Karepally : రోడ్డు వేయ‌క‌పోతే స్థానిక సంస్థ‌ల ఎన్నిక‌ల బ‌హిష్క‌ర‌ణ‌?

కంకరతేలిన రహదారిపై నరకయాతన పడుతున్నామని ప్రజా ప్రతినిధులు, అధికారులు పట్టించుకోవడం లేదని ఆరోపిస్తూ శనివారం రేగులగూడెం గ్రామ పంచాయతీ ప్రజలు అందోళనకు దిగారు. 2006లో ప్రధానమంత్రి సడక్‌ యోజన క్రింద..

– రేగులగూడెం గ్రామస్తుల అందోళన

కారేపల్లి, న‌వంబ‌ర్ 29 : కంకరతేలిన రహదారిపై నరకయాతన పడుతున్నామని ప్రజా ప్రతినిధులు, అధికారులు పట్టించుకోవడం లేదని ఆరోపిస్తూ శనివారం రేగులగూడెం గ్రామ పంచాయతీ ప్రజలు అందోళనకు దిగారు. 2006లో ప్రధానమంత్రి సడక్‌ యోజన క్రింద గేటుకారేపల్లి రైల్వే గేటు నుండి అనంతారం మీదుగా గోవింద్‌తండా వరకు బీటీ రోడ్డు మంజూరైంది. దాని ప‌నుల‌ను గుత్తేదారు మధ్యలోనే ఆపివేయడంతో 20 ఏండ్లుగా కంకర తేలిన రహదారిపై రాకపోకలు సాగిస్తూ 10 గ్రామాల ప్రజలు అవస్త‌లు పడుతున్నారు. అనంతారం నుండి గోవింద్‌తండా వరకు తర్వాత కాలంలో బీటీ అయినా రైల్వే గేట్‌ నుండి అనంతారం 2 కిలోమీటర్లు మాత్రం బీటీ కాలేదు.

దానిపై మంత్రులు, ఎమ్మెల్యే, ఎంపీలు, కలెక్టర్లకు వినతులు ఇచ్చినా స్పందన లేదని గ్రామస్తులు ఆవేదన వ్యక్తం చేశారు. తమ సమస్యను పరిష్కరించాలని వారు డిమాండ్‌ చేశారు. రోడ్డు నిర్మాణానికి స్పష్టమైన హామీ ఇవ్వకుంటే స్ధానిక సంస్ధల ఎన్నికలను సైతం బహిష్కరిస్తామని గ్రామస్తులు హెచ్చరించారు. ఈ కార్యక్రమంలో గ్రామ పెద్దలు ఈసం ఐలయ్య, పిట్టల వెంకటేశ్వర్లు, ఆవుల కృష్ణసాగర్‌, రెడ్డిబోయిన రాంకోటి, ఆవుల సత్యనారాయణ పాల్గొన్నారు.