దృఢంగా!

ఫిట్‌నెస్‌ అంటే.. కేవలం శారీరకంగానే కాదు, మానసికంగానూ ఆరోగ్యంగా ఉండటం. జిమ్‌లో బరువులు ఎత్తితే కండరాలు బలపడతాయి. శరీర అవయవాలు దృఢంగా తయారవుతాయి. అదే ‘మానసిక కండరాలు’ బలోపేతం చేస్తే.. జ్ఞాపకశక్తి, శ్రద్ధ, మెదడు వేగం, మానవ నైపుణ్యాలు, తెలివితేటలు మెరుగుపడతాయి.

ఫిట్‌నెస్‌ అంటే.. కేవలం శారీరకంగానే కాదు, మానసికంగానూ ఆరోగ్యంగా ఉండటం. జిమ్‌లో బరువులు ఎత్తితే కండరాలు బలపడతాయి. శరీర అవయవాలు దృఢంగా తయారవుతాయి. అదే ‘మానసిక కండరాలు’ బలోపేతం చేస్తే.. జ్ఞాపకశక్తి, శ్రద్ధ, మెదడు వేగం, మానవ నైపుణ్యాలు, తెలివితేటలు మెరుగుపడతాయి. శరీరాన్ని ఫిట్‌గా ఉంచుకోవడానికి జిమ్‌, రన్నింగ్‌, యోగాను ఆశ్రయిస్తాం. మరి.. మనస్సుకు ఎలాంటి వ్యాయామం చేయాలో నిపుణులు ఇలా చెబుతున్నారు.

• మెంటల్‌ ఫిట్‌నెస్‌లో ‘ఓర్పు’ అనేది చాలాముఖ్యం. జీవితంలో ప్రతికూలతలు ఎదురైనప్పుడు ఈ ఓర్పే మిమ్మల్ని స్థిరంగా ఉంచుతుంది. దీర్ఘ శ్వాస తీసుకోవడం, ప్రకృతిలో నడక వంటివి ఉద్వేగభరితంగా స్పందించడాన్ని తగ్గిస్తాయి. భావోద్వేగాలను ప్రాసెస్‌ చేయడంలో సాయపడతాయి.
• పుస్తకాలతో అనంతమైన సమాచారం అందుతుంది. మెదడుకు కావాల్సినంత మేత దొరుకుతుంది. చారిత్రక కల్పనలు మొదలుకొని సమకాలీన క్లాసిక్స్‌ వరకు.. అన్నిరకాల అంశాలను చదవడం అలవాటు చేసుకోండి. దాంతో మీ మెదడు విభిన్న కాలాలు, సంస్కృతులు, వ్యక్తులను ఊహించుకుంటూ..కొత్త విషయాలను నేర్చుకుంటూ, పదజాలాన్ని పెంచుకుంటూ తగినంత వ్యాయామం పొందుతుంది.
• శారీరక ఫిట్‌నెస్‌కు మాత్రమే కాదు.. మానసిక ఫిట్‌నెస్‌కూ ‘విశ్రాంతి’ చాలా అవసరం. ప్రియమైనవారితో సమయం గడపడం, అభిరుచులను ఆస్వాదిస్తూ.. మనసుకు తగినంత విశ్రాంతి ఇవ్వాలి.
• ప్రశాంతంగా ఉండటానికి ధ్యానం చేయడం అలవాటుగా మార్చుకోవాలి.
• సమతుల ఆహారం తీసుకోవడం, తగినంత నిద్రపోవడం కూడా భావోద్వేగ ఆరోగ్యానికి చాలా మేలుచేస్తుంది.
• మెదడు పనితీరును మెరుగుపరిచే క్రాస్‌వర్డ్‌ పజిల్స్‌ నింపడం, సుడోకులాంటి లాజిక్‌ గేమ్స్‌ను ఆడుతుండాలి.
• ప్రతి ఒక్కరి మెదడు వయసుతో సంబంధం లేకుండా ఏ సమయంలోనైనా కొత్త నైపుణ్యాలను నేర్చుకోగలదు. అందుకే.. ఇప్పుడే ఏదో ఒక కొత్త పనిని నేర్చుకోవడానికి ప్రయత్నించండి. అప్పుడు మెదడులోని అన్ని ప్రాంతాలూ చురుగ్గా పనిచేస్తాయి. మనసూ చురుకుగా ఉంటుంది.