Visit:
Godavarikhani : గోదావరిఖని వన్ టౌన్ పోలీస్ స్టేషన్ పరిధిలో పోలీస్ కళాబృందంతో సైబర్ నేరాలు, డ్రగ్స్, ట్రాఫిక్ రూల్స్, రోడ్డు ప్రమాదాలపై అవగాహన కార్యక్రమం నిర్వహించారు. పోలీసులపై ప్రజల్లో నమ్మకం, భరోసా కల్పించేందుకు పోలీస్ కమీషనర్ అంబర్ కిషోర్ ఝా, పెద్దపల్లి డీసీపీ బి. రామ్ రెడ్డి, గోదావరిఖని ఏసీపీ ఎం. రమేష్ ల ఆదేశాల మేరకు పోలీస్ కళాబృందం ఈ కార్యక్రమాలు నిర్వహిస్తోంది. శనివారం గోదావరిఖని వన్ పోలీస్ స్టేషన్ పరిధిలోని విఠల్ నగర్‌లో ఇన్‌స్పెక్టర్ ఇంద్రసేనా రెడ్డి ఆధ్వర్యంలో అవగాహన కార్యక్రమం జరిగింది.
రోడ్డు భద్రత, ట్రాఫిక్ రూల్స్, రోడ్డు ప్రమాదాలు, మైనర్ డ్రైవింగ్, గంజాయి, చెడు వ్యసనాలు, సైబర్ మోసాలు, డయాల్ -100, మహిళలపై జరుగుతున్న నేరాలు, షీ టీమ్స్, వివిధ అంశాలను కళాబృందం సభ్యులు పాటలు, నాటకం రూపంలో ప్రజలకు అర్థమయ్యేలా వివరించారు. అత్యవసర పరిస్థితుల్లో డయల్–100 సేవ ఎలా స్పందిస్తుందో, బ్లూ కోల్ట్స్ సిబ్బంది ఎంత వేగంగా స్పందిస్తారో తెలియజేశారు. సైబర్ నేరాల పద్ధతుల్ని వివరిస్తూ, బ్యాంకుల పేరుతో వచ్చే నకిలీ కాల్స్, లింకులు, ఓటీపీ మోసాల గురించి స్పష్టమైన హెచ్చరికలు జారీ చేశారు. సైబర్ మోసాలకు గురైతే వెంటనే 1930 నంబరుకు సంప్రదించాలని కళాబృందం సభ్యులు ఈ సందర్భంగా ప్రజలకు సూచించారు.
పోలీస్ కళా బృందం ప్రదర్శనను ఆసక్తిగా వీక్షిస్తున్న సీఐ, ఎస్‌ఐ, గ్రామస్థులు
యువతలో డ్రగ్స్ వ్యసనం పెరుగుతున్న నేపథ్యంలో.. డ్రగ్స్ వాడకం వల్ల మనసు, ఆరోగ్యం, భవిష్యత్తుపై పడే తీవ్ర దుష్ప్రభావాలను తెలియజేశారు. గ్రామంలో ఎక్కడైనా డ్రగ్స్ సరఫరా జరుగుతున్నట్లు తెలిస్తే వెంటనే పోలీసులకు సమాచారం ఇవ్వాలని సీఐ ఇంద్రసేనా రెడ్డి సూచించారు. భద్రతా వ్యవస్థను బలపరచడానికి, నేరాల నియంత్రణ, స్వీయ రక్షణకు సీసీ కెమెరాల ప్రాధాన్యాన్ని ప్రత్యేకంగా ఆయన వివరించారు. ఈ కార్యక్రమంలో ఎస్‌ఐ అనూష, స్టేషన్ సిబ్బంది, క్రైమ్ పార్టీ సిబ్బంది, బ్లూ క్లోట్స్ సిబ్బంది, కళాబృందం సభ్యులు, కాలనీ పెద్దలు, యువకులు, మహిళలు పాల్గొన్నారు.
