Police Commissioner | బ్యాంకులు, ఏటీఎంల వద్ద పటిష్టమైన భద్రతా ప్రమాణాలు పాటించాలి : సీపీ పోలీస్ కమిషనర్

Police Commissioner | బ్యాంకు అధికారులు, సిబ్బంది పోలీస్ అధికారులతో సమన్వయంతో పనిచేస్తే బ్యాంకులు,ఏటీఎంల వద్ద జరిగే నేరాలను సమర్థవంతంగా నియంత్రించవచ్చని రామగుండం పోలీస్ కమిషనర్ అంబర్ కిషోర్ ఝా అన్నారు.

పెద్దపల్లి : బ్యాంకు అధికారులు, సిబ్బంది పోలీస్ అధికారులతో సమన్వయంతో పనిచేస్తే బ్యాంకులు ( Banks ), ఏటీఎం ( ATM ) ల వద్ద జరిగే నేరాలను సమర్థవంతంగా నియంత్రించవచ్చని ( Security measures ) రామగుండం పోలీస్ కమిషనర్ అంబర్ కిషోర్ ఝా ( Amber Kishore Jha ) అన్నారు. సోమవారం పోలీస్ కమిషనర్ కార్యాలయంలో కమిషనరేట్ పరిధిలోని పెద్దపల్లి, మంచిర్యాల జోన్‌ల ఏసీపీలు, ఇన్‌స్పెక్టర్లు,వివిధ బ్యాంకుల అధికారులతో ఆయన సమీక్షా సమావేశం నిర్వహించారు.

ఈ సమావేశంలో బ్యాంకులు, ఏటీఎంల భద్రతా ప్రమాణాలు, సీసీ కెమెరాల ఏర్పాటు, ఆర్థిక నేరాల నివారణపై చర్చించారు. పోలీస్ కమిషనరేట్ పరిధిలోని పెద్దపల్లి జోన్‌లో 109 బ్యాంకులు,79 ఏటీఎం కేంద్రాలు, మంచిర్యాల జోన్‌లో 109 బ్యాంకులు,89 ఏటీఎం కేంద్రాలు ఉన్నట్లు తెలిపారు. ప్రతి బ్యాంకు, ఏటీఎం వద్ద భద్రతా ప్రమాణాలను తప్పనిసరిగా పాటించాలని ఆదేశించారు.

ప్రతి ఏటీఎం కేంద్రంలో 24 గంటలూ సెక్యూరిటీ గార్డు, నాణ్యమైన సీసీ కెమెరాలు, అలారం సిస్టమ్ ఏర్పాటు చేసుకోవాలని సీపీ సూచించారు.దోపిడీ లేదా ఇతర అత్యవసర పరిస్థితుల్లో సిబ్బంది ఎలా స్పందించాలనే అంశంపై బ్యాంకు ఉద్యోగులకు ప్రత్యేక శిక్షణ ఇవ్వాలని సూచించారు. డీవీఆర్‌లను బహిరంగంగా కనిపించకుండా సురక్షితమైన రహస్య ప్రదేశంలో ఏర్పాటు చేయాలని సూచించారు.

ఏటీఎంలలో నగదు నింపే సమయంలో పోలీసులకు సమాచారం ఇవ్వాలి తెలిపారు.
ఏదైనా అనుమానాస్పద లేదా ప్రమాదకర పరిస్థితి ఎదురైతే వెంటనే డయల్ 112 లేదా స్థానిక పోలీసులకు సమాచారం అందించాలని సూచించారు. ఈ సమావేశంలో అడిషనల్ డీసీపీ కె.శ్రీనివాస్, స్పెషల్ బ్రాంచ్ ఏసీపీ నాగేంద్ర గౌడ్, గోదావరిఖని ఏసీపీ ఎం.రమేష్, మంచిర్యాల ఏసీపీ ఆర్.ప్రకాష్, వివిధ బ్యాంకుల అధికారులు, తదితరులు పాల్గొన్నారు.