కార్నివోర్‌.. పరేషాన్‌!

ఇప్పుడు ఎక్కడ చూసినా ‘కార్నివోర్‌ డైట్‌' గురించే చర్చ! ఫిట్‌నెస్‌ ప్రపంచంలో ఇదో హాట్‌టాపిక్‌. ప్లేట్‌లో నుంచి పప్పు, అన్నం, కూరగాయలను తీసేసి.. కేవలం చికెన్‌, మటన్‌, గుడ్లతోనే కడుపు నింపుకొనే ఈ ట్రెండ్‌ మనదేశంలో కూడా వేగంగా పాకుతున్నది.

ఇప్పుడు ఎక్కడ చూసినా ‘కార్నివోర్‌ డైట్‌’ గురించే చర్చ! ఫిట్‌నెస్‌ ప్రపంచంలో ఇదో హాట్‌టాపిక్‌. ప్లేట్‌లో నుంచి పప్పు, అన్నం, కూరగాయలను తీసేసి.. కేవలం చికెన్‌, మటన్‌, గుడ్లతోనే కడుపు నింపుకొనే ఈ ట్రెండ్‌ మనదేశంలో కూడా వేగంగా పాకుతున్నది. కానీ, కేవలం ముక్కలు తింటే ముచ్చటైన శరీరం వస్తుందా? లేక లేనిపోని రోగాలు కొనితెచ్చుకున్నట్టేనా? ఓ ఫిట్‌నెస్‌ ఫ్రీకర్‌గా మీరు తెలుసుకోవాల్సిన ఈ ‘మీట్‌-ఓన్లీ’ డైట్‌లోని లోగుట్టు ఏంటో చూద్దాం!!

కార్నివోర్‌

డైట్‌ అనేది ఓ ‘ఎక్స్‌ట్రీమ్‌ ఎలిమినేషన్‌’ డైట్‌. అంటే ప్రకృతి మనకిచ్చిన ఆకుకూరలు, పండ్లు, పప్పు ధాన్యాలను పూర్తిగా పక్కన పెట్టేసి.. కేవలం
జంతువుల నుంచి వచ్చే ఆహారం మీదనే బతకడం. ఈ డైట్‌ పాటించే వారు కార్బోహైడ్రేట్లను సున్నా చేస్తారు. దీనివల్ల మన బాడీ శక్తి కోసం కొవ్వును కరిగించడం మొదలుపెడుతుంది. అందుకే చాలామందికి ఇది బరువు తగ్గడానికి షార్ట్‌కట్‌లా కనిపిస్తున్నది.

మీ బాడీ తట్టుకోగలదా?

• బరువు తగ్గడం సంగతి పక్కన పెడితే, ఈ డైట్‌ వల్ల శరీరంలో వచ్చే మార్పులు అందరికీ ఒకేలా ఉండవు. ఇందులో పీచు పదార్థం సున్నా. దీంతో జీర్ణవ్యవస్థ తీవ్రమైన ఒత్తిడికి గురవుతుంది.
• పండ్లు, కూరగాయలు మానేయడం వల్ల విటమిన్‌-సి లాంటి ముఖ్యమైన పోషకాలు అందవు. ఇది రోగనిరోధక శక్తిని తగ్గిస్తుంది. రోజూ మాంసం తినడం వల్ల కిడ్నీలపై భారం పెరగడమే కాకుండా, రక్తంలో చెడు కొలెస్ట్రాల్‌ పెరిగి గుండెపోటుకు దారి తీస్తుంది.
• ప్రారంభంలో బరువు తగ్గినట్లు అనిపించినా, అది కేవలం శరీరంలోని వాటర్‌ వెయిట్‌ మాత్రమే కావొచ్చు. దీర్ఘకాలంలో ఇది పేగుల ఆరోగ్యాన్ని దెబ్బతీస్తుందని నిపుణులు హెచ్చరిస్తున్నారు.
• సోషల్‌ మీడియాలో కనిపించే ప్రతి ఫిట్‌నెస్‌ ట్రెండ్‌ అందరికీ సెట్‌ అవ్వదు. ముఖ్యంగా మన భారతీయ వాతావరణంలో సమతుల్య ఆహారమే మనల్ని కాపాడుతుందనేది నిపుణుల మాట.

దీర్ఘకాలిక సమస్యలు

జీర్ణక్రియ సమస్యలు: ఫైబర్‌ (పీచు) లేకపోవడం వల్ల తీవ్రమైన మలబద్ధకం ఏర్పడుతుంది.

గుండె జబ్బులు: చెడు కొలెస్ట్రాల్‌ పెరిగి గుండె పోటు ముప్పు పొంచి ఉంటుంది.

పోషకాహార లోపం: విటమిన్‌-సి, మెగ్నీషియం, ఫోలేట్‌ లాంటి ముఖ్యమైన పోషకాలు అందకపోవడంతో రోగనిరోధక వ్యవస్థ దెబ్బతింటుంది.

కిడ్నీలపై ఒత్తిడి: అతిగా ప్రొటీన్‌ తీసుకోవడం వల్ల కిడ్నీల్లో రాళ్లు ఏర్పడే అవకాశం ఉంది.

దేశీయంలోనే ఆరోగ్యం

ఇండియాలో భోజనం అంటేనే రంగురంగుల కూరలు, పప్పులు, పెరుగుతో కూడిన ఓ సంపూర్ణ ఆహారం. ఇక్కడ కార్నివోర్‌ డైట్‌ పాటించడం ఓ పెద్ద సవాల్‌. నాణ్యమైన మాంసాన్ని రోజూ మూడు పూటలా తినడం అనేది సామాన్యుడి జేబుకు చిల్లు పెట్టడమే. పైగా మన జీవక్రియకు కావాల్సిన ఫైబర్‌ పప్పులు, ఆకుకూరల నుంచే వస్తుంది. వీటిని వదిలేయడం వల్ల అలసట, నీరసం ఆవహిస్తాయి. అంతేకాదు, మన దేశంలో వాతావరణ పరిస్థితుల నేపథ్యంలో.. అతిగా మాంసాహారం తింటే డీహైడ్రేషన్‌కు గురయ్యే ప్రమాదమూ ఉంటుంది.

వినండి బాస్‌..

ఫిట్‌నెస్‌ అంటే ఒక రకమైన ఆహారాన్ని పూర్తిగా పాటించడమో, త్యజించడమో కాదు. నిపుణుడి సలహా మేరకు అన్నిరకాల పోషక విలువలు ఉన్న ఆహారాన్ని డైట్‌లో భాగం చేసుకోవాలి.