మరింత లోతుగా.. స్పష్టంగా!

కొన్ని చిత్రాలు చూడగానే అర్థంకావు. లోతుగా పరిశీలిస్తేనే.. వాటిలో అద్భుతం ఆవిష్కృతం అవుతుంది. చిత్రకళలోనే కాదు.. ఫొటోగ్రఫీలోనూ అలాంటి శైలి ఒకటి ఉంది. అదే.. అబ్‌స్ట్రాక్ట్‌ డిటెయిల్స్‌ ఫొటోగ్రఫీ!

కొన్ని చిత్రాలు చూడగానే అర్థంకావు. లోతుగా పరిశీలిస్తేనే.. వాటిలో అద్భుతం ఆవిష్కృతం అవుతుంది. చిత్రకళలోనే కాదు.. ఫొటోగ్రఫీలోనూ అలాంటి శైలి ఒకటి ఉంది. అదే.. అబ్‌స్ట్రాక్ట్‌ డిటెయిల్స్‌ ఫొటోగ్రఫీ! ఈ రకమైన ఫొటోగ్రఫీలో సబ్జెక్టు (వస్తువు) ఏమిటి? అనేదాని కంటే.. అది ఎలా కనిపిస్తున్నది? అనేదే ముఖ్యం. ఇందులో సబ్జెక్టుకు చెందిన లోతైన రూపాలు, నమూనాలను స్పష్టంగా క్యాప్చర్‌ చేయాల్సి ఉంటుంది. సబ్జెక్ట్‌ ఫామేషన్‌, కలర్‌, టెక్చర్‌, షాడోస్‌ వంటి అంశాలపై ప్రత్యేకంగా దృష్టిపెట్టాలి.

అబ్‌స్ట్రాక్ట్‌ డిటెయిల్స్‌ ఫొటోగ్రఫీ అంటే..

• వస్తువుల ప్రత్యేక భాగాలు (కోణాలు, ఆకారాలు, నమూనాలు) ప్రత్యేకంగా కనిపించేలా ఫొటోలు తీయడం.
• కంటికి సాధారణంగా కనిపించేదాన్ని కూడా.. అసాధారణంగా చూపించడం.
• వస్తువు అసలు రూపం మీద కాకుండా.. దాని ఇంప్రెషన్‌ మీదికి వీక్షకుల దృష్టిని మరల్చడం.

ఉదాహరణకు :

• పాత గోడలపై రంగులూడిపోయిన ప్రాంతం.
• అడ్డంగా నరికేసిన చెట్టు దుంగ.
• పండుటాకుపై కనిపించే పగుళ్లు.
• గాజు కిటికీల మీది నీటి బిందువులు.

కావాల్సినవి

• మంచి రిజల్యూషన్‌ కెమెరా కలిగిన మొబైల్‌ ఫోన్‌.
• మ్యాక్రో మోడ్‌ లేదా జూమ్‌ ఆప్షన్‌.
• సహజకాంతి (సాధ్యమైనంత వరకు).
• వస్తువును విభిన్న కోణాల్లో గమనించే నైపుణ్యం. దాన్ని ఏ యాంగిల్‌లో చూస్తే ప్రత్యేకంగా కనిపిస్తుందో ఊహించే శక్తి.

కెమెరా సెట్టింగ్స్‌ :

స్మార్ట్‌ఫోన్‌ కెమెరాలో ‘ప్రొ మోడ్‌’ ఉంటే ఆన్‌ చేసుకుంటే మంచిది.

• ఫోకస్‌ : మాన్యువల్‌ ఫోకస్‌ను ఎంచుకోవాలి. లేదా ఫోన్‌ స్క్రీన్‌పై కనిపించే సబ్జెక్ట్‌ మీద ట్యాప్‌ చేస్తే.. సబ్జెక్ట్‌ మరింత క్లియర్‌గా కనిపిస్తుంది.
• ఐఎస్‌ఓ : ఫొటోల్లో నాయిస్‌ రాకుండా ఉండేందుకు ఐఎస్‌ఓను తక్కువగా ఉంచండి. 100 – 200లోపే ఉంటే.. ఫొటోలు మరింత స్పష్టంగా వస్తాయి.
• ఎక్స్‌పోజర్‌ : లైటింగ్‌ను బట్టి అడ్జస్ట్‌ చేసుకోవాలి.
• వైట్‌ బ్యాలెన్స్‌ : నేచురల్‌/ మాన్యువల్‌.. ప్రకారం మార్చుకోవచ్చు.
• మ్యాక్రో మోడ్‌ : క్లోజ్‌ అప్‌ షాట్స్‌ తీసుకోవడానికి.

అబ్‌స్ట్రాక్ట్‌ ఫొటోగ్రఫీ టిప్స్‌

1. సాధారణ వస్తువుల్లోనూ అసాధారణ యాంగిల్స్‌ కనిపెట్టండి. కనిపించిన ప్రతి వస్తువునూ వివిధ యాంగిల్స్‌లో గమనిస్తుండండి.
2. డిటెయిల్స్‌ స్పష్టంగా రావాలంటే.. సబ్జెక్ట్‌కు మరింత దగ్గరగా వెళ్లండి. జూమ్‌, మ్యాక్రో మోడ్‌ను ఉపయోగించండి.
3. సబ్జెక్ట్‌పై కాంతి పడే దిశను మార్చి.. సరికొత్త రూపాన్ని క్యాప్చర్‌ చేయండి. ఇందుకోసం లైట్‌ అండ్‌ షాడోస్‌ను వాడుకోండి.
4. సబ్జెక్ట్‌ రంగులు, టెక్చర్‌పై దృష్టి పెట్టండి.
5. బ్యాక్‌గ్రౌండ్‌ బ్లర్‌ చేసి మెయిన్‌ సబ్జెక్ట్‌పైనే ఫోకస్‌ను పెట్టండి. దాంతో దృష్టిమొత్తం ప్రధాన సబ్జెక్ట్‌పైనే నిలుస్తుంది.

ఎడిటింగ్‌ యాప్స్‌

• స్నాప్‌సీడ్‌ : స్ట్రక్చర్‌, డీటెయిల్స్‌, కొన్ని ప్రత్యేకమైన షార్ప్‌నెస్‌ టూల్స్‌ కోసం..
• లైట్‌రూం మొబైల్‌ : కలర్స్‌, కాంట్రాస్ట్‌, టెక్చర్‌ను కంట్రోల్‌ చేయడానికి..
• వీఎస్‌సీఓ : క్రియేటివ్‌ ఫిల్టర్స్‌ వాడటానికి..
• కెమెరా ఎఫ్‌వీ5/ ప్రొక్యామ్‌ ఎక్స్‌ : మాన్యువల్‌ ఫోకస్‌, ఐఎస్‌ఓ, వైట్‌ బ్యాలెన్స్‌ తదితరాలు అడ్జస్ట్‌ చేసుకోవడానికి..

ఎడిటింగ్‌ సూచనలు

• కాంట్రాస్ట్‌ పెంచడం వల్ల ఆకృతులు ప్రత్యేకంగా కనిపిస్తాయి.
• షార్ప్‌నెస్‌ పెంచితే.. సబ్జెక్ట్‌ డిటెయిల్స్‌ మరింత హైలైట్‌ అవుతాయి.
• కలర్‌బూస్ట్‌ : రంగులను పెంచడం/ తగ్గించడం ద్వారా సబ్జెక్ట్‌ మరింత ప్రత్యేకంగా కనిపిస్తుంది.
• క్రాప్‌ : అవసరమైన భాగాన్ని మాత్రమే క్రాప్‌ చేసుకోండి.

చివరగా.. అబ్‌స్ట్రాక్ట్‌ డిటెయిల్స్‌ ఫొటోగ్రఫీ అనేది మీ కళాత్మక దృష్టిని అభివృద్ధి చేసే ప్రక్రియ. మొబైల్‌ కెమెరా సహాయంతోనూ సాధారణ దృశ్యాలను అసాధారణమైన ఫొటోలుగా మలచవచ్చు. ఈరోజే మీ చుట్టూ ఉన్న వస్తువులను కొత్తగా చూడండి. పాతగోడలపై ఉండే టెక్చర్‌.. నీళ్ల మడుగులో కనిపించే ప్రతిబింబం.. ఇలా ప్రతీదానిలో ఒక కళ దాగి ఉంది. ఆ బ్యూటీని కనిపెట్టి.. దాన్ని ఓ అద్భుతమైన కళగా మలచండి.

– ఆడెపు హరికృష్ణ