లంచావతారులు.. !

ప్రభుత్వ ఉద్యోగులుగా విధులు నిర్వర్తించినందుకు నెలనెలా ఠంచనుగా వేతనం తీసుకుంటున్నా.. అది చాలదనట్లు ఆమ్యామ్యాలకు మరిగి కొందరు అధికారులు పక్కచూపులు చూస్తున్నారు. పని ఏదైనా సదరు బాధితుల నుంచి రూ.వేలు, లక్షల్లో డిమాండ్‌ చేస్తూ ఏసీబీ అధికారులకు అడ్డంగా దొరికిపోతున్నారు.

• రోజురోజుకూ పెరిగిపోతున్న లంచగొండి ఉద్యోగులు
• ప్రభుత్వ కొలువు నుంచి తీసేయలేరనే ధీమా
• ఏసీబీకి చిక్కుతున్నా మారని తీరు
• ఏడాదిలోనే పట్టుబడిన పది మంది
• భద్రాద్రి జిల్లాపై అవినీతి మరకలు
• కొరవడిన ఉన్నతాధికారుల అజమాయిషీ
• గాడి తప్పిన కాంగ్రెస్‌ పాలన

భద్రాద్రి కొత్తగూడెం, నవంబర్‌ 14 (నమస్తే తెలంగాణ) : ప్రభుత్వ ఉద్యోగులుగా విధులు నిర్వర్తించినందుకు నెలనెలా ఠంచనుగా వేతనం తీసుకుంటున్నా.. అది చాలదనట్లు ఆమ్యామ్యాలకు మరిగి కొందరు అధికారులు పక్కచూపులు చూస్తున్నారు. పని ఏదైనా సదరు బాధితుల నుంచి రూ.వేలు, లక్షల్లో డిమాండ్‌ చేస్తూ ఏసీబీ అధికారులకు అడ్డంగా దొరికిపోతున్నారు.

ఏడాది కాలంలోనే పది మంది ఉద్యోగులు ఏసీబీ అధికారులకు పట్టుబడి పవిత్ర భద్రాద్రి జిల్లాకు అవినీతి మరకలు అంటించారు. ఒక శాఖలో అధికారి ఏసీబీ అధికారులకు పట్టుబడ్డారనే భయం కూడా లేకుండా లంచాలే ప్రధాన ధ్యేయంగా వివిధ శాఖల్లో కొందరు అధికారులు, సిబ్బంది పని చేస్తున్నారనే విమర్శలు వస్తున్నాయి. గత కేసీఆర్‌ ప్రభుత్వ హయాంలో బాధ్యతగా పనిచేసిన అధికారులు.. కాంగ్రెస్‌ పాలనలో కొందరు అధికారులు, సిబ్బంది బరితెగించి లంచాలు తీసుకుంటూ ఏసీబీ అధికారులకు చిక్కుతున్నారు. ప్రభుత్వ కొలువే కదా.. తమను సర్వీసు తొలగించేది ఎవరనే ధీమాతో ఇలాంటి చర్యలకు పాల్పడుతున్నట్లు తెలుస్తున్నది.

గాడి తప్పిన పాలన

గత కేసీఆర్‌ పాలనలో పదేళ్లు అంతా సాఫీగా సాగిపోయింది. వివిధ శాఖల్లో సామాన్యుల సమస్యలను అధికారులు వెనువెంటనే పరిష్కరించేవారు. కానీ.. కాంగ్రెస్‌ పాలన షురువైన నాటినుంచి పైరవీలకే ప్రథమ ప్రాధాన్యం అనేలా ఉంది పరిస్థితి. కిందిస్థాయి సిబ్బందిపై ఉన్నతాధికారుల అజమాయిషీ లేకపోవడంతో ఇష్టారాజ్యంగా వ్యవహరిస్తూ అవినీతి అక్రమాలకు పెద్దపీట వేసినైట్లెంది. కనీసం కలెక్టరేట్‌ భవన సముదాయంలో విధులు నిర్వర్తిస్తున్నామనే భయం కూడా లేకుండా ఓ హార్టికల్చర్‌ అధికారి ఏకంగా రూ.లక్ష లంచం తీసుకుంటూ ఏసీబీ అధికారులకు చిక్కిన విషయం తెలిసిందే. ఇలా ఏడాదిలోపే పది మందికిపైగా ఉద్యోగులు ఏసీబీ వలలో చిక్కుకొని ఊచలు లెక్కిస్తున్నారు. ఉమ్మడి ఖమ్మం జిల్లాకు ముగ్గురు మంత్రులు ఉన్నా.. అధికారులకు ఎలాంటి భయంలేకుండా లంచాలు తీసుకోవడంలో పెట్రేగిపోతున్నారు.

భరించలేక ఏసీబీని ఆశ్రయిస్తున్న బాధితులు

జిల్లాలో రోజురోజుకూ లంచావతారులు ఎక్కువవుతున్నారు. ఒక శాఖ అని కాదు.. అన్ని శాఖల్లోనూ అదే తీరు కనిపిస్తున్నది. డిప్యూటేషన్ల పేరుతో, విద్యుత్‌ శాఖలో ట్రాన్స్‌ఫార్మర్ల ఏర్పాటు, ఫిర్యాదుదారులు ఠాణాకు వెళ్తే డబ్బులు డిమాండ్‌ చేయడం, దొడ్డిదారిలో బదిలీలు చేయడంతోపాటు సెలవులు కావాలన్నా, ఇంక్రిమెంట్లు చేయాలన్నా లంచాలకు మరింత డిమాండ్‌ పెరిగింది. ట్రెజరీ కార్యాలయాల్లో కూడా కమీషన్లు బాగా పెరిగినట్లు ఉద్యోగులే బహిరంగంగా చెప్పుకుంటున్నారు. వీటిపై ఏసీబీ అధికారులు మరింత దృష్టి సారిస్తే చాలా శాఖల ఉద్యోగులు కూడా చిక్కే అవకాశాలు లేకపోలేదు.

లంచం అడిగినా అరెస్టు చేయొచ్చు..

లంచం ఇచ్చే స్థాయి, స్తోమత లేక పలువురు బాధితులు ఏసీబీ అధికారులను ఆశ్రయిస్తున్నారు. లంచం అడుగుతున్నారని మాకు సమాచారం అందించిన వారి పేర్లు గోప్యంగా ఉంచుతున్నాం. అధికారులు ఫోన్‌లో లంచం అడిగినా తప్పే అవుతుంది. కాల్‌ రికార్డులను సైతం పరిశీలిస్తున్నాం. రేగళ్ల పంచాయతీ కార్యదర్శిని అలాగే పట్టుకున్నాం. జిల్లాలో ఏడాదిలోపే 10 మందిని అరెస్టు చేశాం. ఇంకా చాలా మంది బాధితులు మాకు ఫోన్లు చేస్తున్నారు. – రమేశ్‌, డీఎస్పీ ఏసీబీ

ఏడాదిలోపే ఏసీబీకి చిక్కిన ఉద్యోగులు వీరే..

పోటీపడి లంచాలు తీసుకుంటూ కొందరు అధికారులు, ఉద్యోగులు ఏసీబీ అధికారులకు పట్టుబడుతున్నారు. భద్రాద్రి జిల్లాలో ఏడాదిలోపే 10 మంది ఉద్యోగులు ఏసీబీకి అడ్డంగా దొరికిపోయారంటే లంచగొండులు ఏ స్థాయిలో ఉన్నారో అర్థం చేసుకోవచ్చు.

• భద్రాచలంలో టౌన్‌ ఎస్‌ఐ శ్రీనివాస్‌ బాధితుడి వద్ద లంచం తీసుకుంటూ దొరికిపోయారు.
• పాల్వంచ మున్సిపాలిటీలో ఇంటి నెంబర్‌ ఇవ్వడం కోసం టౌన్‌ ప్లానింగ్‌ సూపర్‌వైజర్‌తోపాటు మరో అసిస్టెంట్‌ డబ్బులు తీసుకుంటూ ఏసీబీకి చిక్కారు.
• అశ్వారావుపేట మండలం భీమునిగూడెం గ్రామానికి చెందిన రైతు పొలం వద్ద ట్రాన్స్‌ఫార్మర్‌ వేయడం కోసం విద్యుత్‌ శాఖ ఏఈ లంచం తీసుకుంటూ పట్టుబడ్డారు.
• చర్ల మండలంలో రైతు పట్టాలో పేరు మార్చడం కోసం లంచం తీసుకుంటూ డిప్యూటీ తహసీల్దార్‌ భరణిబాబు ఏసీబీకి చిక్కారు.
• ఆళ్లపల్లి మండలంలో ఇంటి నెంబర్ల విషయంలో బాధితుల వద్ద లంచం తీసుకుంటూ ఎంపీవో, పంచాయతీ కార్యదర్శి ఇద్దరూ అడ్డంగా బుక్కయ్యారు.
• పాల్వంచ పట్టణంలో ఎస్‌ఐ రాము లంచం తీసుకుంటూ ఏసీబీ అధికారులకు చిక్కారు.
• పాల్వంచలో మరో ఉద్యోగి, విద్యుత్‌ శాఖ లైన్‌ ఇన్‌స్పెక్టర్‌ నాగరాజు బాధితుడి వద్ద లంచం తీసుకుంటూ రెడ్‌హ్యాండెడ్‌గా దొరికిపోయారు.
• కొత్తగూడెం ఐడీవోసీలో జిల్లా హార్టికల్చర్‌ అధికారి సూర్యనారాయణ కాంట్రాక్టర్‌ వద్ద రూ.లక్షకు పైగా లంచం తీసుకుంటూ ఏసీబీకి పట్టుబడ్డారు.
• పాల్వంచలో మెడికల్‌ కాలేజీలో అవుట్‌ సోర్సింగ్‌ జీతాల బిల్లులు చేయడం కోసం లంచం తీసుకుంటూ కళాశాల ఏవో, జూనియర్‌ అసిస్టెంట్లు ఏసీబీకి చిక్కారు.
• లక్ష్మీదేవిపల్లి మండలం రేగళ్ల గ్రామ పంచాయతీ సెక్రటరీ బాధితుడి వద్ద లంచం అడిగి అడ్డంగా బుక్కయారు.