Visit:
– పాపకొల్లులో ఐలమ్మ వర్ధంతి
– నివాళులర్పించిన బీఆర్ఎస్ నాయకుడు లకావత్ గిరిబాబు
జూలూరుపాడు, సెప్టెంబర్ 10 : సబ్బండ వర్గాల ఆత్మగౌరవానికి, మహిళా చైతన్యానికి నిలువెత్తు రూపం వీరనారి చాకలి ఐలమ్మ అని బీఆర్ఎస్ వైరా నియోజకవర్గ నాయకుడు లకావత్ గిరిబాబు అన్నారు. తెలంగాణ ప్రజల పోరాట స్ఫూర్తిని ప్రపంచానికి చాటిన ధీరవనిత త్యాగాలు చిరస్మరణీయమన్నారు. జూలూరుపాడు మండల పరిధిలోని పాపకొల్లు గ్రామ పంచాయతీ కేంద్రంలో గురువారం చాకలి ఐలమ్మ వర్ధంతిని పురస్కరించుకుని ఆమె విగ్రహానికి పూలమాలవేసి ఘనంగా నివాళులర్పించారు. ఈ సందర్భంగా లకావత్ గిరిబాబు మాట్లాడుతూ.. నాటి రజాకారులు, దొరలు, భూస్వాముల సాగించిన దోపిడీకి ఎదురొడ్డి నిలిచిన యోధురాలు ఐలమ్మ అని కీర్తించారు. పేదలు, అణగారిన వర్గాల హక్కుల సాధన కోసం ఆమె ప్రదర్శించిన ధైర్యసాహసాలు, తెగువ తెలంగాణ సమాజానికి ఎప్పటికీ ఆదర్శంగా నిలుస్తాయన్నారు.
ఆత్మగౌరవం, సమానత్వం కోసం ఆమె చేసిన పోరాటం నేటి తరానికే కాకుండా భావితరాలకు సైతం నిరంతరం స్ఫూర్తినిస్తూనే ఉంటుందని పేర్కొన్నారు. ఈ కార్యక్రమంలో బీఆర్ఎస్ పార్టీ మండల నాయకులు, మాజీ ఎంపీపీ మూడు చిట్టిబాబు, మాజీ ఉప సర్పంచ్ నిమ్మటూరి కనకయ్య, చాపలమడుగు రామ్మూర్తి, తాళ్లూరి రామారావు, తాళ్లూరి వెంకటేశ్వర్లు, ఇల్లంగి తిరుపతి, రామిశెట్టి వంశీ, ధర్మరాజుల పుల్లయ్య, వాంకుడోత్ బాబూలాల్తో పాటు పలువురు పార్టీ నాయకులు, కార్యకర్తలు, రజక సంఘం నాయకులు పాల్గొన్నారు.
