డార్క్‌ చాక్లెట్‌.. కొంచెంగా తిందాం!

చాక్లెట్‌ అనగానే నోటిని తీపి చేసే పదార్థమే అనుకుంటాం. కానీ, ఆ తీపిలోనే చేదు ఉంటుంది. నిజానికి చేదు కూడా మనిషి ఆరోగ్యానికి మంచే చేస్తుంది కదా. అలా ఈ డార్క్‌ చాక్లెట్‌ కూడా ఆనందాన్ని పంచడమే కాకుండా ఆరోగ్యాన్నీ కాపాడుతుంది.

చాక్లెట్‌ అనగానే నోటిని తీపి చేసే పదార్థమే అనుకుంటాం. కానీ, ఆ తీపిలోనే చేదు ఉంటుంది. నిజానికి చేదు కూడా మనిషి ఆరోగ్యానికి మంచే చేస్తుంది కదా. అలా ఈ డార్క్‌ చాక్లెట్‌ కూడా ఆనందాన్ని పంచడమే కాకుండా ఆరోగ్యాన్నీ కాపాడుతుంది. మరి ఈ డార్క్‌ చాక్లెట్‌.. బ్రైట్‌ సీక్రెట్స్‌ తెలుసుకుందామా..

డార్క్‌ చాక్లెట్‌ను 60-90 శాతం కొకోవా పౌడర్‌, తక్కువ మోతాదులో చక్కెర కలిపి తయారు చేస్తారు. కానీ, వైట్‌ (మిల్క్‌) చాక్లెట్‌ కంటే ఇందులో తక్కువ చక్కెర ఉంటుంది. వీటిలో ఫ్లేవనాయిడ్స్‌ లాంటి యాంటి ఆక్సిడెంట్స్‌ పుష్కలంగా ఉంటాయి.

ఆరోగ్య ప్రయోజనాలు

• డార్క్‌ చాక్లెట్లోని ఫ్లేవనాయిడ్స్‌ గుండె ఆరోగ్యాన్ని కాపాడతాయి. ఇవి రక్తపోటు తగ్గించడంతో పాటు రక్త ప్రసరణను మెరుగుపరుస్తాయి. ఈ చాక్లెట్‌ చెడు కొలెస్ట్రాల్‌ స్థాయులను తగ్గించి, మంచి కొలెస్ట్రాల్‌ను పెంచుతుంది.
• ఈ డార్క్‌ చాక్లెట్స్‌ న్యూరోప్లాస్టిసిటీని ప్రోత్సహించడం ద్వారా జ్ఞాపకశక్తి మెరుగుపడుతుంది. అలాగే అల్జీమర్స్‌, పార్కిన్సన్స్‌ వ్యాధుల ప్రమాదాన్ని తగ్గిస్తాయి.
• డార్క్‌ చాక్లెట్స్‌ ఒత్తిడి హార్మోనైన కార్టిసోల్‌ స్థాయులను తగ్గిస్తాయి. అలాగే వీటిని తినడంవల్ల ఎండార్ఫిన్స్‌, సెరోటోనిన్‌ వంటి హ్యాపీ హార్మోన్లు విడుదల అవుతాయి.
• కొకోవాలోని ఎపికాటెచిన్‌ అనే పదార్థం.. శరీరం ఇన్సులిన్‌ను మరింత ఎక్కువగా ఉపయోగించుకునేలా చేస్తుంది. చాక్లెట్‌ తినని వారితో పోలిస్తే, వారానికి కనీసం 140 గ్రాముల డార్క్‌ చాక్లెట్‌ తినేవారికి మధుమేహం వచ్చే ప్రమాదం 21శాతం తక్కువని హార్వర్డ్‌ హెల్త్‌ పబ్లిషింగ్‌ అధ్యయనంలో తేలింది.
• డార్క్‌ చాక్లెట్స్‌లోని థియోబ్రొమైన్‌ అనే పదార్థం దంతాలకు రక్షణగా నిలుస్తుంది. అలాగే వీటిలో మెగ్నీషియం, ఐరన్‌, జింక్‌, క్యాల్షియం ఉండటంతో, ఎముకల బలానికి తోడ్పడతాయి.

అపోహలు

• చక్కెర ఉండదు: తప్పు.. డార్క్‌ చాక్లెట్స్‌లో చక్కెర ఉంటుంది. కానీ, మిల్క్‌ చాక్లెట్‌ కంటే తక్కువ మోతాదులో ఉపయోగిస్తారు.
• అన్నీ ఆరోగ్యకరమే: కాదు.. 70 శాతానికి పైగా కొకోవా ఉన్న డార్క్‌ చాక్లెట్లే మంచివి. మార్కెట్లో దొరికే చాలా చాక్లెట్లలో అధిక మోతాదులో చక్కెర కలుపుతున్నారు.
• కెఫిన్‌ ఉండదు: అవాస్తవం.. డార్క్‌ చాక్లెట్లలో కెఫిన్‌ ఉంటుంది. కాకపోతే కాఫీ కంటే తక్కువగా ఉంటుంది.
• పండ్లకు ప్రత్యామ్నాయం: అబద్ధం.. ఇందులో యాంటి ఆక్సిడెంట్లు పుష్కలంగా ఉన్నా, ఇవి సమతుల్యమైన ఆహారాన్ని భర్తీ చేయలేవు.

ప్రపంచ వ్యాప్తంగా పాపులరే

మెక్సికో: మెక్సికో చుట్టుపక్కల ఉండే కొన్ని తెగల ప్రజలు కొకోవాను దేవుని వరంగా భావిస్తారు. వారు నిర్వహించే పూజల్లో కొకోవాను వినియోగించేవారట.

ఘనా-ఐవనీ కోస్ట్‌: ఈ రెండు దేశాల్లో ప్రపంచంలోనే అతిపెద్ద కొకోవా ఉత్పత్తిదారులు ఉన్నారు. ప్రపంచ అవసరాల్లో 60 శాతం కొకోవా సరఫరా ఇక్కడి నుంచే జరుగుతుంది.

జపాన్‌: ఇక్కడ వాలెంటైన్స్‌ డే నాడు ‘గిరి చోకో’ అనే సంప్రదాయం పాటిస్తారు. ఆనాడు యువతులు తమకు ఇష్టమైనవారికి డార్క్‌ చాక్లెట్‌ బహుమతిగా ఇస్తారు.