నిప్పు పెడితే ముప్పే

రైతులు ఇప్పుడిప్పుడు యాసంగి సాగుకు సన్నద్ధమవుతున్నారు. ఈ క్రమంలో మొన్నటి వరకు వరికోయగా, మిగిలిన కొయ్యకాళ్లు లేకుండా చేసేందుకు చాలా మంది నిప్పు పెడుతున్నారు.

• కొయ్యకాలుకు కాల్చితే నేల సమతుల్యతకు విఘాతం
• భూసారంతోపాటు పంట దిగుబడులూ తగ్గే ప్రమాదం
• కలియ దున్నినా..సేంద్రియ ఎరువుగా మార్చినా ప్రయోజనం
• అగ్ని ప్రమాదాల వల్ల రైతుల ఆరోగ్యానికి హాని
• గడ్డిని సేంద్రియ ఎరువుగా మారిస్తే సిరుల పంట
• తద్వారా 70 శాతం తగ్గనున్న ఎరువుల వినియోగం

కరీంనగర్‌, డిసెంబర్‌ 12 (నమస్తే తెలంగాణ ప్రతినిధి): రైతులు ఇప్పుడిప్పుడు యాసంగి సాగుకు సన్నద్ధమవుతున్నారు. ఈ క్రమంలో మొన్నటి వరకు వరికోయగా, మిగిలిన కొయ్యకాళ్లు లేకుండా చేసేందుకు చాలా మంది నిప్పు పెడుతున్నారు. ప్రతి సీజన్‌లోనూ ఇలా చేస్తుండడంతో అనేక అనర్థాలు జరుగుతున్నాయి. నేలకు సారాన్ని చేకూర్చే క్రిమికీటకాలు నశించిపోవడంతోపాటు వాయు కాలుష్యం పెరిగిపోతున్నది. భూ సమతుల్యత దెబ్బతింటూ, మరో పంటపై తీవ్ర ప్రభావం పడుతున్నది. ఒక్కోసారి రైతుల ప్రాణాలకూ ముప్పు ఏర్పడుతున్నది. వరికొయ్యలు కాల్చడం కర్షకుడికి తెలియకుండానే తీరని నష్టాన్ని మిగులుస్తుండగా, తగులబెట్టకుండా పొలంలో కలియదున్నితే ఎంతో మేలు జరుగుతుందని అధికారులు సూచిస్తున్నారు.

పొలం కోసిన తర్వాత గడ్డిని గతంలో రైతులు ఎంతో జాగ్రత్తగా కాపాడుకునేవారు. ధాన్యం తడిచినా పెద్దగా ఇబ్బంది పడకపోయినా.. గడ్డి తడిస్తే మాత్రం చాలా మదనపడేవారు. పశువుల కోసం అంతలా ఆరాటపడేవారు. పోచ.. పోచ జమచేసి కప్పేసి ఏడాదంతా మేతకు వాడేవారు. అయితే, కాలక్రమేనా పశువుల వినియోగం తగ్గడం, మిషన్ల వాడకం పెరగడంతో ఇప్పుడు అదే గడ్డిని మడిలోనే తగుల బెడుతున్నారు. పర్యావరణ కాలుష్యానికి కారణం అవుతున్నారు. కాల్చడం వల్ల అపార నష్టాలున్నయంటూ శాస్త్రవేత్తలు పదే పదే చెబుతున్నా మెజార్టీ రైతులు వరికొయ్యలను, గడ్డిని తగుల పెడుతూనే ఉన్నారు. తద్వారా తాను తీసుకున్న గొయ్యిలో తానేపడ్డట్లు అవుతున్నది. రైతన్న పరిస్థితి. ఈ విధానం వల్ల ప్రకృతి దెబ్బతినడమేకాదు, అన్నదాత అన్ని రకాలుగా నష్టపోతున్నాడు. పంటకు మేలుచేసే సూక్ష్మజీవులు చనిపోవడమేకాదు, సారవంతమైనభూమి దెబ్బ తింటుంది. దిగుబడిపై ప్రభావం చూపుతుంది. వాతావరణం కలుషితం అవుతుంది. చిన్నపాటి జాగ్రత్తలు తీసుకుంటే వరి కొయ్యలే సిరులు కురిపిస్తాయని శాస్త్రవేత్తలు చెబుతున్నారు.

నాడు పశువులకు మేత.. నేడు కాలి బూడిద..
నాడు వరిని కొడవళ్లతో మొదళ్ల వరకు కోసేవారు. అప్పట్లో రైతన్న ఇంట ఉన్న పశువుల మేత కోసం పశుగ్రాసాన్ని కుప్పలు (గడ్డివాములు) పెట్టుకునేవారు. చిన్న గడ్డి పోచను కూడా విడిచి పెట్టకుండా.. ఎండబెట్టి కుప్పవేసి ఏడాదంతా పశువులకు మేతగా ఉపయోగించే వారు. కానీ, ప్రస్తుతం వ్యవసాయ రంగంలో యాంత్రీకరణ పెరిగింది. దాంతోపాటే పశువుల సంఖ్య చాలా వరకు తగ్గిపోయింది. రైతుకు గడ్డి అవసరం లేకుండా పోయింది. వరికోత యంత్రాలు వచ్చిన తర్వాత వరిని కొడవళ్లతో కాకుండా యంత్రాలతో కోస్తున్నారు. ఈ యంత్రాలు మొదళ్ల వరకు కాకుండా 25 నుంచి 30 సెంటీమీటర్ల ఎత్తులో కోస్తున్నాయి. దాంతో కొయ్యకాళ్లు మిగిలిపోతున్నాయి. దీనిని అలా గే వదిలేస్తే వ్యర్థ పదార్థంగా మారి పంట అవశేషంగానే మిగిలిపోతుంది. పంటకు-పంటకు మధ్య సమయం తక్కు వ ఉండడంతో ఈ కొయ్యకాళ్లు, వరిగడ్డిని కంపోస్టుగా మార్చుకోవడంపై రైతులకు అవగాహన లేక తగుల పెడుతున్నారు. దీనివల్ల నష్టాలే తప్ప లాభం ఏమా త్రం ఉండదని వ్యవసాయ అధికారులు, శాస్త్రవేత్తలు హెచ్చరిస్తున్నారు. ఒక్కోసారి కాల్చే పొగతో రైతు ఊపిరాడక చనిపోయిన సందర్భాలున్నాయని వివరిస్తున్నారు.

గతంలో పలువురు రైతుల మృతి

గతేడాది మే 12న ఇల్లంతకుంట మండలం రహీంఖాన్‌పేటలో వరి కొయ్యలకు నిప్పు పెట్టి ఊపిరాడక గుండ ఎంకవ్వ(55) మృతి చెందింది. జగిత్యాల రూరల్‌ మండలం వెల్దుర్తికి చెందిన పోతుగంటి లక్ష్మణ్‌ (65) సైతం గతేడాది యాసంగి సీజన్‌లో కొయ్యకాళ్లను తగులబెట్టగా, ఒక్కసారిగా మంటలు చెలరేగా యి. పక్కనే ఉన్న గడ్డికుప్పలకు మంటలు అంటుకుంటాయనే భయంతో మంటలను ఆర్పేందుకు ప్రయత్నించే క్రమంలోనే నిప్పంటుకొని ప్రాణాలు కోల్పోయాడు. గతంలో మానకొండూర్‌ మండలం మద్దికుంట చెందిన ఓ రైతు ఊపిరాడక చనిపోయాడు.

విపరీతమైన నష్టాలు

• వరి కొయ్యలను కాల్చడం వల్ల వాతావరణ కాలుష్యం పెరుగుతుంది.
• అధిక వేడితో భూమి సారాన్ని కోల్పోతుంది. ముఖ్యంగా నత్రజని, పాస్పరస్‌ లాంటి పోషక పదార్థాల శాతం తగ్గుతుంది. దిగుబడి పోతుంది.
• భూమికి పీచు పదార్థంగా ఉపయోగపడే అవశేషాలు కాలిపోతాయి.
• పంటలకు అవసరమైన ఖనిజ లవణాలు దెబ్బతింటాయి.
• మేలు చేసే సూక్ష్మ జీవులు చనిపోతాయి.
• పొలాలలో తిరిగే పాములు, ముంగీసలు, ఉడుములు, నెమళ్లు, తొండలు ఇలా అనేక జీవరాశులు చనిపోయే ప్రమాదం ఉన్నది. దీంతో ప్రకృతి సమతుల్యత దెబ్బతింటుంది.
• గట్లు, మొరం గడ్డలపై ఉన్న పచ్చని చెట్లు కూడా ఒక్కోసారి బుగ్గవుతున్నాయి.
• మరో ముఖ్య విషయం ఏమిటంటే ఆలస్యంగా కోతకు వచ్చే పంటలు, కల్లాల దగ్గరే ఉన్న ధాన్యం కాలిపోయి నష్టం వాటిల్లే ప్రమాదముంది.
• మంటలు పొలమంతా వ్యాపించడంతో విద్యుత్‌ మోటర్లు, వైర్లు, పైపులు కాలిపోతాయి.
  దున్నితే చాలా ప్రయోజనాలు
• వరి కొయ్యలు నేలలో కలియదున్నడం వల్ల సేంద్రియ కర్బన శాతం పెరిగి దిగుబడులు 5 నుంచి 10 శాతం పెరిగే అవకాశమున్నది.
• దుక్కిదున్నే సమయంలో సూపర్‌ పాస్పేట్‌ చల్లితే అవశేషాలు రెండు వారాల్లో మురిగి పోషకాలుగా అందుబాటులోకి వస్తాయి. ఫలితంగా డీఏపీ వాడకం సగం వరకు తగ్గుతుంది.
• కలియ దున్నితే ఎకరాకు దాదాపుగా టన్ను ఎరువు తయారవుతుంది.
• మొక్కలకు 2 శాతం నత్రజని(యూరియా), 4 శాతం పాస్పరస్‌ అదనంగా అందిస్తుంది.
• జింక్‌, మాంగనీస్‌, ఇనుము, కాల్షియం లాంటి సూక్ష్మధాతువులు పంటకు మేలు చేకూర్చుతాయి.
• నేలలో కరుగని మూలకాలనూ పంటకు అనుకూలంగా మార్చుతుంది.
• నీటినిల్వ సామర్థ్యం పెరుగుతుంది.
• ఒక టన్ను వరి గడ్డి కావాలంటే.. ఆ వరి పెరుగుదలకు 18.9 కిలోల పొటాషియం, 6.2 కిలోల నత్రజని, 1.1కిలోల భాస్వరంతో పాటు కొంత మోతాదులో సూక్ష్మపోషకాలు అవసరం అవుతాయి. కొయ్యకాళ్లను భూమిలో కలియ దున్నితే, గడ్డి ద్వారా పోషకాలన్నీ తిరిగి నేలకు చేరుతాయి