‘నిర్దేశిత బొగ్గు ఉత్పత్తి లక్ష్యాలను సాధించాలి’

కొత్తగూడెం ఏరియాకు ఈ ఆర్థిక సంవత్సరంలో నిర్దేశించిన బొగ్గు ఉత్పత్తి లక్ష్యాలను సాధించే దిశగా అధికారులు సమన్వయంతో పని చేయాలని సింగరేణి సంస్థ ఎగ్జిక్యూటివ్ డైరెక్టర్ (కోల్ మూవ్‌మెంట్), ఆఫీసర్ బాధావత్ వెంకన్న అన్నారు. సోమవారం ఆయన ఏరియా జనరల్ మేనేజర్...

– ఓబీ పనులు వేగవంతం చేసి బొగ్గు ఉత్పత్తిని పెంచాలి
– నాణ్యత, రవాణాతో పాటు కార్మికుల భద్రతకు ప్రాధాన్యం ఇవ్వాలి
– సింగరేణి ఈడీ (కోల్ మూవ్‌మెంట్), ఐ ఆర్.టి.ఎస్ బాధావత్ వెంకన్న

రుద్రంపూర్, నవంబర్ 09 : కొత్తగూడెం ఏరియాకు ఈ ఆర్థిక సంవత్సరంలో నిర్దేశించిన బొగ్గు ఉత్పత్తి లక్ష్యాలను సాధించే దిశగా అధికారులు సమన్వయంతో పని చేయాలని సింగరేణి సంస్థ ఎగ్జిక్యూటివ్ డైరెక్టర్ (కోల్ మూవ్‌మెంట్), ఆఫీసర్ బాధావత్ వెంకన్న అన్నారు. సోమవారం ఆయన ఏరియా జనరల్ మేనేజర్ సీహెచ్ వెంకటరమణ, సంబంధిత అధికారులతో కలిసి వీకే కోల్ మైన్స్, ఆర్‌సీహెచ్‌పీలను సందర్శించారు. వీకే ఓపెన్‌కాస్ట్ గని వ్యూ పాయింట్ నుంచి ఓవర్‌బర్డెన్ (ఓబీ) తొలగింపు పనులను పరిశీలించిన ఆయన, మట్టి తొలగింపు పనులను వేగవంతంగా పూర్తి చేసి బొగ్గు ఉత్పత్తిని పెంచాలని అధికారులను ఆదేశించారు. రోజువారీ బొగ్గు ఉత్పత్తి, రవాణా, ఓబీ బ్లాస్టింగ్, లోడింగ్ పనుల పురోగతిని అడిగి తెలుసుకున్నారు.

ఈ సందర్భంగా వెంకన్న మాట్లాడుతూ.. “నిర్దేశించిన ఉత్పత్తి లక్ష్యాలను సాధించేందుకు ప్రణాళికాబద్ధంగా ముందుకు సాగాలి. ఓబీ తొలగింపు పనుల్లో వేగం పెంచి బొగ్గు ఉత్పత్తికి అవసరమైన ఏర్పాట్లు చేయాలి. ఉత్పత్తితో పాటు బొగ్గు నాణ్యతపై కూడా ప్రత్యేక శ్రద్ధ చూపాలి. వినియోగదారులకు నిర్దేశిత ప్రమాణాలతో కూడిన నాణ్యమైన బొగ్గును సరఫరా చేయాలి. ఉత్పత్తి, రవాణాలో రోజువారీ లక్ష్యాలను అధిగమించేలా చర్యలు తీసుకోవాలి. రవాణాకు ఎలాంటి ఆటంకాలు కలగకుండా ముందస్తు జాగ్రత్తలు చేపట్టాలి. ముఖ్యంగా ఉపరితల గనుల్లో ఉద్యోగుల భద్రతకు అత్యంత ప్రాధాన్యం ఇస్తూ ఉత్పత్తి చేపట్టాలి” అని సూచించారు.

అనంతరం ఆర్‌సీహెచ్‌పీని సందర్శించి రైలుమార్గం ద్వారా జరుగుతున్న బొగ్గు రవాణాను పరిశీలించారు. బొగ్గు గ్రేడ్లను తనిఖీ చేసి నాణ్యతా ప్రమాణాలకు అనుగుణంగా వినియోగదారులకు బొగ్గు సరఫరా చేయాలని సంబంధిత అధికారులకు సూచించారు. ఈ పర్యటనలో ఏరియా జీఎం సీహెచ్ వెంకటరమణ, ఎస్‌ఓ టు జీఎం గోవిందరావు, ఏరియా ఇంజనీర్ విత్తనాల రామకృష్ణ, ఏరియా సేఫ్టీ ఆఫీసర్ వెంకటేశ్వర్లు, వీకే సీఎంఎం మేనేజర్ మురళి, సెక్యూరిటీ ఆఫీసర్ అభిలాష్, ఇతర విభాగాధిపతులు, అధికారులు పాల్గొన్నారు.