ఇబ్రహీంపట్నం, ఏప్రిల్ 15 : ఆర్టీసీలో రవాణా సౌకర్యాన్ని మరింత మెరుగుపరుచడం కోసం ఆర్టీసీ ప్రవేశపెట్టిన కార్గో బస్సుల విధానం సత్ఫలితాలిస్తున్నాయి. దీనిని దృష్టిలో ఉంచుకుని ఆర్టీసీ మరో అడుగు ముందుకేసి మరిన్ని కార్గో బస్ సర్వీసులు నడుపడం కోసం ప్రణాళికలు సిద్ధం చేస్తున్నది. ప్రస్తుతం సరుకు రవాణా కోసమే ఉపయోగిస్తున్న కార్గో బస్సులను ఇకముందు వ్యవసాయ ఉత్పత్తుల రవాణా కోసం కూడా నడుపాలని ఆర్టీసీ యోచిస్తున్నది. లాక్డౌన్ తదితర కారణాల వలన ఆర్టీసీ ఆదాయం గణనీయంగా తగ్గిపోయిన నేపథ్యంలో ఆర్టీసీ ఆదాయాన్ని పెంచడం కోసం కార్గో బస్సు సర్వీసులను అధికారులు ప్రవేశపెట్టారు. ప్రస్తుతం ఉన్న కార్గో బస్సులు సరుకు రవాణాలో నిత్యం బిజీగా ఉంటున్నాయి. ఈ డిమాండ్ను బట్టి మరిన్ని కార్గో బస్సులను నడుపాలని భావిస్తున్నారు. హైదరాబాద్ చుట్టూ ఉన్న రంగారెడ్డిజిల్లాలో సరుకు రవాణాతో పాటు వ్యవసాయ ఉత్పత్తులైన కూరగాయలు, పాలు, పండ్లు తదితర వాటిని కార్గో బస్సుల ద్వారా గ్రామాల నుంచి నగరానికి చేరవేస్తున్నారు. దీంతో ఈ కార్గో సేవలు ప్రజలకు మరింత ఉపయోగకరంగా మారాయి. దీంతో వ్యాపారులు, వ్యవసాయ ఉత్పత్తిదారుల నుంచి డిమాండ్ పెరిగిన నేపథ్యంలో వీటి సంఖ్యను మరింత పెంచాలని భావిస్తున్నారు. ముఖ్యంగా జిల్లాలోని ఇబ్రహీంపట్నం, హయత్నగర్, బండ్లగూడ, ఉప్పల్, మహేశ్వరం, శంషాబాద్, షాద్నగర్, చేవెళ్ల తదితర డిపోల పరిధిలో సరుకు రవాణా కోసం కార్గో బస్సులు పనిచేస్తున్నాయి. హయత్నగర్ డివిజనల్ మేనేజర్ పరిధిలో ప్రస్తుతం 26కార్గో బస్సులు ఉన్నాయి. వీటిలో 8టన్నుల సరుకు రవాణా సామర్థ్యం కలిగినవి 20బస్సులు, 3 టన్నుల సరుకు రవాణా సామర్థ్యం కలిగినవి 6 బస్సులు ఉన్నాయి. ఈ బస్సులు ఇబ్రహీంపట్నం, హయత్నగర్ -1, హయత్నగర్-2, బండ్లగూడ, ఉప్పల్, మిధాని తదితర డిపోల్లో పనిచేస్తున్నాయి. ఈ బస్సుల వలన ఆర్టీసీకి ఆదాయం కూడా పెరుగుతున్నది. మరో 15కార్గో బస్సులను నడిపేలా ఆర్టీసీ చర్యలు తీసుకుంటున్నది.
పొలాల వద్దకే..
కార్గో సేవలను ఇకనుంచి వ్యవసాయ ఉత్పత్తుల రవాణాకు కూడా వినియోగించాలని ఆర్టీసీ అధికారులు భావిస్తున్నారు. ఎవరైనా వ్యాపారస్తులు, రైతులు తాము పండించిన ధాన్యంతో పాటు ఇతరత్రా కూరగాయలు, పండ్లను మార్కెట్లోకి చేరవేసేందుకు కార్గో బస్సులను కల్లాల వద్దకే పంపాలని నిర్ణయించారు. రైతులు, వ్యాపారస్తులు కార్గో సెంటర్లకు వెళ్లి బస్సులను బుక్చేసుకోవాలని సూచిస్తున్నారు. ఆర్టీసీ ఆదాయాన్ని పెంచడం కోసమే ఈ వినూత్న ప్రయోగమని ఆధికారులు తెలుపుతున్నారు.
ఇవి కూడా చదవండి
యజమాని ప్రాణాన్ని కాపాడిన పెంపుడు కుక్క