పరీక్షలు రాయాలంటే.. పరుగులు తీయాల్సిందే!

వార్షిక పరీక్షలంటేనే విద్యార్థులకు టెన్షన్‌ టెన్షన్‌గా ఉంటుంది. దీనికితోడు పరీక్షా కేంద్రాలు సైతం దూరంగా ఉంటే ఇక ఉరుకులు పరుగులు పెట్టాల్సిందే. పరీక్ష సమయానికి ఎగ్జామ్‌ సెంటర్‌కు చేరుకోవాలంటే నానా తంటాలు పడాల్సిందే. భద్రాద్రి జిల్లాలో ఇంటర్మీడియట్‌ పరీక్షా కేంద్రాలు విద్యార్థులకు దూరాభారంగా ఉన్నాయి. ఏకంగా నాలుగు మండలాల్లో 20 నుంచి 30 కిలోమీటర్ల దూరంలో పరీక్ష కేంద్రాలను ఏర్పాటుచే శారు. దీంతో అటు విద్యార్థులు, ఇటు తల్లిదండ్రులు ఆందోళన వ్యక్తం చేస్తున్నారు.

• విద్యార్థులకు దూరంగా ఇంటర్మీడియట్‌ పరీక్షా కేంద్రాలు
• 20 నుంచి 30 కిలోమీటర్ల దూరంలో ఎగ్జామ్‌ సెంటర్లు
• బస్సులు, ఆటోలను ఆశ్రయించక తప్పని పరిస్థితి
• ఐదు కాలేజీలున్న చోటా సెంటర్‌ ఏర్పాటు చేయని ప్రభుత్వం
• ఆందోళనలో భద్రాద్రి జిల్లా విద్యార్థులు, తల్లిదండ్రులు

వార్షిక పరీక్షలంటేనే విద్యార్థులకు టెన్షన్‌ టెన్షన్‌గా ఉంటుంది. దీనికితోడు పరీక్షా కేంద్రాలు సైతం దూరంగా ఉంటే ఇక ఉరుకులు పరుగులు పెట్టాల్సిందే. పరీక్ష సమయానికి ఎగ్జామ్‌ సెంటర్‌కు చేరుకోవాలంటే నానా తంటాలు పడాల్సిందే. భద్రాద్రి జిల్లాలో ఇంటర్మీడియట్‌ పరీక్షా కేంద్రాలు విద్యార్థులకు దూరాభారంగా ఉన్నాయి. ఏకంగా నాలుగు మండలాల్లో 20 నుంచి 30 కిలోమీటర్ల దూరంలో పరీక్ష కేంద్రాలను ఏర్పాటుచే శారు. దీంతో అటు విద్యార్థులు, ఇటు తల్లిదండ్రులు ఆందోళన వ్యక్తం చేస్తున్నారు. ఒకవైపు ‘ప్రైవేటు కాలేజీలు వద్దు – సర్కారు కాలేజీలే ముద్దు’ అంటూ రాష్ట్ర ప్రభుత్వం ప్రచారం చేస్తూనే ఇలా పరీక్షా కేంద్రాలను విద్యార్థులకు అందుబాటులో లేకుండా ఏర్పాటు చేయడంతో విద్యార్థులు, వారి తల్లిదండ్రులు అసహనం వ్యక్తం చేస్తున్నారు. పరీక్షా సమయానికి కేంద్రానికి చేరుకోవాలంటే బస్సులు, ఆటోలు, ఇతర ప్రైవేటు వాహనాలను ఆశ్రయించక తప్పడం లేదు. పరీక్షా కేంద్రాలు ఇలా దూరంగా ఏర్పాటు చేయడంతో తమ పిల్లలు తీవ్ర ఒత్తిడికి గురవుతారని తల్లిదండ్రులు ఆవేదన వ్యక్తం చేస్తున్నారు.
– భద్రాద్రి కొత్తగూడెం, ఫిబ్రవరి 22 (నమస్తే తెలంగాణ)

ఇంటర్మీడియట్‌ పరీక్షలు ఈ నెల 25 నుంచి మార్చి 18 వరకు జరుగనున్నాయి. పరీక్షలు రాసేందుకు ఈసారి కూడా భద్రాద్రి జిల్లా విద్యార్థులకు తిప్పలు తప్పడం లేదు. కాంగ్రెస్‌ ప్రభుత్వం అధికారంలోకి వచ్చి రెండేళ్లు దాటినా ఇంటర్‌ విద్యపై పట్టింపులేకుండా వ్యవహరిస్తున్నది. ఇంటర్‌ పరీక్షల నిర్వహణ కోసం అధికారులు ఏర్పాట్లు పూర్తిచేశారు. భద్రాద్రి జిల్లాలో 18,600 మంది విద్యార్థుల కోసం 37 పరీక్షా కేంద్రాలు ఏర్పాటుచేశారు. జిల్లాలో 23 మండలాలుండగా.. అందులో ఐదు మండలాలైన ఆళ్లపల్లి, కరకగూడెం, దమ్మపేట, సుజాతనగర్‌, లక్ష్మీదేవిపల్లిల్లో సర్కారు కాలేజీలు లేవు. దీంతో విద్యార్థులు 20 నుంచి 25 కిలోమీటర్ల దూరం ప్రయాణించి పరీక్షలు రాయాల్సి వస్తున్నది. ఇంటర్‌ విద్యార్థుల కోసం ఆర్టీసీ బస్సు సౌకర్యం కల్పించినా.. అవి మండల కేంద్రాలకు మాత్రమే వస్తుంటాయి. పల్లెప్రాంతాల నుంచి వచ్చే విద్యార్థులకు బస్సుల్లేక ఆటోలు, ఇతర ప్రైవేటు వాహనాల మీద ఆధారపడాల్సిన పరిస్థితి ఉంది.

ఇవిగో సమస్యలు..

• అన్నపురెడ్డిపల్లి మండలంలో ఐదు సంక్షేమ కాలేజీలు ఉన్నాయి. వాటిల్లో 400 మందికి పైగా విద్యార్థులు ఇంటర్‌ చదువుతున్నారు. కానీ ఆ మండలంలో ఒక్క పరీక్షా కేంద్రం కూడా లేకపోవడంతో విద్యార్థులు చండ్రుగొండ వచ్చి పరీక్షలు రాయాలి. కాలేజీ యాజమాన్యాలు బస్సులు ఏర్పాటు చేసినా విద్యార్థులు అంతదూరం ప్రయాణం చేసి పరీక్ష రాయాలంటే చదవింది మర్చిపోయే పరిస్థితి వస్తుందని ఆవేదన వ్యక్తం చేస్తున్నారు.
• ఆళ్లపల్లి మండలం మర్కోడులో ఒకేషనల్‌ జూనియర్‌ కాలేజీ ఉంది. కానీ అక్కడ పరీక్షా కేంద్రం లేదు. 25 కిలోమీటర్ల దూరంలో ఉన్న గుండాల ప్రభుత్వ జూనియర్‌ కాలేజీలో సెంటర్‌ ఉండడం వల్ల వారంతా అక్కడి వచ్చి పరీక్ష రాయాల్సి ఉంది. ఈ రూట్‌లో కనీసం బస్సు సౌకర్యం కూడా ఉండదు. టాటా ఏస్‌ వాహనంలో వెళ్లాల్సిన పరిస్థితి.
• దమ్మపేట మండలంలో రెండు సంక్షేమ కాలేజీలు ఉన్నాయి. కానీ అక్కడ ఇంటర్‌ పరీక్ష కేంద్రం లేదు. అశ్వారావుపేట మండలానికి వెళ్లి పరీక్ష రాయాలి. బస్సు సమయానికి వస్తే సరేసరి. లేకుంటే ప్రైవేటు వాహనాలను ఆశ్రయించాల్సిందే.
• కరకగూడెం మండలంలో కూడా ఇంటర్‌ పరీక్షా కేంద్రం లేకపోవడంతో పినపాక మండలం వచ్చి పరీక్షలు రాయాల్సి ఉంది. 15 కిలోమీటర్ల దూరం ఆటోలు ఎక్కి వెళ్లాల్సిన పరిస్థితి.
• సుజాతనగర్‌ మండలంలో సగభాగం ఇప్పుడు కొత్తగూడెం మున్సిపల్‌ కార్పొరేషన్‌లో కలిసింది. కానీ, అక్కడ ఉన్న మారుమూల గ్రామాల విద్యార్థులకు కాలేజీ సౌకర్యం లేకపోవడంతో కొత్తగూడెం వచ్చి చదువుకుంటున్నారు. పరీక్షలు రాసేందుకు కూడా 15 కిలోమీటర్ల దూరం ప్రయాణించాల్సి వస్తోంది.

పరీక్ష కేంద్రం ఏర్పాటుచేయాలి
మా మండలంలో ఐదు కాలేజీలు ఉన్నాయి. కానీ పరీక్షా కేంద్రం మాత్రం లేదు. మా మండల విద్యార్థులు ఏటా ఇలానే ఇబ్బందులు పడుతున్నారు. బస్సులపై వెళ్లి పరీక్ష రాయాల్సి వస్తున్నది. స్థానికంగా పరీక్షా కేంద్రం ఉంటే పరీక్షా సమయం వరకు కొంత రివిజన్‌ చేసుకునే అవకాశం ఉంటుంది. ఉదయాన్నే లేచి తయారై బస్సు కోసం చూడాలి. దీంతో ఒత్తిడికి గురవుతున్నాం. మాకు పరీక్షా కేంద్రాన్ని ఏర్పాటుచేయాలి.
-పి.వేణు, ఇంటర్‌ ఫస్టియర్‌, అన్నపురెడ్డిపల్లి

మాకు బస్సులు కూడా లేవు..
మాది ఆళ్లపల్లి మండలం. మర్కోడులో ఒకేషనల్‌ కోర్సు చేస్తున్నాను. కాలేజీ ఉందిగానీ పరీక్ష కేంద్రం లేదు. మా ప్రాంతానికి బస్సులు కూడా ఉండవు. టాటామేజిక్‌, టాటా ఏస్‌ వంటి ప్రైవేటు వాహనాలు ఎక్కి వెళ్లాలి. అదే రూట్‌లో వాహనం పంచర్‌ అయిందంటే పరీక్ష పోయినట్లే. అసలే మారుమూల అటవీ ప్రాంతం. గుండాల 25 కిలోమీటర్ల దూరం ఉంటుంది.
-ఎండీ అస్లాం, ఒకేషనల్‌ ఇంటర్‌, మర్కోడు, ఆళ్లపల్లి

బస్సు సౌకర్యం కల్పిస్తున్నాం..
జిల్లాలో ఐదు మండలాల్లో ప్రభుత్వ కాలేజీలు లేవు. గత ఏడాది జూలూరుపాడు మండలంలో కూడా లేదు. ఈసారి అక్కడ సెంటర్‌ వచ్చింది. దూరం వెళ్లేవారికి బస్సు సౌకర్యం కల్పిస్తున్నాం. విద్యార్థుల కోసం ఆర్టీసీ సంస్థ తన బస్సులను అందుబాటులో ఉంచుతోంది. ఆళ్లపల్లి రూట్‌లో కొంచెం ఇబ్బంది ఉన్నమాట వాస్తవమే. అన్నపురెడ్డిపల్లి మండలంలో పరీక్షా కేంద్రం అవసరాన్ని ఉన్నతాధికారుల దృష్టికి తీసుకెళ్తాం.
– హెచ్‌.వెంకటేశ్వరరావు, జిల్లా ఇంటర్మీడియట్‌ అధికారి

మండలం :పరీక్షా కేంద్రం: దూరం
ఆళ్లపల్లి :గుండాల: 25 కిలోమీటర్లు
కరకగూడెం పినపాక :15 కిలోమీటర్లు
దమ్మపేట :అశ్వారావుపేట :12 కిలోమీటర్లు
సుజాతనగర్‌ :కొత్తగూడెం: 13 కిలోమీటర్లు
అన్నపురెడ్డిపల్లి :చండ్రుగొండ: 17 కిలోమీటర్లు