న్యూయార్క్ : యజమాని పట్ల విశ్వాసం చూపడంలో శునకానికి మించినది లేదు. అమెరికాలోని కన్సాస్ సిటీ లో తన యజమాని ప్రాణాలను కాపాడిన పెంపుడు కుక్క ఉదంతం సో|షల్ మీడియాలో వైరల్ గా మారింది. తన యజమాని ప్రాణాపాయ పరిస్థితిపై పొరుగు వ్యక్తిని సకాలంలో కుక్క ఎలా అలర్ట్ చేసిందనే వివరాలను కన్సాస్ సిటీ పోలీస్ డిపార్ట్ మెంట్ ఫేస్బుక్ పోస్ట్ లో వెల్లడించింది. ఆదివారం రాత్రి లౌరెల్ ప్రాంతంలో ఓ వ్యక్తి తన పెంపుడు కుక్కతో కలిసి వాకింగ్ చేస్తుండగా తీవ్ర అస్వస్ధతకు లోనయ్యాడు.
దీంతో యజమాని ప్రాణాపాయాన్ని పసిగట్టిన కుక్క వెంటనే పొరుగున ఉండే వ్యక్తిని అప్రమత్తం చేయగా వారు 911కు కాల్ చేశారని పోలీసులు పేర్కొన్నారు. కుక్క సమయస్ఫూర్తితో వ్యక్తికి సకాలంలో వైద్యం అంది కోలుకున్నారని వెల్లడించారు. ఈ పోస్ట్ ఆన్ లైన్ లో పోస్ట్ కాగానే పెద్దసంఖ్యలో లైక్స్ రావడంతో పాటు సోషల్ మీడియాలో వైరల్ గా మారింది. పెంపుడు కుక్క యజమాని త్వరగా కోలుకోవాలని పలువురు నెటిజన్లు ఆకాంక్షించారు. యజమాని పట్ల కుక్క చూపిన విశ్వాసం, ఔదార్యాన్ని కొనియాడారు.