Bhadradri Kothagudem : ఎగువన వరద.. దిగువున దిగులు

వానలు ఎక్కడ కురిసినా... తుఫాను ఎక్కడ తీరం దాటినా.. దిగువ ప్రాంతాలకు తిప్పలు తప్పడం లేదు. ఎగువున వరదలు.. దిగువున దిగులు అన్నట్లుగా ప్రతీ యేటా వరద ప్రభావిత గ్రామాలకు ముంపు కష్టాలు తప్పడం లేదు. ప్రతీ ఏడాది జులై, ఆగస్టు నెలలు వస్తే భద్రాచలం డివిజన్ పరిధిలోని గ్రామాలు వరద భయానికి ప్రాణాలు అరచేతిలో పెట్టుకోవాల్సి వస్తుంది.

– వానలు కురిస్తే ఇక్కడ వణుకే
– జులై. ఆగస్టు నెలల్లో ప్ర‌తియేటా ఇదే పరిస్థితి
– మళ్లీ తుఫాను వచ్చే అవకాశాలు
– భయం గుప్పిట్లో మన్యం గ్రామాలు

భద్రాద్రి కొత్తగూడెం, సెప్టెంబ‌ర్ 01 : వానలు ఎక్కడ కురిసినా… తుఫాను ఎక్కడ తీరం దాటినా.. దిగువ ప్రాంతాలకు తిప్పలు తప్పడం లేదు. ఎగువున వరదలు.. దిగువున దిగులు అన్నట్లుగా ప్రతీ యేటా వరద ప్రభావిత గ్రామాలకు ముంపు కష్టాలు తప్పడం లేదు. ప్రతీ ఏడాది జులై, ఆగస్టు నెలలు వస్తే భద్రాచలం డివిజన్ పరిధిలోని గ్రామాలు వరద భయానికి ప్రాణాలు అరచేతిలో పెట్టుకోవాల్సి వస్తుంది.

రెండుసార్లు రెండో ప్ర‌మాద హెచ్చ‌రిక‌ దాటి ప్రవాహం

రాష్ట్రాల సరిహద్దుల్లో ఉన్న జిల్లాలకు భారీ వర్ష సూచన ఉంటే భద్రాచలం ముంపు గ్రామాలకు వరద కష్టాలు తప్పడం లేదు. గత నెల రోజుల నుండి వరద ప్రవాహం భద్రాచలాన్ని పోటెత్తుతూనే ఉంది. ఇప్పటికీ రెండుసార్లు రెండవ ప్రమాద హెచ్చరికను దాటి వరద ఉగ్రరూపాన్ని చూపెట్టంది. ప్రతిసారి రోజుల తరబడి వరద ప్రవాహం భద్రాచలం డివిజన్‌తో పాటు బూర్గంపాడు మండలాన్ని సైతం ఆనుకుని ఉండడంతో ముంపు గ్రామాల‌ ప్రజలు ఈ సమయంలో ఏం జరుగుతుందోనని ఆందోళ‌న చెందుతున్నారు. ఇప్పటికే ఆయా గ్రామాల్లో వరద నీరు చేరడంతో పరిసర గ్రామాలకు రాకపోకలు నిలిచిపోయాయి.

తెలంగాణ తీర ప్రాంతంలోనే కాకుండా ఛ‌త్తీస్‌గ‌ఢ్‌ రాష్ట్రంలో కూడా భారీ వర్షాలు కురిస్తే భద్రాచలానికే ముప్పు వాటిల్లుతుంది. భద్రాచలం పట్టణం మాత్రం తెలంగాణలో ఉన్నప్పటికీ పరిసర గ్రామాల‌న్నీ ఆంధ్రాలో క‌లిసిన‌ప్ప‌టికీ భద్రాచలం మీదనే ఆధారపడి బతుకుతున్నాయి. గ్రామాలకు గోదావ‌రి వరద తీవ్ర నష్టాన్ని తెచ్చిపెడుతుంది. ఆంధ్ర ప్రాంతం నుండి భద్రాచలానికి పూర్తిగా రాకపోకలు నిలిచిపోవడంతో అక్కడి ప్రాంత వాసులు భద్రాచలం రావడానికి కష్టతరం అవుతుంది. దీంతో పాటు సరళ దుమ్ముగూడెం ప్రాంతాలకు భద్రాచలంతో రాకపోకలు తెగిపోతున్నాయి. పట్టణంలోని రామాలయం సమీపంలో వరద నీరు చేరడంతో అక్కడ ఉన్న ప్రజలు ముందస్తుగానే ఎత్తు ప్రాంతాలకు తరలి వెళ్లాల్సి వస్తోంది.

మళ్లీ తుఫాను వచ్చే అవకాశం

ఇప్పటికే రెండుసార్లు ప్రవాహాన్ని మించి వ‌ర‌ద పోటెత్త‌డంతో పాటు మరోసారి తుఫాను ప్రభావం వస్తుందని హెచ్చరికలు జారీ చేయడంతో ముంపు మండలాలు భయాందోళన చెందుతున్నాయి. ఇప్పటికే భద్రాచలంలో వరద ప్రభావం రెండోసారి రెండో ప్రమాద హెచ్చరిక దాటి ప్రవహించినప్పటికీ ఇంకా 47 అడుగుల నీటిమట్టంలోనే ఉంది. ఈ ప్రవాహంలో మరో తుఫాను ముంచుకొస్తే భద్రాచలం, బూర్గంపాడు మండలాల ప్రజలకు తీవ్ర నష్టం జరిగే అవకాశాలు కనపడుతున్నాయి.