అందానికి కీరా!

వేసవిలో విరివిగా దొరికే కీరదోస.. మండే ఎండల నుంచి రక్షణ కల్పిస్తుంది. ఇటు ఆరోగ్యానికి భరోసా ఇవ్వడంతోపాటు.. అటు అందానికీ అండగా నిలుస్తుంది.

వేసవిలో విరివిగా దొరికే కీరదోస.. మండే ఎండల నుంచి రక్షణ కల్పిస్తుంది. ఇటు ఆరోగ్యానికి భరోసా ఇవ్వడంతోపాటు.. అటు అందానికీ అండగా నిలుస్తుంది. ఇందులోని సహజసిద్ధమైన సుగుణాలు.. మేనికి కొత్త మెరుపును తీసుకొస్తాయి. కీరదోసను తీసుకోవడం, వీటితో తయారైన ఉత్పత్తులను వాడటం వల్ల చర్మ సౌందర్యం మెరుగుపడుతుంది.

• ఎండలకు అలసిపోయిన కళ్లకు ఉపశమనం కలిగించడంలో, కళ్ల కింది నల్లటి వలయాలను నిర్మూలించడంలో కీరదోస సమర్థంగా పనిచేస్తుంది. కళ్లు ఉబ్బినట్టుగా ఉంటే.. కీరదోస ముక్కల్ని కళ్లపై కాసేపు పెట్టుకుంటే మంచి ఫలితం కనిపిస్తుంది. అందుకే, ఎలాంటి ఫేషియల్‌ వేసుకున్నా.. కళ్లపై దోసకాయ ముక్కలు పెట్టుకోవడం మాత్రం కామన్‌. దోసకాయలో లభించే విటమిన్‌ కె.. రక్త ప్రసరణను మెరుగుపరుస్తుంది. ఇన్‌ఫ్లమేషన్‌ను తగ్గిస్తుంది. ఇందులోని విటమిన్‌ సి, విటమిన్‌ ఇ.. చర్మాన్ని కాంతిమంతంగా మారుస్తాయి.
• కీరదోసలో కొలాజెన్‌ ఉత్పత్తిని పెంచే లక్షణం ఉంటుంది. దాంతో ముడతలను తగ్గిస్తుంది. వృద్ధాప్య లక్షణాలను దూరం చేస్తుంది. దీన్ని రెగ్యులర్‌గా తీసుకుంటే.. ముఖం కాంతిమంతంగా, మరింత యవ్వనంగా కనిపిస్తుంది.
• కీరదోసల్లో దాదాపు 95శాతం నీరే ఉంటుంది. ఇది ఎండలకు కందిపోయిన చర్మానికి ఉపశమనం కలిగిస్తుంది. ఇందులో అధిక మొత్తంలో లభించే యాంటి ఆక్సిడెంట్లు, యాంటి ఇన్‌ఫ్లమేటరీ లక్షణాలు.. చర్మం ఎర్రబడటాన్ని తగ్గిస్తాయి.
• ఇందులోని హైడ్రేటింగ్‌ సుగుణాలు.. పొడి చర్మం సమస్యకు పరిష్కారం చూపుతాయి. చర్మాన్ని మృదువుగా మారుస్తాయి.
• మొటిమలను తగ్గించడంలోనూ దోసకాయ ముందుంటుంది. మొటిమల వల్ల కలిగే మంట, ఎరుపు, చికాకును తగ్గిస్తుంది. చర్మంపై ఉండే మృతకణాలను తొలగించి.. మూసుకుపోయిన చర్మ రంధ్రాలను తెరిపించే సహజమైన క్లెన్సర్‌గానూ పనిచేస్తుంది. భవిష్యత్తులోనూ మొటిమలు రాకుండా చూస్తుంది.
• దోసకాయలో యాంటి ఆక్సిడెంట్‌ లక్షణాలు పుష్కలం. ఇవి శరీరంలోని ఫ్రీ రాడికల్స్‌ను ఎదుర్కోవడంలో సాయపడతాయి. చర్మంపై ఒత్తిడిని తగ్గించి.. గీతలు, ముడతలు, నల్ల మచ్చలు రాకుండా చూస్తాయి.
• దోసకాయ తొక్కలో విటమిన్‌ కె, విటమిన్‌ సి, కాల్షియం, పొటాషియం, పీచు అధికంగా లభిస్తాయి. ఇవి చర్మ ఆరోగ్యానికి భరోసా ఇస్తాయి. కాబట్టి, కీరదోసలను తొక్కతోనే తినేయడం మంచిది.