అక్రమ విద్యుత్ క‌నెక్ష‌న్‌తో అటవీ జంతువులకు ఉచ్చు.. నలుగురిపై కేసు

అటవీ జంతువుల వేట కోసం అక్రమంగా విద్యుత్‌ వైర్లు ఏర్పాటు చేసిన ఘటనలో మంగళవారం నలుగురిపై అటవీ శాఖ‌ అధికారులు కేసు నమోదు చేసి కోర్టులో హాజరు పరిచారు. అక్టోబర్‌ 24న రాత్రి 7.30 గంటల సమయంలో విద్యుత్‌ సరఫరా పదేపదే ట్రిప్‌ అవుతుండడంతో విద్యుత్‌ శాఖ సిబ్బంది...

కారేపల్లి, అక్టోబర్ 27 : అటవీ జంతువుల వేట కోసం అక్రమంగా విద్యుత్‌ వైర్లు ఏర్పాటు చేసిన ఘటనలో మంగళవారం నలుగురిపై అటవీ శాఖ‌ అధికారులు కేసు నమోదు చేసి కోర్టులో హాజరు పరిచారు. అక్టోబర్‌ 24న రాత్రి 7.30 గంటల సమయంలో విద్యుత్‌ సరఫరా పదేపదే ట్రిప్‌ అవుతుండడంతో విద్యుత్‌ శాఖ సిబ్బంది సహకారంతో అటవీ అధికారులు తనిఖీలు చేపట్టారు. ఈ క్రమంలో అప్పాయిగూడెం పరిసర ప్రాంతంలోని పాలిక కోటయ్యకు చెందిన పామ్‌ ఆయిల్‌ తోటలో అటవీ జంతువుల కోసం ఏర్పాటు చేసిన అక్రమ విద్యుత్‌ వైర్లను గుర్తించారు. ఈ ఘటనపై విచారణ చేపట్టిన అధికారులు పబ్బుల రాములు, భూక్యా రఘు, రెడ్డిబోయిన వెంకన్న, ఎల్లిబోయిన నాగేశ్వరరావుపై కేసు నమోదు చేశారు. వీరు మాదారం, పరిసర గ్రామాలకు చెందినవారిగా గుర్తించి కోర్టులో హాజరు పరిచారు. అటవీ జంతువుల సంరక్షణకు విఘాతం కలిగించే ఇలాంటి చర్యలకు పాల్పడడం చట్టరీత్యా నేరమని, అటవీ ప్రాంతాల్లో అక్రమ విద్యుత్‌ వైర్లు ఏర్పాటు చేయడం వల్ల వన్యప్రాణులతో పాటు మనుషుల ప్రాణాలకూ ప్రమాదం పొంచి ఉంటుందని అధికారులు హెచ్చరించారు.