ముక్కోటికి ఆలయాల ముస్తాబు

ముక్కోటి ఏకాదశి వేడుకలకు ధర్మపురి నృసింహుడి, వేములవాడ రాజన్న క్షేత్రాలు ముస్తాబయ్యాయి. సోమవారం అంగరంగవైభవంగా వేడుకలు నిర్వహించేందుకు ఆలయ యంత్రాంగం, పాలకవర్గాలు అన్ని ఏర్పాట్లు చేశాయి. భక్తులు పెద్దసంఖ్యలో తరలివచ్చే అవకాశముండడంతో ప్రత్యేక క్యూలైన్లను సిద్ధం చేసింది

• నేడు వేములవాడ, ధర్మపురి ఆలయాల్లో అంగరంగవైభవంగా వేడుకలు
• ఏర్పాట్లు పూర్తి చేసిన అధికారులు

ధర్మపురి/వేములవాడ టౌన్‌, జనవరి 1: ముక్కోటి ఏకాదశి వేడుకలకు ధర్మపురి నృసింహుడి, వేములవాడ రాజన్న క్షేత్రాలు ముస్తాబయ్యాయి. సోమవారం అంగరంగవైభవంగా వేడుకలు నిర్వహించేందుకు ఆలయ యంత్రాంగం, పాలకవర్గాలు అన్ని ఏర్పాట్లు చేశాయి. భక్తులు పెద్దసంఖ్యలో తరలివచ్చే అవకాశముండడంతో ప్రత్యేక క్యూలైన్లను సిద్ధం చేసింది. రాజగోపురాలు, ఆలయాలను రంగురంగుల విద్యుత్‌ దీపాలతో అలంకరించింది. ఆలయ ప్రధాన ద్వారం వద్ద కరెంట్‌ బల్బులతో కూడిన నరసింహస్వామి కటౌట్లను ఏర్పాటు చేసింది.

భక్తుల అవసరం మేరకు నీటి వసతిని కల్పించింది. పులిహార, లడ్డూ ఇతర ప్రసాదాలను సిద్ధం చేసింది. ధర్మపురిలో ఏర్పాట్లను సహాయ కమిషనర్‌, ధర్మపురి ఆలయ సీఈవో సంకటాల శ్రీనివాస్‌ రెనొవేషన్‌ కమిటీ సభ్యులు ఇందారపు రామన్న. ఇనుగంటి రమావేంకటేశ్వరరావ్‌, గందె పద్మశ్రీనివాస్‌, గునిశెట్టి రవీందర్‌, చుక్క రవి, గుంపుల రమేశ్‌, వేముల నరేశ్‌, జైన రాజమౌళి, సురేందర్‌, సురేశ్‌ పర్యవేక్షిస్తున్నారు.

రాజన్న సన్నిధిలో..
ముక్కోటి ఏకాదశికి వేములవాడ రాజన్న క్షేత్రం ముస్తాబైంది. విద్యుద్దీప కాంతుల్లో ధగధగ మెరిసిపోతున్నది. ఆలయ ప్రాంగణాన్ని చాందినీ వస్ర్తాలు, తీరొక్క పూలు, అరటి తోరణాలతో అలంకరించినట్లు ఈవో కృష్ణప్రసాద్‌ తెలిపారు. ప్రాతఃకాలం 3 గంటల నుంచి 3-10 గంటల వరకు మంగళవాయిద్యాలు, 3-10 నుంచి 3-35 వరకు సుప్రభాతసేవ, 3-35 నుంచి 3-45 వరకు సుప్రభాత ద ర్శనం, 3-45 నుంచి 3-50 వరకు ఆలయశుద్ధి, 3-50 నుంచి 5 గంటలవరకు ప్రాతఃకాలపూజ, 5-10 గంటల నుంచి 5-25 వర కు స్వామివారి ఉత్తరద్వార దర్శనం, అనంతరం వేదస్వస్తి ఉంటుందని వెల్లడించారు. భక్తులకు అన్నిఏర్పాట్లు చేశామని పేర్కొన్నారు.

ఏకాదశి పూజలు..

• సోమవారం ప్రాతఃకాలం 2.30 గంటలకు లక్ష్మీసమేత యోగా, ఉగ్రనరసింహ, శ్రీవేంకటేశ్వర స్వాములవారి మూలవిరాట్లకు మహా క్షీరాభిషేకాలు, నివేదన, మంత్ర పుష్పం.
• 4 గంటలకు వైకుంఠ ద్వారం వద్ద పుష్పవేదికపైన ఆసీనులైన మువ్వురు స్వాములకు ప్రత్యేక పూజలు, సహస్రనామార్చనలు,నివేదనలు, సప్తహారతుల సమర్పణ, మంత్రపుష్పం, అనంతరం వేదఘోష, మహాదాశీర్వచనములు.
• 5 గంటలకు మంగళవాయిద్యాలు వెంటరాగా వేద మంత్రోచ్ఛారణల మధ్య ధర్మపురి శ్రీమఠం పీఠాధిపతి శ్రీమత్‌ పరమహంస పరివ్రాజకాచార్యులు శ్రీశ్రీశ్రీ సచ్చినాంద సరస్వతి మహాస్వామి, గుంటూరుకు చెందిన దత్త పీఠాధిపతి శ్రీశ్రీశ్రీ విశ్వయోగి విశ్వజిత్‌ విశ్వంజీ కరకములచే వైకుంఠ దర్శన పూజ.
• ఉదయం 8గంటలకు ఉత్సవమూర్తుల సేవలను పురవీధుల్లో ఊరేగింపు.
• సాయంత్రం 7గంటలకు శేషప్ప కళావేదికపై భక్తి సంగీత విభావరి.