ఒకటి.. రెండు తడులకు నీరు ఇవ్వగలం

ఎగువన సాగర్‌ డ్యాం డెడ్‌ స్టోరేజీకి వచ్చినందున జిల్లాలోని పాలేరు రిజర్వాయర్‌ పాత కాలువ పరిధిలోని కూసుమంచి, నేలకొండపల్లి మండలాల ఆయకట్టుకు ఒకటి.. రెండు తడులకు తప్ప సాగునీరు సరఫరా చేయలేమని రాష్ట్ర రెవెన్యూ, గృహనిర్మాణ, సమాచారశాఖల మంత్రి, పాలేరు ఎమ్మెల్యే పొంగులేటి శ్రీనివాసరెడ్డి స్పష్టం చేశారు.

• రాష్ట్ర రెవెన్యూశాఖ మంత్రి పొంగులేటి

కూసుమంచి, జనవరి 17: ఎగువన సాగర్‌ డ్యాం డెడ్‌ స్టోరేజీకి వచ్చినందున జిల్లాలోని పాలేరు రిజర్వాయర్‌ పాత కాలువ పరిధిలోని కూసుమంచి, నేలకొండపల్లి మండలాల ఆయకట్టుకు ఒకటి.. రెండు తడులకు తప్ప సాగునీరు సరఫరా చేయలేమని రాష్ట్ర రెవెన్యూ, గృహనిర్మాణ, సమాచారశాఖల మంత్రి, పాలేరు ఎమ్మెల్యే పొంగులేటి శ్రీనివాసరెడ్డి స్పష్టం చేశారు. ఆయకట్టు రైతులు బుధవారం ఖమ్మం జిల్లా కూసుమంచి మండల కేంద్రంలోని ఎమ్మెల్యే క్యాంప్‌ కార్యాలయంలో మంత్రిని కలిసి సాగునీటి సమస్యలను ఆయన దృష్టికి తీసుకొచ్చారు. దీనిపై మంత్రి స్పందిస్తూ..

పంటలకు సరిపడినంత సాగుజలాలు సరఫరా చేయాలని ప్రభుత్వానికీ ఉందన్నారు. ఒకవేళ నీరు ఇస్తామని మాట ఇస్తే, రైతులు ఆశలు పెట్టుకుని నాట్లు పూర్తి చేస్తారన్నారు. కానీ ఆ తర్వాత సర్కార్‌ నీరు ఇవ్వకపోతే ఇబ్బంది పడతారన్న ఆలోచనతో ఒకటి రెండు తడులకు తప్ప నీరు ఇవ్వలేమని స్పష్టం చేస్తున్నామన్నారు. రైతులు ఈ విషయాన్ని అర్థం చేసుకోవాలని విజ్ఞప్తి చేశారు. ఒకవేళ నీరు విడుదలైతే ఆ నీటిని రైతులు పొదుపుగా వినియోగించుకోవాలని సూచించారు. త్వరలోనే నీటిపారుదలశాఖ ఉన్నతాధికారులతో మాట్లాడి సాగునీటి సమస్య పరిష్కారానికి కృషి చేస్తామని హామీనిచ్చారు.