Swadesh Movement : చరిత్రలో ఈరోజు.. స్వదేశీ ఉద్యమానికి 116 ఏండ్లు

Swadesh Movement : పశ్చిమ బెంగాల్‌ను ముక్కలుగా చేసిన బిట్రిషర్లకు వ్యతిరేకంగా స్వదేశీ ఉద్యమం 116 ఏండ్ల క్రితం సరిగ్గా ఇదే రోజున ప్రారంభమైంది

August 7, 2021 / 12:58 PM IST

Swadesh Movement : చరిత్రలో ఈరోజు.. స్వదేశీ ఉద్యమానికి 116 ఏండ్లు

పశ్చిమ బెంగాల్‌ను ముక్కలుగా చేసిన బిట్రిషర్లకు వ్యతిరేకంగా స్వదేశీ ఉద్యమం (Swadesh Movement) 116 ఏండ్ల క్రితం సరిగ్గా ఇదే రోజున ప్రారంభమైంది. 1905 జూలై 20 న బెంగాల్‌ విభజనను లార్డ్‌ కర్జన్‌ ప్రకటించగా.. అదే సంవత్సరం అక్టోబర్‌ నెలలో అమలులోకి వచ్చింది. బెంగాల్‌ను విభజిస్తూ లార్డ్‌ కర్జన్‌ తీసుకున్న నిర్ణయంపై దేశవ్యాప్తంగా నిరసనలు భగ్గుమన్నాయి. హిందు-ముస్లింలను విడదీస్తూ బ్రిటీష్‌ ప్రభుత్వం బెంగాల్‌ను ఐదు ముక్కలుగా విభజించింది. ఇదే స్వదేశీ ఉద్యమానికి నాందీగా నిలిచింది.

బెంగాల్‌ విభజనను నిరసిస్తూ కోల్‌కతాలోని టౌన్‌ హాలులో 1905 ఆగస్టు 7 న భారీ జన సభ నిర్వహించారు. ఈ సభకు దేశవ్యాప్తంగా లక్షలాది మంది హాజరయ్యారు. బ్రిటీషర్ల తీరును నిరసనగా వారి ఆధ్వర్యంలో నడుస్తున్న కార్యాలయాలు, పాఠశాలలు, కోర్టుల సేవలు వినియోగించుకోకూడదని, వారి వస్తువులను వాడకూడదని తీర్మాణం చేశారు. ఇక్కడి నుంచే స్వదేశంలో తయారయ్యే వస్తువులను మాత్రమే ఉపయోగించాలని తీసుకున్న నిర్ణయంతో స్వదేవీ ఉద్యమం ఊపందుకున్నది. దాంతో విదేశాలకు చెందిన దుస్తులు, వస్తువులను దహనం చేయడం ప్రారంభించారు. కాళ్లకు చెప్పులు లేకుండా ఉద్యమంలో ప్రజలు పాల్గొనడం మొదలుపెట్టారు. దాంతో విదేశీ వస్తువుల అమ్మకాలు పూర్తిగా తగ్గిపోయి, ఇక్కడ తయారుచేసే వస్తువుల అమ్మకాలు పెరిగిపోయాయి. హిందు-ముస్లిం మధ్య స్నేహం చెక్కుచెదరదని చాటేందుకు ఒకరికొకరు రాఖీలు కట్టుకోవడం ప్రారంభించారు.

నిరసనలు దేశవ్యాప్తంగా కొనసాగుతున్నప్పటికీ బ్రిటీష్‌ ప్రభుత్వం ఏమాత్రం వెనుకడుగు వేయలేదు. అక్టోబర్‌ 16 న బెంగాల్‌ను విభజనను అమలుచేసింది. దాంతో తీవ్ర మనోవేధనకు గురైన భారతీయులు ఈ రోజును జాతీయ సంతాప దినోత్సవంగా జరిపారు. బ్రిటీషర్ల తీరును నిరసిస్తూ ‘అమర్‌ షోనార్‌ బంగ్లా’ అనే దీర్ఘకవితను రాశారు. ఈ కవిత తదనంతర కాలంలో బంగ్లాదేశ్‌ జాతీయగీతంగా మారింది.