Visit:
Donald Trump : అమెరికా (USA) లో మధ్యంతర ఎన్నికలు ముగియగానే ఇరాన్ (Iran) తో నెలకొన్న ఉద్రిక్తతలు సమసిపోతాయని అమెరికా అధ్యక్షుడు (US President) డొనాల్డ్ ట్రంప్ (Donald Trump) సంచలన వ్యాఖ్యలు చేశారు. అమెరికా ఎన్నికలను ప్రభావితం చేసేందుకే టెహ్రాన్ ఈ పోరాటాన్ని ఉద్దేశపూర్వకంగా సాగదీస్తోందని ఆరోపించారు. బుధవారం రాత్రి డల్లాస్ పర్యటన నిమిత్తం ఎయిర్ ఫోర్స్ వన్ (Airforce One) లో బయలుదేరే ముందు ఆయన విలేకరులతో మాట్లాడారు.
“ఎన్నికల తర్వాత ఈ పోరు తక్షణమే ముగియబోతోందని నేను భావిస్తున్నా” అని ట్రంప్ పేర్కొన్నారు. ఇందుకు గల కారణాన్ని వివరిస్తూ.. “వారు ఇక ఎంతమాత్రం నిలదొక్కుకోలేరు. అమెరికాలో ఒక బలహీనమైన ప్రభుత్వాన్ని అధికారంలోకి తెచ్చి, వారిని ప్రభావితం చేయడం ద్వారా అణ్వాయుధాన్ని సొంతం చేసుకోవాలని ఇరాన్ తీవ్రంగా ప్రయత్నిస్తోంది” అని వ్యాఖ్యానించారు. ఇరాన్ అణ్వాయుధాలను కలిగి ఉండటం యావత్ ప్రపంచానికే పెను ప్రమాదమని ఆయన ఈ సందర్భంగా మరోసారి హెచ్చరించారు.
ప్రపంచవ్యాప్తంగా ముడి చమురు ధరలు బ్యారెల్కు 100 డాలర్ల మార్కును దాటడానికి ఇరాన్తో కొనసాగుతున్న ఘర్షణలే ప్రధాన కారణమని ట్రంప్ ఆరోపించారు. ఎన్నికల అనంతరం చమురు, గ్యాసోలిన్ ధరలు భారీగా తగ్గుతాయని, గ్యాసోలిన్ ధరను గ్యాలన్కు 2 డాలర్ల కంటే తక్కువకు తీసుకువస్తామని ఆయన హామీ ఇచ్చారు. అయితే ఈ ధరల తగ్గుదల మధ్యంతర ఎన్నికలకు ముందే సాధ్యం కాకపోవచ్చని ఆయన అంగీకరించారు. ప్రస్తుతానికి ఇరాన్తో చర్చలు జరిపే యోచన లేదని, అయితే భవిష్యత్తులో ఆ అవకాశాన్ని పూర్తిగా కొట్టిపారేయలేమని ట్రంప్ స్పష్టంచేశారు.
“నిజానికి నేను మొదట ఒక ఒప్పందం చేసుకోవాలనుకున్నా, కానీ ఇప్పుడు పరిస్థితులు చాలా ముందుకు వెళ్లాయి. ఆ దేశం ప్రస్తుతం అత్యంత బలహీన స్థితిలో ఉంది, అందుకే మేము చర్చల కోసం ఆత్రుత చూపడం లేదు” అన్నారు. కేవలం అణు ఒప్పందానికే పరిమితం కాకుండా అంతకంటే పెద్ద లక్ష్యాన్ని నిర్దేశించుకున్నామని, రాబోయే రోజుల్లో మరిన్ని అంశాలు చర్చకు వస్తాయని తెలిపారు. గత ఏడు నెలలుగా కొనసాగుతున్న ఈ ఘర్షణల్లో భాగంగా హర్మూజ్ జలసంధి వద్ద జరిగిన దాడుల్లో అమెరికా దళాలు ఇరాన్కు చెందిన తొమ్మిది నౌకలను, ట్యాంకర్లను ధ్వంసం చేశాయని ట్రంప్ వెల్లడించారు. కాగా, అమెరికా మధ్యంతర ఎన్నికలు నవంబర్ 3న జరగనున్నాయి.
